ސިޓީ މެޗުގައި ވީއޭއާރްއިން ބޮޑު ގޯހެއް ހެދިކަމުގެ އެއްބަސްވެއްޖެ

އިނގިރޭސި ޕްރިމިއަރ ލީގުގައި އޯލްޑް ޓްރަފޯޑްގައި މެންޗެސްޓަރ ޔުނައިޓެޑްގެ މައްޗަށް 1-0ގެ ނަތީޖާއަކުން މެންޗެސްޓަރ ސިޓީ ކުރިހޯދި މެޗުގައި އާލިންގ ހާލަންޑް ކާމިޔާބުކުރި ލަނޑު ރަނގަޅުކަމަށް ވީޑިއޯ އެސިސްޓަންޓް ރެފްރީ (ވީއޭއާރް)އިން ނިންމި ނިންމުމަކީ ގަވާއިދާ ޚިލާފަށް ހެދިފައިވާ ގޯހެއްކަން ރެފްރީންގެ މައި އިދާރާ، ޕްރޯ ރެފް އިން ކަށަވަރުކޮށްދީފިއެވެ.

މި މެޗުގެ ދެވަނަ ހާފުގެ 60ވަނަ މިނެޓުގައި ހާލަންޑް ގޯލުގެ ތެރެއަށް ބޯޅަ ފޮނުވާލުމާ އެކު މެޗުގެ ރެފްރީ ވަނީ އެއީ އޮފްސައިޑް ލަނޑެއްކަމަށް ފުރަތަމަ ނިންމާފައެވެ. އެހެންނަމަވެސް، ވީއޭއާރް މެދުވެރިކޮށް އެ މަންޒަރުތައް އަލުން މުރާޖަޢާކުރުމަށް ފަހު، އެއީ ސައްހަ ލަނޑެއްކަމަށް ނިންމައި ސިޓީއަށް ވަނީ ލީޑު ނަގައިދީފައެވެ.

މިކަމާ ގުޅިގެން ޕްރޯ ރެފްއިން އާންމުކުރި ރަސްމީ ބަޔާނެއްގައި ފާހަގަކޮށްފައި ވަނީ، ހަމަލާ އުފެއްދި ވަގުތު އޮފްސައިޑް މަގާމެއްގައި ހުރެ އެންޒޯ ފެނާންޑޭޒް ބޯޅައަށް ހަރަކާތްކޮށްފައިވާތީ، އޭގެ ސަބަބުން އިދިކޮޅު ޓީމުގެ ކުޅުމަށް ހުރަސްއެޅުނު މިންވަރު ވަޒަންކުރުމުގައި ވީއޭއާރް ފެއިލްވެފައިވާ ކަމަށެވެ. އެ އިދާރާއިން އިތުރަށް ބުނެފައިވާ ގޮތުގައި، ހާލަންޑް އޮންސައިޑުގައި ހުރި ނަމަވެސް، ފެނާންޑޭޒްގެ އަމަލުތައް ހުރިގޮތުން އެ ނިންމުން ބަދަލުކުރުމުގެ ކުރިން ދަނޑުމަތީގައި ހުރި މެއިން ރެފްރީ ލައްވައި އޮން-ފީލްޑް މޮނިޓަރުން އެ މަންޒަރު ބެލުވުމަށް ވީއޭއާރްއިން އިރުޝާދު ދޭންޖެހޭނެއެވެ.

މިފަދަ ބޮޑު އޮޅުމެއް އަރާފައިވާކަން ގަބޫލުކޮށް، ޕްރޯ ރެފްއިން ވަނީ މެޗު ނިމުމާއެކު މެންޗެސްޓަރ ޔުނައިޓެޑަށް އެކަން ރަސްމީކޮށް އަންގާފައެވެ. އަދި މި މައްސަލަ ވަރަށް ސީރިއަސް މައްސަލައެއްގެ ގޮތުގައި އިތުރަށް ތަހުގީގުކުރާނެކަމުގެ ޔަގީންކަން ވެސް ދީފައިވެއެވެ.

މި މައްސަލައިގައި މެންޗެސްޓަރ ޔުނައިޓެޑްގެ ކޯޗު މައިކަލް ކެރިކް ވަނީ ރެފްރީންގެ ނިންމުންތަކަށް ވަރަށް ބޮޑަށް ފާޑުކިޔާފައެވެ. މެޗަށް ފަހު އޮތް ޕްރެސް ކޮންފަރެންސްގައި ވާހަކަދައްކަމުން ކެރިކް ބުނީ، ޓެކްނޮލޮޖީގެ ގޮތުން ކުރިއަރާފައިވާ މި ޒަމާނުގައި، އެތައް ބަޔަކާއި ސްކްރީންތަކެއް ބޭނުންކޮށްގެން ވެސް މިފަދަ އާދައިގެ ގޯސްތައް ހެދުމަކީ ބަލައިގަނެވޭނެ ކަމެއް ނޫން ކަމަށާއި އެކަމާ މެދު އިންތިހާއަށް ކަންބޮޑުވާ ކަމަށެވެ.