އޮލިމްޕިއާޑުގައި ޗެސް ޓީމުގެ އަމާޒަކީ ކެޓަގަރީން ރަން މެޑަލް

އުޒްބެކިސްތާނުގެ ސަމަރކަންޑްގައި މިހާރު ކުރިއަށްދާ 46ވަނަ ފިޑޭ ޗެސް އޮލިމްޕިއާޑްގައި ވާދަކުރާ ދިވެހިރާއްޖޭގެ ޤައުމީ ރާޒުވާ ޓީމުގެ އެންމެ ބޮޑު އަމާޒަކީ، ކުޅުންތެރިންގެ ރޭންކިން ކުރިއެރުވުމާ އެކު ވާދަކުރާ ކެޓަގަރީން ރަން މެޑެލް ހާސިލުކުރުން ކަމަށް ރާއްޖޭގެ އެންމެ މޮޅު ކުޅުންތެރިޔާ މުހައްމަދު ޝުޢާއު ހާމަކޮށްފިއެވެ.

މުބާރާތުގައި ބައިވެރިވުމަށް ފުރުމުގެ ކުރިން ދައުލަތުގެ މީޑިއާއަށް މަޢުލޫމާތު ދެމުން ޝުޢާއު ބުނީ، މި ފަހަރުގެ މުބާރާތާ ކުރިމަތިލީ ވަރަށް ދިގު މުއްދަތެއްގެ ފަރިތަކުރުންތަކަކަށް ފަހުގައި ކަމަށެވެ. އަދި އޯޕަން ކެޓަގަރީގައި ފިރިހެން ޓީމު ވާދަކުރާ "ޑީ"ކެޓަގަރީގެ އެއްވަނަ ހޯދުމަކީ މައިގަނޑު އަމާޒުކަން ފާހަގަކުރަމުން އޭނާ ބުނީ، ހުރިހާ ކަމެއް ރޭވިފައިވާ ގޮތަށް ކުރިއަށް ގޮސްފިނަމަ އެ ކާމިޔާބީ ލިބޭނެކަމުގެ ފުރިހަމަ ޔަޤީންކަން އެބައޮތް ކަމަށެވެ. މީގެ އިތުރުން މުބާރާތުގެ ތެރެއިން ކުޅުންތެރިންގެ އިންޑިވިޖުއަލް ރޭޓިން އިތުރުކުރުމަށް ވެސް ހާއްސަ އިސްކަމެއް ދޭނެކަމަށް އޭނާ ވަނީ ބުނެފައެވެ.

ދުނިޔޭގެ 200އެއްހާ ޤައުމަކުން 1800ކުޅުންތެރިންނާ އެކު ފަސް ކެޓަގަރީއަކަށް ބަހާލައިގެން ކުރިއަށްގެންދާ މި ބޮޑު މުބާރާތުގައި ރާއްޖެ ތަމްސީލުކުރަނީ 10ކުޅުންތެރިންގެ މައްޗަށް އެކުލެވޭ ސްކޮޑެކެވެ. ފެންވަރުގެ ގޮތުން އެންމެ މަތިން ފެށިގެން ދަށް ޤައުމުތަކަށް ކެޓަގަރީތައް ތަރުތީބުކޮށްފައިވާއިރު، ރާއްޖޭގެ އަންހެން ޓީމު ކުޅޭނީ "އީ"ކެޓަގަރީގައެވެ. ފުރަތަމަ މެޗުގައި އަންހެން ޓީމު މިސްރާ ދެކޮޅަށް ނުކުންނައިރު، ފިރިހެން ޓީމު ނުކުންނާނީ ޕޯޗުގަލްއާ ދެކޮޅަށެވެ. މިއަހަރުގެ މުބާރާތް ކުޅެމުންދަނީ ސިލްކް ރޯޑް ސަމަރކަންޑް ކޮމްޕްލެކްސްގައެވެ.

މީގެ ކުރިން 2023ވަނަ އަހަރު ބޭއްވި 45ވަނަ އޮލިމްޕިއާޑުގައި ވެސް ދިވެހި ޓީމުން ވަނީ ވިދާލާފައެވެ. އެފަހަރު ފިރިހެން ޓީމުން ކެޓަގަރީގެ ރަން މެޑެލް ހޯދިއިރު، އަންހެން ޓީމަށް މެޑެލް ގެއްލުނީ ކުޑަ ތަފާތަކުންނެވެ. ހަމައެހެންމެ، އެ މުބާރާތުގައި ދިވެހި ކުޅުންތެރިޔާ އީވާ ވަނީ 7ގޭމުން 7.5ސްކޯކޮށް، އެންމެ މަތީ ރޭޓިންއާއެކު ވިމެން ފިޑޭ މާސްޓަރ (ޑަބްލިއުއެފްއެމް)ގެ ޝަރަފުވެރި ލަޤަބު ހާސިލުކޮށްފައެވެ.