ތަށި އުފުލާލާނެ ވަކި ޚާއްޞަ ޓީމެއް މިވަގުތަކު ނެތް: ސްކެލޯނީ

ގަދަ 16ގައި މިރޭ މިސްރާ ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި، މިހާރު ކުރިއަށްދާ ފީފާ ވޯލްޑްކަޕްގައި ވާދަވެރިކަން ބޮޑުވެ، ތަށި ހޯދާނެ ކަމަށް ބެލެވޭ ފޭވަރިޓް ޓީމެއް ނެތްކަމަށް އާޖެންޓީނާގެ ކޯޗު ލިއޮނެލް ސްކެލޯނީ ބުނެފިއެވެ.

މި މުބާރާތުގެ އެއްވެސް ކުރިމަތިލުމަކީ ފަސޭހަ ކަމަކަށް ނުވާނެކަން ފާހަގަކުރަމުން، ސްކެލޯނީ ވަނީ ނަން މަޝްހޫރު ބޮޑެތި ޓީމުތައް ވެސް މިހާރު މުބާރާތުން ވަކިވެފައިވާކަން ހަނދާންކޮށްދީފައެވެ. އޭނާ ބުނިގޮތުގައި، ކުރިން ތަށި ގެންދާނެކަމަށް އުންމީދުކުރެވުނު ގިނަ ގައުމުތަކެއް މިހާރު ވަނީ ކަޓާފައެވެ. އެހެންކަމުން މިއީ ވަކި ބަޔަކަށް ޚާއްޞަ މުބާރާތެއް ނޫންކަމަށް އޭނާ ގަބޫލުކުރެއެވެ.

މިރޭގެ މެޗަށް އާޖެންޓީނާ ނުކުންނައިރު، އެ ޓީމު ގަދަ ސޯޅައަށް ދަތުރުކުރީ އަލަށް ވޯލްޑްކަޕްގައި ފައިތިލަ ސާބިތުކުރި ކޭޕް ވާޑްއާ ދެކޮޅަށް ކުޅެ އުނދަގޫތަކަކަށް ފަހު 3-2އިން ކުރި ހޯދައިގެންނެވެ. އެހެން ނަމަވެސް، މިހާތަނަށް އާޖެންޓީނާގެ ކުޅުންތެރިން ދައްކަމުން އަންނަ ހުނަރާއި ނެރެމުންދާ ނަތީޖާތަކާމެދު ވަރަށް ބޮޑަށް ހިތްހަމަޖެހޭކަމަށް ސްކެލޯނީ ވަނީ ހާމަކޮށްފައެވެ.

މިފަހަރުގެ މުބާރާތުގައި ބޮޑެތި ޓީމުތަކަށް ވަނީ ގިނަ ގޮންޖެހުންތަކާ ކުރިމަތިލާން ޖެހިފައެވެ. އެގޮތުން، މުބާރާތުގެ އެންމެ ފަހުގެ ޗެމްޕިއަންކަން ހޯދި އާޖެންޓީނާއާ ދެކޮޅަށް އެފަހަރުގެ ފައިނަލްގައި ވާދަކުރި ފްރާންސަށް ކުއާޓަރ ފައިނަލްގެ ޖާގައެއް ކަށަވަރުވީ ޕެރަގުއޭއާ ދެކޮޅަށް ކުޅެ ޕެނަލްޓީ ޝޫޓްއައުޓުން މޮޅުވެގެންނެވެ. މީގެ އިތުރުން، ސްޕެއިން އަތުން 1-0އިން ބަލިވެ ޕޯޗުގަލް ކަޓާފައިވާއިރު، މުބާރާތް ބާއްވާ ގައުމު ކަމަށްވާ އެމެރިކާގެ އިތުރުން ފަސް ފަހަރު ދުނިޔޭގެ ތަށި އުފުލާލި ބްރެޒިލްއާއި ޖަރުމަނު ވެސް ވަނީ ނޮކްއައުޓް މަރުހަލާގައި މުބާރާތާ އަލްވަދާއު ކިޔާފައެވެ.