ހުޅުމާލޭ ސިންތެޓިކް ޓްރެކް ތަރައްގީކުރަން ފަށައިފި

ދުނިޔޭގެ އެތުލެޓިކްސް ޖަމިއްޔާއިން ގަބޫލުކުރާ ބައިނަލްއަގުވާމީ މިންގަނޑުތަކަށް ފެތޭގޮތަށް ހުޅުމާލޭގެ ސިންތެޓިކް ޓްރެކް ޒަމާނީ ޕީޔޫ ޓްރެކަކަށް ބަދަލުކުރުމުގެ އަމަލީ މަސައްކަތް ކުޅިވަރާ ބެހޭ ވުޒާރާއިން ފަށައިފިއެވެ.

މިހާތަނަށް ބޭނުންކުރަމުން އައި ޓްރެކަކީ ވޯލްޑް އެތުލެޓިކްސްގެ ސްޓޭންޑަޑްތަކަށް ފެތޭ ތަނަކަށް ނުވުމުން، ދިވެހި އެތުލީޓުން ގައުމީ އަދި އެހެނިހެން ރެކޯޑުތައް އާކުރި ނަމަވެސް އެކަން ރަސްމީކޮށް ބަލައިގަތުމަށް ވަނީ ހުރަސްތަކަކާ ކުރިމަތިވެފައެވެ. ނަމަވެސް މިހާރު ފަށައިގެން އުޅޭ ޕްރޮޖެކްޓާ އެކު މި މައްސަލައަށް ދާއިމީ ހައްލެއް ލިބިގެންދާނެއެވެ. 

ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު މީގެ ކުރިން ވިދާޅުވެފައިވާ ގޮތުގައި، މި މަޝްރޫއުގެ ދަށުން ކުރަން ޖެހޭ އެންމެހާ ތަފުސީލީ ކުރެހުންތައް ނިންމައި، ބޭނުންވާ ސާމާނުތައް ވެސް ވަނީ ރާއްޖެ ގެނައުމަށް އޯޑަރުކޮށްފައެވެ. ސަރުކާރުގެ އަމާޒަކީ އަންނަ އަހަރުގެ ޖެނުއަރީ މަސް ނިމުމުގެ ކުރިން މުޅި ޓްރެކްގެ މަސައްކަތް އެއްކޮށް ފުރިހަމަކޮށް، އެތުލީޓުންނަށް ބޭނުން ކުރެވޭނެ ފުރިހަމަ އިންތިޒާމެއް ހަމަޖެއްސުމެވެ.

މި މަސައްކަތް މި ހިނގާ އޮކްޓޯބަރު މަހުގެ ތެރޭގައި ފެށިގެންދާނެކަން ވަޒީރު އިއުލާނުކުރެއްވީ އާންމުންގެ ސުވާލުތަކަށް ޖަވާބުދިނުމަށް މިދިޔަ ސެޕްޓެމްބަރު މަހު ސަރުކާރުން ބޭއްވި "އަހާ"ފޯރަމްގެ ތެރެއިންނެވެ. މިއީ ރާއްޖޭގެ އެތުލެޓިކްސް ކުރިއަރުވައި ފެންވަރު ރަނގަޅު ވަސީލަތްތައް ކުޅުންތެރިންނަށް ފޯރުކޮށްދިނުމަށް އެޅިގެންދާ މުހިންމު ފިޔަވަޅެކެވެ.