މޫސުން ގޯސްވެ ނިއުއާއި ގައްދޫ ބައްދަލުކުރާ މެޗު ފަސްކޮށްފި

ދެކުނުގެ އަތޮޅުތަކަށް ކުރަމުންދާ ބޯ ވިއްސާރައިގައި ދަނޑުގައި ފެންބޮޑުވުމުގެ ސަބަބުން، ދިވެހި ޕްރިމިއަރ ލީގުގެ ތާރީޚުގައި މާލެއިން ބޭރުގައި ކުޅޭ ފުރަތަމަ މެޗުގެ ގޮތުގައި މިއަދު ހަވީރު ގދ. ގައްދޫގައި އެ ރަށުގެ ޓީމާއި ނިއުރޭޑިއަންޓް ސްޕޯޓްސް ކުލަބް ބައްދަލުކުރަން ތާވަލުކުރި މެޗު ފަސްކޮށްފިއެވެ.

އެފްއޭއެމުން ޕީއެސްއެމް ނިއުސްއަށް މައުލޫމާތު ދީފައިވާ ގޮތުގައި، ވިއްސާރައިގެ ސަބަބުން ކުޅޭނެ މާހައުލެއް ނެތުމުން މިއަދު 16:00ގައި ކުޅެން އޮތް މި މެޗު ފަސްކުރި ނަމަވެސް، މެޗު ދެން ކުޅޭނެ ވަކި ތާރީޚެއް އަދި ކަނޑައަޅާފައެއް ނުވެއެވެ. ނަމަވެސް އެ އިދާރާއިން މިހާރު އަންނަނީ މެޗު އަލުން ތާވަލުކުރުމާ ގުޅޭގޮތުން ކަމާ ބެހޭ ފަރާތްތަކާ އެކު މަޝްވަރާކުރަމުންނެވެ.

ރާއްޖޭގެ ފުޓުބޯޅަ އޮނިގަނޑަށް އެފްއޭއެމުން ގެނައި ބޮޑު ބަދަލާ އެކު، މިއީ ފުރަތަމަ ޑިވިޝަނުގެ މެޗެއް މާލޭގެ ގަލޮޅު ދަނޑު ފިޔަވައި އެހެން ރަށެއްގައި ކުޅެން ހަމަޖެހުނު ފުރަތަމަ ފަހަރެވެ. މި އައު ފޯމެޓްގެ ދަށުން އަތޮޅުތެރެއަށް ފުރުސަތު ހުޅުވާލުމާ އެކު ގައްދޫގެ އިތުރުން ހއ. ދިއްދޫއިން ވެސް ވަނީ މިއަހަރުގެ ފުރަތަމަ ޑިވިޝަނުން ޖާގަ ކަށަވަރުކޮށްފައެވެ. މި ޓީމުތަކުން އެ ޝަރަފު ހޯދީ އަތޮޅާއި، ޒޯން، އަދި ރީޖަނަލް މުބާރާތްތަކުގެ އިތުރުން މާލޭގައި ކުޅުނު ކޮލިފިކޭޝަން ބުރުން ވެސް ރަނގަޅު ނަތީޖާތަކެއް ނެރެގެންނެވެ.

ލީގުގެ ތާވަލު އެކުލަވާލާފައިވާ ގޮތުން ގައްދޫ ޓީމުގެ ފުރަތަމަ ތިން މެޗު ވެސް ކުޅުމަށް ހަމަޖެހިފައިވަނީ އެ ރަށުގެ އަމިއްލަ ދަނޑުގައެވެ. އެގޮތުން މި މަހުގެ 18ވަނަ ދުވަހު ކުލަބް އީގަލްސްއާ ދެކޮޅަށް ނުކުންނައިރު، އޭގެ ތިން ދުވަސް ފަހުން 21ވަނަ ދުވަހު އެޓީމު ބައްދަލުކުރާނީ ޓީސީ ސްޕޯޓްސް ކުލަބާއެވެ. ގައްދޫ ޓީމުން ގަލޮޅު ރަސްމީ ބޯޅަދަނޑުގައި ކުޅޭ ފުރަތަމަ މެޗުގައި އަންނަ މަހުގެ 9ވަނަ ދުވަހު ނުކުންނާނީ އޮޑި ސްޕޯޓްސް ކުލަބާ ދެކޮޅަށެވެ.