ޖާގަދީ ޖަޕާނު ޓީމުން އެހެން ހޮޓާތަކަށް ބަދަލުވަނީ

ޖަޕާނުގެ އައިޗީ-ނަގޯޔާގައި މި މަހުގެ 19އިން އޮކްޓޫބަރު 4އަށް ކުރިއަށްދާ 20ވަނަ އޭޝިއަން ގޭމްސްގައި އެތުލީޓުން ބައިތިއްބާނެ ތަންތަނުގެ ދަތިކަން ބޮޑުވެ، އަންހެން އަދި ފިރިހެން ކުޅުންތެރިން އެއް ކޮޓަރިއެއްގައި ނިދަންޖެހުން ފަދަ މައްސަލަތަކާ ހުރެ ޖަޕާނުގެ ގައުމީ ޓީމުން އެހެން ހޮޓާތަކަކަށް ބަދަލުވާން ނިންމައިފިއެވެ.

މުބާރާތުގައި ބައިވެރިވާ 17،000އެއްހާ މީހުންނަށް ޚާއްސަ އެތުލީޓްސް ވިލެޖެއް ނެތުމުން، އިންތިޒާމުކުރާ ފަރާތުން ހަމަޖައްސާފައިވަނީ އިޓަލީގެ 4،000މީހުންގެ ޖާގައިގެ ކްރޫޒް ލައިނަރަކާއި 2،000މީހުންގެ ޖާގައިގެ ލަކުޑި ކޮންޓޭނަރުތަކެކެވެ. ނަމަވެސް، މީހުން ގިނަވުމުގެ ސަބަބުން ކޮޓަރިތައް ބެހުމުގައި އޮޅުންތަކެއް އަރައި، އަންހެން އަދި ފިރިހެން އެތުލީޓުން އެއް ކޮޓަރިއަކަށް ލުން ފަދަ ކަންކަން ވަނީ ހިނގާފައެވެ.

ޖަޕާނުގެ ޑެޕިއުޓީ ޗެފް ޑި މިޝަން ހިސާޝީ މިޒުޓޯރީ މައުލޫމާތު ދެއްވި ގޮތުގައި، ކްރޫޒް ޝިޕަށް ވަނުމަށް އެތައް ގަޑިއިރެއް ހޭދަވުމާއި ކާޑު އެކްޓިވޭޓް ނުވުން ފަދަ ޝަކުވާތައް ދަނީ ލިބެމުންނެވެ. އަދި ބޭސްފަރުވާގެ ސާމާނު ގެންގުޅޭ ޓްރެއިނަރުންނަށް ވެސް ޖާގައިގެ ދަތިކަން ވަރަށް ބޮޑަށް ވަނީ ކުރިމަތިވެފައެވެ.

މިފަދަ ހާލަތެއް އަތުވެދާނެކަމަށް ދުރާލާ ލަފާކޮށް، ޖަޕާނުގެ އޮލިމްޕިކް ކޮމިޓީން ވަނީ ސިޓީގެ އެހެން ހޮޓާތަކުން ކޮޓަރިތަކެއް ރިޒާވްކޮށްފައެވެ. މިޒުޓޯރީ ވިދާޅުވީ، ކަމާބެހޭ ފަރާތްތަކާ އެކު ކުރެވޭ މަޝްވަރާތަކުން މި މައްސަލަތަކަށް އަވަސް ހައްލެއް ނުލިބިއްޖެ ނަމަ، ޖަޕާނު ޓީމުގެ އެތުލީޓުން އެ ހޮޓާތަކަށް ބަދަލުކުރާނެ ކަމަށެވެ.

މި މައްސަލަ އުފެދެން މެދުވެރިވީ، އައު ކުޅިވަރުތަކެއް އިތުރުކުރުމުން ފުރަތަމަ އަންދާޒާކުރި 15،000މީހުންގެ ބަދަލުގައި ޖުމްލަ އަދަދު 17،000އަށް އެރުމުންނެވެ. އެހެންނަމަވެސް، އޮލިމްޕިކް ކައުންސިލް އޮފް އޭޝިއާ (އޯސީއޭ)އިން ވަނީ ހުރިހާ ބައިވެރިންނަށް ވެސް ތިބެވޭނެ އިންތިޒާމު ހަމަޖައްސައިދޭނެކަމުގެ ޔަގީންކަން ދީފައެވެ.