ދިވެހި ޕްރިމިއަރ ލީގުގެ ފުރަތަމަ ޑިވިޝަންގައި ހއ. ދިއްދޫން ކުޅޭ ތާރީހީ ފުރަތަމަ މެޗުގައި މާދަމާ ރޭ ގަލޮޅު ރަސްމީ ދަނޑުގައި ބުރު ސްޕޯޓްސް ކްލަބާ ދެކޮޅަށް ނުކުންނަން ހަމަޖެހިފައިވާއިރު، އެ ޓީމަށް ތަރުހީބުދިނުމަށް ބޮޑުތިލަދުންމަތީގެ އެންމެހާ ރައްޔިތުންނަށް އެ ޓީމުގެ މެނޭޖްމަންޓުން ދައުވަތު ދީފިއެވެ.
ދިއްދޫ ޓީމުގެ އިސްވެރިން ވަނީ، އުތުރުގެ ހުރިހާ ރައްޔިތުންވެސް އެ ޓީމުގެ ރަސްމީ ކުލަ ކަމަށްވާ ދަނބު ކުލައިގެ ހެދުމުގައި ދަނޑަށް ހާޒިރުވެ، ކުޅުންތެރިންނަށް ފުރިހަމަ ހިތްވަރެއް ދިނުމަށް އެދިފައެވެ. އަދި އަތޮޅުތެރޭގައި ފުޓްބޯޅައިގެ ފޯރި އޮތް މިންވަރު ސާބިތުކޮށްދީ، މާލޭގެ ދަނޑުގެ ހިމޭންކަން ނަގާލައި ދަނޑަށް ދިރުން ގެނެސްދިނުމަކީ އެ ޓީމުގެ ވަރަށް ބޮޑު އަމާޒެކެވެ.
މާދަމާ ރޭ 21:00ގައި ބުރު ސްޕޯޓްސްއާ ދެކޮޅަށް ކުޅޭ މި މެޗަށް ނުކުންނައިރު، ދިއްދޫ ޓީމަށް ވަނީ ވަސީލަތްތަކުގެ ގޮތުން ގިނަ ދަތިތަކަކާ ކުރިމަތިލާންޖެހިފައެވެ. ޓީމުގެ އޮފިޝަލަކު ފާހަގަކުރި ގޮތުގައި، ރަށުގައި ޖިމެއް ފަދަ ޒަމާނީ ވަސީލަތްތައް ނެތް ނަމަވެސް، ގައުމީ ފެންވަރުގެ ކުޅުންތެރިންނާ ދެކޮޅަށް ކުޅުމަށްޓަކައި ޓީމު އޮތީ ނަފްސާނީ ގޮތުންނާއި ޖިސްމާނީ ގޮތުން ވެސް ފުރިހަމައަށް ތައްޔާރުވެފައެވެ.
ފުރަތަމަ ޑިވިޝަނުން ދިއްދޫ ޖާގަ ކަށަވަރުކުރީ އާދަޔާ ހިލާފު މޮޅު ކުޅުމެއް ދެއްކުމަށް ފަހުގައެވެ. މިދިޔަ އަހަރު އެފްއޭއެމުން ފެށި އެޓޯލް ފުޓްބޯލް ޗެމްޕިއަންޝިޕްގެ އަތޮޅު ޗެމްޕިއަންކަން ހޯދުމަށް ފަހު، ނޯތު ރީޖަން ލީގު އެ ޓީމުން ކާމިޔާބުކުރީ ކުޅުނު އެއްވެސް މެޗަކުން ބަލިނުވެއެވެ. އޭގެ ފަހުން ޕްރިމިއަރ ލީގުގެ ކޮލިފައިންގައި ރާއްޖޭގެ ހަތަރު ސަރަހައްދުގެ ޗެމްޕިއަނުންނާ ވާދަކޮށް އެ ޓީމު ވަނީ ރާއްޖޭގެ އެންމެ މަތީ ފަންތީގެ ލީގުން ޖާގަ ހޯދާފައެވެ.
މި އަހަރުގެ ޕްރިމިއަރ ލީގު އަމިއްލަ ރަށާއި ރަށުން ބޭރުގައި ކުޅޭ ގޮތަށް ފަރުމާކޮށްފައިވާއިރު، ދިއްދޫގެ އަމިއްލަ ފަސްގަނޑުގައި ކުޅޭ ފުރަތަމަ މެޗު ތާވަލުކުރެވިފައި ވަނީ އަންނަ އޮކްޓޯބަރު މަހުގެ 10ވަނަ ދުވަހަށެވެ. އެ ދުވަހު ދިއްދޫ ނުކުންނާނީ ރާއްޖޭގެ އެންމެ ކާމިޔާބު އެއް ކްލަބް ކަމަށްވާ ނިއު ރޭޑިއަންޓް ސްޕޯޓްސް ކްލަބާ ދެކޮޅަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.