ބައިނަލްއަޤްވާމީ ފެންވަރުގެ ހުނަރުވެރި އެތުލީޓުން ބިނާކުރުމުގެ މަޤުޞަދުގައި ސަރުކާރުން ފުރިހަމަ ޚަރަދުދީގެން ހިންގާ "އަރުތަ"ޕްރޮގްރާމުގެ 2027ވަނަ އަހަރުގެ ޖާގަތަކަށް ކުރިމަތިލުމުގެ ފުރުސަތު، ކުޅިވަރާ ބެހޭ ވުޒާރާއިން މިމަހުގެ 30ވަނަ ދުވަހުގެ ނިޔަލަށް ހުޅުވާލައިފިއެވެ.
ދިވެހިރާއްޖޭގެ ކުޅިވަރު މައި އިދާރާއިން ސަރުކާރުގެ ގެޒެޓުގައި ޝާއިޢުކޮށްފައިވާ އިއުލާނެއްގައި ބަޔާންކޮށްފައިވާ ގޮތުން، މި ސްކޮލަރޝިޕްތަކަށް އެދި ފޯމު ހުށަހެޅޭނީ މިމަހުގެ ތިރީސްވާ ބުދަ ދުވަހުގެ މެންދުރުފަހު ދޭއްގެ ކުރިންނެވެ. ޝައުޤުވެރިކަން ހުރި ފަރާތްތަކުން ފުރިހަމަކޮށްފައިވާ ފޯމާއި ގުޅޭ ލިޔެކިޔުންތައް ވުޒާރާގެ ކައުންޓަރަށް ނުވަތަ އެ އިދާރާގެ ރަސްމީ އީމެއިލް މެދުވެރިކޮށް ފޮނުވުމަށް ވަނީ އަންގާފައެވެ. އަދި މިކަމާ ގުޅޭ އުސޫލުތަކާއި އެޕްލިކޭޝަން ފޯމު ކުޅިވަރާ ބެހޭ ވުޒާރާގެ ރަސްމީ ވެބްސައިޓުން ލިބެން ހުންނާނެކަމަށް ވެސް އެ ފަރާތުން މަޢުލޫމާތުދެއެވެ.
މި ޕްރޮގްރާމަށް އެންމެ އެކަށީގެންވާ ފަރާތްތައް ކަނޑައެޅުމަށް ޓަކައި ޚާއްޞަ ކޮމިޓީއެއް އެކުލަވާލެވިފައިވާއިރު، އެޕްލިކޭޝަންތައް ވަޒަންކުރާނީ އަރުތަ ޤަވާޢިދުގައި ކަނޑައަޅާފައިވާ މިންގަނޑުތަކުގެ މައްޗަށް ބިނާކޮށެވެ. މިއީ ރާއްޖޭގެ ކުޅިވަރު ކުރިއެރުވުމަށް ބޭނުންވާ ފަންނީ ތަޖުރިބާއާއި ތަމްރީނު ހޯދައިދިނުމަށް ސީދާ ދައުލަތުގެ ބަޖެޓުން ޚަރަދުކުރާގޮތަށް ފަރުމާކޮށްފައިވާ މުހިންމު މަޝްރޫޢެކެވެ.
މިހާރުގެ ސަރުކާރުން ވަނީ އަރުތަ ޕްރޮގްރާމް އިތުރަށް ހަރުދަނާކޮށް، ފުރިހަމަ ނިޒާމެއްގެ ތެރެއިން ކުރިއަށް ގެންދިއުމަށް މުހިންމު ބަދަލުތަކެއް ގެނެސްފައެވެ. ކުޅިވަރާ ބެހޭ ވަޒީރު ޕީއެސްއެމްގެ ޕްރޮގްރާމެއްގައި މީގެ ކުރިން ހާމަކުރައްވާފައިވާ ފަދައިން، މިހާރު މި ސްކޮލަރޝިޕްތައް ދޫކުރެވެމުންދާނީ އެކި ކުޅިވަރު އެސޯސިއޭޝަންތަކާ އެކު ބޭއްވުނު ފުޅާ ދާއިރާއެއްގެ މަޝްވަރާތަކަށް ފަހު އެކުލަވާލެވިފައިވާ ހަރުދަނާ އުސޫލެއްގެ ތެރެއިންނެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.