ރާއްޖޭގެ ފުޓުބޯޅަ ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން، ހއ. ދިއްދޫގައި ބިނާކުރަމުންދާ ފީފާ ސްޓޭންޑަރޑްގެ ބައިނަލްއަޤްވާމީ ފުޓުބޯޅަ ދަނޑުގެ އަމަލީ މަސައްކަތްތައް އަންނަ އަހަރުގެ ނިޔަލަށް އެއްކޮށް ފުރިހަމަކުރެވޭނެކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ދައުލަތުގެ މީޑިއާއަށް މަޢުލޫމާތު ދެއްވަމުން ވަޒީރު ވަނީ، މިއީ ރާއްޖެއިން ބޭރުގެ ޓީމުތަކަށް ވެސް މެޗުތައް ކުޅެވޭނެ ފަދަ ޒަމާނީ ވަސީލަތްތަކާއި ޗޭންޖިންގ ރޫމްތައް ހިމެނޭގޮތަށް ފަރުމާކުރެވިފައިވާ ތަނެއްކަން ފާހަގަކުރައްވާފައެވެ. ނިމިދިޔަ އަހަރު ބިންގާ އެޅުނު މި ބޮޑު މަޝްރޫޢުގެ އަމަލީ މަސައްކަތް މިއަހަރުގެ ކުރީކޮޅު ފެށިފައިވާއިރު، މިހާރު މަސައްކަތް ކުރިއަށްދާ ސްޕީޑަށް ބަލައި އަންނަ އަހަރުގެ ތެރޭގައި އެއްކޮށް ނިންމާލެވޭނެކަމުގެ ޔަޤީންކަން އެމަނިކުފާނު ދެއްވިއެވެ.
އުތުރުގެ އެންމެ ބޮޑެތި ކުޅިވަރު މުބާރާތްތައް ބާއްވަމުން އަންނަ ދިއްދޫގައި މިފަދަ ފެންވަރު ރަނގަޅު ދަނޑެއް އެޅުމަކީ، މިދިޔަ އަހަރުގެ ޖެނުއަރީ މަހުގެ ތެރޭގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ކުރެއްވި ޒިޔާރަތުގައި ރައްޔިތުންނަށް ވެވަޑައިގެންނެވި މުހިންމު ވަޢުދުފުޅެކެވެ. މިއީ ދިވެހި ފުޓުބޯޅައިގެ ހައިބަތު އަލުން އަނބުރާ ގެނައުމަށް ސަރުކާރުން ގެންގުޅުއްވާ ތަސައްވުރުގެ ދަށުން ކުރިއަށްގެންދާ އިންޤިލާބީ މަސައްކަތެއްކަމަށް ވެސް ވަޒީރު ސިފަކުރެއްވިއެވެ.
ޤައުމީ ފުޓުބޯޅަ އިދާރާ (އެފްއޭއެމް)އާއި ސަރުކާރު ގުޅިގެން ޕްރިމިއަރ ލީގަށް ގެނައި އައު ބަދަލުތަކާ އެކު، އަތޮޅުތެރެއިން އެ ލީގުން ޖާގަ ކަށަވަރުކުރި ދެ ކުލަބުގެ ތެރޭގައި ދިއްދޫ ސްޕޯޓްސް ކުލަބު ހިމެނެއެވެ. އެގޮތުން ދިވެހި ލީގުގެ ރަސްމީ މެޗުތައް މިހާރު ވެސް އެރަށުގައި ކުޅެމުންދާއިރު، ދިއްދޫ ސްޕޯޓްސް ކުލަބުގެ އަމިއްލަ ދަނޑުގެ ގޮތުގައި ބޭނުންކުރަނީ ވެސް ހަމަ އެރަށެވެ.
މީގެ އިތުރުން ފުޓުބޯޅައިގެ ހަރަކާތްތައް ލާމަރުކަޒުކުރުމަށް އެފްއޭއެމްއިން ކުރިއަށްގެންދާ މަސައްކަތުގެ ތެރެއިން، ރާއްޖޭގެ ހަތަރު ސަރަޙައްދެއްގައި ޤާއިމުކުރާ އޮފީސްތަކުގެ ތެރެއިން ނޯތު ރީޖަން ފުޓުބޯޅަ އެސޯސިއޭޝަންގެ މައި އޮފީސް ހިންގުމަށް ހަމަޖެހިފައި ވަނީ ވެސް ހއ. ދިއްދޫގައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.