"ސްވިމިންގ ޕޫލުގެ މަޝްރޫޢަކީ އެހެން ކުޅިވަރުތަކަށް އޮތް ނަމޫނާއެއް"

ބުރާސްފަތި ދުވަހުގެ ހަވީރު ހުޅުމާލޭގެ ފުރަތަމަ ފިޔަވަހީގައި ތަރައްޤީކުރަމުންދާ ފެންވަރު ރަނގަޅު ސްވިމިންގ ޕޫލްގެ މަސައްކަތް ބައްލަވާލެއްވުމަށް ފަހު، މި މަޝްރޫޢަކީ އަމިއްލަ ކުންފުނިތަކާއި ސަރުކާރު ގުޅިގެން ކުޅިވަރު ކުރިއެރުވުމަށް ކުރެވޭ ވަރަށް ފުރިހަމަ ނަމޫނާ މަސައްކަތެއްކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.

ކްރައުން ކޮމްޕެނީގެ ފަރާތުން ޗަމްޕާ ޙުސައިން އަފީފާ އެކު މި ސަރަޙައްދަށް ކުރެއްވި ޒިޔާރަތުގައި، ވަޒީރު ވަނީ މި ބޮޑު މަޝްރޫޢަށް އަމިއްލަ ފަރާތްތަކުން ދެއްވާ ދީލަތި އެހީތެރިކަން ޚާއްޞަ ގޮތެއްގައި ފާހަގަކުރައްވާފައެވެ. ދިވެހި ސަރުކާރާއި، ކްރައުން ކޮމްޕެނީގެ އިތުރުން މޯލްޑިވްސް އެކުއެޓިކްސް އަދި ދުނިޔޭގެ ފެތުމުގެ މައި އިދާރާ ގުޅިގެން ކުރިއަށްގެންދާ މި މަސައްކަތަކީ އެހެނިހެން ކުޅިވަރުތަކުގެ ކުރިއެރުމަށް ވެސް ބޭނުންކުރެވިދާނެ މޮޑެލްއެއްކަން އެ މަނިކުފާނު ފާހަގަކުރެއްވިއެވެ.

ދައުލަތުގެ މީޑިއާއަށް މަޢުލޫމާތު ދެއްވަމުން ރާފިޢު ވިދާޅުވީ، ކުޅިވަރުގެ އުމްރާނީ ތަރައްޤީއަށް އަމިއްލަ ވިޔަފާރިވެރިންގެ ފަރާތުން ލިބޭ މިފަދަ އެއްބާރުލުމަކީ މުޅި ކުޅިވަރު ޢާއިލާއަށް ލިބިގެންދާ ނުހަނު ބޮޑު އުފަލެއް ކަމަށެވެ. އަދި ވީހާ ވެސް އަވަހަކަށް މިތަން ނިންމުމަށް ޓަކައި ޙުސައިން އަފީފާއި ކްރައުން ކޮމްޕެނީން ވެދެއްވަމުން ގެންދަވާ އެހީތެރިކަމަށް ޓަކައި، ކުޅިވަރު ޢާއިލާގެ ނަމުގައި ވަޒީރު ވަނީ އިޚްލާޞްތެރިކަމާ އެކު ޝުކުރު އަދާކުރައްވާފައެވެ.

މި ސަރަޙައްދުގައި ބިނާކުރެވޭ އެންމެ ޒަމާނީ އެއް ފެސިލިޓީގެ ގޮތުގައި ފާހަގަކުރެވޭ މި ސްވިމިންގ ޕޫލަކީ ޚާއްޞަ އެހީއަށް ބޭނުންވާ ފަރާތްތަކަށް ވެސް އެއްވެސް ދަތިކަމަކާ ނުލައި ބޭނުންކުރެވޭނެހެން ފަރުމާކުރެވިފައިވާ ތަނެކެވެ. ސަރުކާރުގެ އެންމެ ބޮޑު އެއް އަމާޒަކީ މި މަސައްކަތް ނިމުމާ އެކު، ބައިނަލްއަޤްވާމީ ފެންވަރުގެ ބޮޑެތި މުބާރާތްތައް ރާއްޖޭގައި ބޭއްވުންކަމަށް ކުޅިވަރާ ބެހޭ ވުޒާރާއިން ހާމަކުރެއެވެ.

ފާއިތުވި އަހަރު ޢަމަލީ މަސައްކަތް ފެށުނު މި ޕްރޮޖެކްޓުގެ ބޮޑުބައި، ކުރިއަށް އޮތް ޑިސެމްބަރު މަހުގެ ކުރީކޮޅަށް އެއްކޮށް ނިންމާލެވޭނެކަމަށް މޯލްޑިވްސް އެކުއެޓިކްސްއިން ވަނީ ލަފާކޮށްފައެވެ.