ހަލަބޮލިވި މެޗްގެ އިތުރު ވަގުތުގެ ތެރޭގައި ޖެހި ލަނޑުން ޕެނަމާ ބަލިކޮށް ގާނާ މޮޅުވެއްޖެ

ވާރޭވެހެމުންދިޔަ ޓޮރޮންޓޯގައި ކުޅުނު ، ޕެނަމާއާއި ގާނާގެ ފުރަތަމަ މެޗް ގާނާއިން ކާމިޔާބުކޮށްފުއެވެ.

ގާނާ މޮޅުވީ ދެވަނަ ހާފުގެ އިތުރު ވަގުތުގެ ފަސްވަނަ މިނެޓުގައި، ކޭލެބް ޔިރެންކީ ކައުންޓަރ އެޓޭކެއްގައި ޖެހި ލަނޑުންނެވެ.

 މެޗުގެ އެންމެ ފަހު ވަގުތު ޕެނަމާގެ މައްޗަށް ގާނާއިން ކުރިހޯދުމުން އެ ޓީމުގެ ސަޕޯޓަރުންނާއި ކުޅުންތެރިން ވަރަށް ބޮޑަށް އުފާފާޅުކުރިއެވެ.

މި ލަނޑަށް ފަހު، ރެފްރީ މެޗު ނިމުނުކަމުގެ ފަހު ކަށިގަނޑު ފުމުގެ ކުރިން ދެ ޓީމުގެ ކުޅުންތެރިންގެ މެދުގައި ވަނީ ހަމަނުޖެހުމެއް ހިނގައިފައެވެ.

ގާނާގެ އަމިއްލަ ހާފުން ބޯޅަ ހިފައިގެން ކުރިއަށް އަރައި، ބްރެންޑަން ތޯމަސް-އަސާންޓޭ ވާތްފަރާތު ފިޔައިން 18 ޔާޑުގެ އޭރިއާ ތެރެއަށް ވަދެ، މެދުތެރެއަށް ހުރަސްކޮށްލި ބޯޅަ ޔިރެންކީ ވަނީ ގޯލުގެ ތެރެއަށް ފޮނުވާލާފައެވެ.

މެޗުގެ ދެވަނަ ހާފު ފެނިގެންދިޔައީ ފޯރި ކުޑަކޮށް ދިޔަ ފުރަތަމަ ހާފާ މުޅިން ތަފާތުކޮށެވެ.

ދެވަނަ ހާފުގައި ދެ ޓީމުން ކުޅުން އަވަސްކުރި ނަމަވެސް، މެޗުގެ ނަތީޖާ ކަނޑައެޅި ލަނޑާ ހަމައަށް ލަނޑު ޖަހާނެ މާ ގިނަ ފުރުސަތުތަކެއް ތަނަވަސްކުރެވިފައެއް ނުވެއެވެ.

ފުރަތަމަ ހާފުގައި ޕެނަމާއިން މޮޅަށް ކުޅުނުއިރު، ހާފު މެދުކެނޑުމަށް ފަހު ގާނާއިން ވަނީ މެޗުގެ ކޮންޓްރޯލް ހޯދާފައެވެ.

މި މެޗަކީ ގްރޫޕް އެލްގެ ތިންވަނަ މަގާމަށް ވާދަކުރާނެ ކަމަށް ބެލެވޭ ދެ ޓީމުގެ މެދުގައި ކުޅެވުނު މުހިންމު ކުރިމަތިލުމެކެވެ.

ރޭ މި ގްރޫޕްގެ ފޭވަރިޓުންގެ މެދުގައި ކުޅުނު މެޗުން އިންގްލޭންޑް ވަނީ 4-2 އިން ކްރޮއޭޝިއާ ބަލިކޮށްފައެވެ.