ބުރު ބަލިކޮށް ބިސްބުރު ގަދަ ހަތަރަކަށް!

ދިރާގު ދިވެހި ޕްރިމިއަރ ލީގުގެ ތެރެއިން ގަލޮޅު ރަސްމީ ދަނޑުގައި މިއަދު ހަވީރު ކުޅެވުނު ފޯރިގަދަ ކުރިމަތިލުމުގައި، އެއް ކުޅުންތެރިއަކު މަދުކޮށް ކުޅެމުންދިޔަ ބިސްބުރު ސްޕޯޓްސް ކްލަބުން 2-1ގެ ނަތީޖާއަކުން ބުރު ސްޕޯޓްސް ކްލަބް ބަލިކޮށް ތާވަލުގެ ހަތަރުވަނަ މަގާމު ކަށަވަރުކޮށްފިއެވެ.

މި ކާމިޔާބީއަކީ މުބާރާތުގައި ބިސްބުރުން ވިދިވިދިގެން ހޯދި ދެވަނަ މޮޅު ކަމަށްވާއިރު، މިހާތަނަށް ކުޅުނު ތިން މެޗުން އެ ޓީމަށް ވަނީ ޖުމްލަ ހަ ޕޮއިންޓް ލިބިފައެވެ. 

މެޗުގެ ފަހުކޮޅު ބިސްބުރުން ނަތީޖާ އަނބުރާލީ ވަރަށް ހިތްވަރުގަދަ ކުޅުމެއް ދެއްކުމަށް ފަހުގައެވެ. އެ ޓީމުގެ އުލޫފް އަހުމަދަށް 76ވަނަ މިނިޓުގައި ދެވަނަ ރީނދޫ ކާޑަކާއެކު ރަތް ކާޑު ދެއްކުމުން، މެޗުގެ ބާކީބައި ފުރިހަމަކުރަން ޖެހުނީ ދިހަ ކުޅުންތެރިންނާއެކުގައެވެ. އެހެން ނަމަވެސް، އޭގެ ހަތަރު މިނިޓު ފަހުން ލިބުނު ކޯނަރެއްގެ ބޭނުން ހިފައި، ބިދޭސީ ކުޅުންތެރިޔާ އަލޫ އޮވޮލާބީ ވަނީ ނަތީޖާ އެއްވަރުކޮށްދީފައެވެ. އަދި ބިސްބުރަށް މެޗުގެ ތިން ޕޮއިންޓް ކަށަވަރުކޮށްދިން ލަނޑު، އިތުރު ވަގުތުގެ އެންމެ ފަހު ސިކުންތުކޮޅުގެ ތެރޭގައި ކާމިޔާބުކޮށްދިނީ ފާއިތުވި ސީޒަނުގައި ވިކްޓްރީ ސްޕޯޓްސް ކްލަބަށް ކުޅުނު މަޖުދާން ސޯލިހުއެވެ.

އޭގެ ކުރިން، މެޗުގެ ފުރަތަމަ ހާފުގައި ރަނގަޅު ކުޅުމެއް ދައްކައި، ލީޑު ނެގީ ބުރު ސްޕޯޓްސް ކްލަބުންނެވެ. ބިދޭސީ މިޑްފީލްޑަރު ހަލީލް ޖަމާލް ތަނަވަސްކޮށްދިން ފުރުސަތެއްގައި، މެޗުގެ 30ވަނަ މިނިޓުގައި މި ގޯލު އެ ޓީމަށް ޖަހައިދިނީ އަބްދުﷲ ޔާމީންއެވެ. މެޗުގެ ފުރަތަމަ ހާފު ނިމުނީ މި ނަތީޖާގައި ބުރު ކުރީގައި އޮވެގެންނެވެ.