ހއ. ދިއްދޫ ފުޓުބޯޅަ ދަނޑުގައި ކުޅުނު ދިރާގު ދިވެހި ޕްރިމިއާ ލީގުގެ މެޗުގައި ކުޅުންތެރިއަކު މަދުކޮށް ކުޅެމުންދިޔަ ކްލަބް އީގަލްސްއާ 2-2އިން އެއްވަރުކޮށް، އެ ޓީމުގެ މޮޅުވުމުގެ ސިލްސިލާ ދިއްދޫ ޓީމުން ހުއްޓުވައިފިއެވެ.
މި ފޯރިގަދަ ކުރިމަތިލުމުގައި އީގަލްސްގެ ގޯލުތައް ކާމިޔާބުކުރީ މުހައްމަދު ޖައިލަމް އާއި ވެން ޑޭވް އެވެ. އަނެއްކޮޅުން ދިއްދޫ ޓީމަށް ނަތީޖާ ހަމަހަމަކޮށްދިން ލަނޑުތައް ޖަހައިދިނީ ފެލިކްސް އަދި ޓެޓޭއެވެ. ފުރަތަމަ ހާފުގައި ލިބުނު ޕެނަލްޓީއެއް ބޭކާރުވި ނަމަވެސް، މުޅި މެޗުގެ ތެރޭގައި ތަފާތު މޮޅު ކުޅުމެއް ދައްކައިގެން ދިއްދޫގެ ޓެޓޭ ވަނީ މެޗުގެ އެންމެ މޮޅު ކުޅުންތެރިޔާގެ މަގާމު ހާސިލުކޮށްފައެވެ.
މި މެޗުން ލިބުނު އެއް ޕޮއިންޓާއެކު އީގަލްސް ވަނީ ކުޅުނު ހަތަރު މެޗުން ދިހަ ޕޮއިންޓް ހަމަކޮށް ލީގުގެ ދެވަނަ މަގާމަށް ކުރިއަށް ޖެހިލާފައެވެ. ތާވަލުގެ އެންމެ ކުރީގައި އޮތް ވިކްޓްރީއާއި އީގަލްސްއާ ދެމެދު ޕޮއިންޓުގެ ގޮތުން ހަމަހަމަވެފައިވީ ނަމަވެސް، ވިކްޓްރީއަށް ކުރި ލިބެނީ ފައިދާ އެންމެ ގޯލެއްގެ ތަފާތުންނެވެ. ފަސް މެޗު ކުޅެގެން ފަސް ޕޮއިންޓް ހޯދާފައިވާ ދިއްދޫއަށް މިއީ އަމިއްލަ ރަށުގައި ކުޅުނު ދެވަނަ މެޗެވެ. އެ ދަނޑުގައި ކުޅުނު ފުރަތަމަ މެޗެކޭ އެއްފަދައިން މި މެޗުވެސް ނިމުނީ ދެ ލަނޑު ދެ ލަނޑުން ދެ ޓީމު އެއްވަރުވެގެންނެވެ.
ލީގުގެ ކުޅުން ކުރިއަށްދާ ގޮތަށް ބަލާއިރު، ދިއްދޫ ޓީމުން ދެން ނުކުންނާނީ މި ހިނގާ މަހުގެ 20ވަނަ ދުވަހު އަމިއްލަ ދަނޑުގައި ޓީސީ ސްޕޯޓްސް ކްލަބާ ދެކޮޅަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.