ޤައުމީ ފުޓްސަލް ޓީމުގެ ކޯޗަކަށް އަނެއްކާ ވެސް ޒަކީރޯވް!

އަންނަ ނޮވެމްބަރު މަހު ޗައިނާގެ އިންޗުއާންގައި ކުރިއަށްދާ "ޗައިނާ އިންޓަނޭޝަނަލް ފުޓްސަލް ޓޯނަމަންޓް"ގައި ވާދަކުރާ ދިވެހި ޤައުމީ ފުޓްސަލް ޓީމުގެ އިސް ކޯޗެއްގެ ގޮތުގައި، ރާއްޖެއަށް ސާފްގެ ތަށި ހޯދައިދިން އުޒްބެކިސްތާނުގެ ފާރޫކް ޒަކީރޯވް އަލުން ހަމަޖައްސައިފިއެވެ.

މި މުބާރާތަށް ތައްޔާރުވުމުގެ ގޮތުން ރާއްޖޭގައި މިހާރު ކުރިއަށްގެންދާ ފަރިތަކުރުންތަކުގައި ތަޖުރިބާކާރު ކޯޗު ޒަކީރޯވް ބައިވެރިއެއް ނުވާނެއެވެ. އޭގެ ބަދަލުގައި އޭނާ ސީދާ ޓީމާ ގުޅުމަށް ހަމަޖެހިފައިވަނީ މުބާރާތް އޮންނަ ޗައިނާއިންނެވެ. މުޅިން އަލަށް ތައާރަފުކުރި ސާފް ފުޓްސަލް ޗެމްޕިއަންޝިޕްގައި ކުޅުނު ހުރިހާ މެޗަކުން މޮޅުވެ، ރާއްޖެއިން އެ މުބާރާތުގެ ރަން މެޑަލް ހާސިލުކުރީ ވެސް އޭނާގެ ހުނަރުވެރި އިރުޝާދުގެ ދަށުންނެވެ.

ނޮވެމްބަރު މަހުގެ 4އިން 9އަށް ކުރިއަށްދާ މި ބައިނަލްއަޤުވާމީ މުބާރާތުގައި ރާއްޖޭގެ އިތުރުން ދެން ވާދަކުރާނީ ބާއްވާ ޤައުމު ކަމަށްވާ ޗައިނާއާއި، ދެކުނު ކޮރެއާގެ އިތުރުން ހޮންގް ކޮންގްއެވެ. ދިވެހި ޓީމު ކުޅޭ ފުރަތަމަ މެޗުގައި ނޮވެމްބަރު 5 ވަނަ ދުވަހު ދެކުނު ކޮރެއާއާ ދެކޮޅަށް ނުކުންނައިރު، ދެވަނަ މެޗުގައި 7ވަނަ ދުވަހު ބައްދަލުކުރާނީ ހޮންގް ކޮންގް އާއެވެ. އަދި ފަހު މެޗުގައި 9ވަނަ ދުވަހު ނުކުންނާނީ ޗައިނާއާ ދެކޮޅަށެވެ.

އޭޝިއާގެ ގަދަބާރުތަކަކާ ދެކޮޅަށް ކުޅުމަށް ލިބޭ މި ފުރުސަތަކީ ދިވެހި ކުޅުންތެރިންގެ ފެންވަރު ބައިނަލްއަޤުވާމީ ސްޓޭޖެއްގައި ވަޒަންކޮށްލަން ލިބޭނެ ވަރަށް ރަނގަޅު ތަޖުރިބާއެކެވެ. މުބާރާތަށް ޓީމު ފަރިތަކުރަމުން އަންނައިރު، ދާދި ފަހުން ބޭއްވި އެފްއޭއެމްގެ އެވޯޑްސްގައި އަހަރުގެ އެންމެ މޮޅު ފުޓްސަލް ކުޅުންތެރިޔާގެ މަގާމު ވެސް ވަނީ ފުރަތަމަ ފަހަރަށް ދީފައެވެ.