ދުނިޔޭގެ ފުޓްބޯޅައާ ބެހޭ އެންމެ މަތީ އިދާރާ (ފީފާ)ގެ ނިންމުންތައް ނިންމާ ގޮތް މުރާޖަޢާކުރުމަށް ރައީސް ޖިއާނީ އިންފަންޓީނޯ މެމްބަރު ޤައުމުތަކަށް ފޮނުއްވި ސިޓީއަކީ، ކުރިއަށް އޮތް އިންތިޚާބުން މޮޅުވުމުގެ ބޭނުމުގައި ކުޅުއްވި ސިޔާސީ ކުޅިގަނޑެއް ކަމަށް ޖަރުމަނު ފުޓްބޯޅަ އެސޯސިއޭޝަން ގެ ރައީސް ބާންޑް ނިއުއެންޑޯފް ވަރަށް ބޮޑަށް ފާޑުވިދާޅުވެއްޖެއެވެ.
ފީފާ ކައުންސިލްގައި ވެސް ހިމެނިވަޑައިގަންނަވާ ނިއުއެންޑޯފް ވިދާޅުވި ގޮތުގައި، އެ އިދާރާއަށް ހެޔޮ ބަދަލުތަކެއް ބޭނުންވެފައި އޮތް ނަމަވެސް، އެ މަސައްކަތުގައި އިސްކޮށް ހުންނެވުމުގެ އިތުބާރު އިންފަންޓީނޯއަށް މިހާރު ވަނީ ގެއްލިފައެވެ. މިއީ ވޯލްޑް ކަޕް ހިމެނޭހެން ފީފާގެ މުބާރާތްތަކުން ބައެއް ޕްރައިވެޓް ފަރާތްތަކަށް ވިއްކާލަން އުޅެ ނާކާމިޔާބުވުމުން، ގެއްލުނު ތާއީދު އަނބުރާ ހޯދުމަށް ފެއްޓެވި މަސައްކަތެއް ކަމަށް އޭނާ ތުހުމަތުކުރެއްވިއެވެ.
ފީފާގެ އާމްދަނީގެ ވިހި އިންސައްތަ އަމިއްލަ ކުންފުނިތަކަކަށް ދޫކޮށްލުމަށް އިންފަންޓީނޯ ގެންގުޅުއްވި ޚިޔާލު، ގަދަފަދަ އިންޒާރުތަކަކާ އެކު މިދިޔަ ޖުލައި މަހު ވަނީ ހުއްޓާލަން މަޖުބޫރުވެފައެވެ. ޔޫރަޕް، އޭޝިއާ އަދި ކޮންކާކަފް ސަރަޙައްދުގެ މައި ފުޓްބޯޅަ އިދާރާތަކުން ބުނެފައި ވަނީ، އެއްވެސް މަޝްވަރާއަކާ ނުލައި އިންފަންޓީނޯ ނިންމަވާ ނިންމެވުންތަކުގެ ސަބަބުން އޭނާއަށް އޮތް އިތުބާރު ގެއްލިއްޖެ ކަމަށާއި، ލީޑަރޝިޕް ބަދަލުކުރަން ޖެހިފައިވާ ކަމަށެވެ.
ނަމަވެސް، މެމްބަރު 211ގައުމަށް އިންފަންޓީނޯ ފޮނުއްވި ސިޓީގައި ވަނީ އެކުގައި ގުޅިގެން މަސައްކަތްކުރުމުގެ ރޫހެއް ގެންގުޅުއްވާނެ ކަމަށް ވިދާޅުވެފައެވެ. އަދި ފީފާގެ ހިންގުމާ މެދު ޚިޔާލު ތަފާތުވި ނަމަވެސް، އެއްވެސް ޤައުމަކަށް ލިބޭ ތަރައްޤީގެ އެހީތަކަށާއި ފީފާއިން ބާއްވާ ގުޅުމަށް އެއްވެސް ހީނަރުކަމެއް ނާންނާނެ ކަމުގެ ޔަޤީންކަން އޭނާ ވަނީ ދެއްވާފައެވެ.
އަންނަ އަހަރުގެ މާޗު މަހު ބާއްވާ ފީފާގެ ރިޔާސީ އިންތިޚާބާ ދިމާއަށް ދާއިރު، އިންފަންޓީނޯއާ ވާދަކުރާނެ ވަރުގަދަ ކެންޑިޑޭޓަކު ނެރުމަށް އިދިކޮޅު ފަރާތްތަކަށް ވަނީ ނުކުޅެދިފައެވެ. ވޯޓު ކާމިޔާބުކުރެއްވޭނެކަން ގާތްގަނޑަކަށް ކަށަވަރުވެފައިވުމާއެކު، އިންފަންޓީނޯއާ ދެކޮޅަށް މަސައްކަތްކުރާ ފަރާތްތަކުން މިހާރު މަސައްކަތްކުރަމުން ދަނީ އޭނާގެ ބާރުތައް ވީހާ ވެސް ކުޑަކުރެވޭނެ ގޮތްތަކެއް ހޯދުމަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.