ތާރީޚީ ބޮޑެތި ބަދަލުތަކަކާ އެކު ދިވެހި ލީގު ފަށަނީ

ރާއްޖޭގެ ފުޓުބޯޅަ ކުރިއެރުވުމުގެ މަގުސަދުގައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އިން އަތޮޅުތެރޭގެ ޓީމުތަކަށް ވެސް ވާދަކުރެވޭ ގޮތަށް އޮނިގަނޑަށް ގެނައި ތާރީޚީ ބޮޑެތި ބަދަލުތަކާ އެކު، މިއަހަރުގެ ދިވެހި ޕްރިމިއަރ ލީގުގެ ކުޅުން މާދަމާ ފަށާނެއެވެ.

މިއަހަރުގެ މުބާރާތުގައި ފެނިގެންދާނެ އެންމެ ތާރީޚީ އަދި އެންމެ ބޮޑު ތަފާތަކީ، ހޯމް އެންޑް އަވޭ އުސޫލުގެ ދަށުން މާލެއިން ބޭރުގައި މުޅިން އަލަށް ލީގުގެ މެޗެއް ކުޅުމެވެ. އެގޮތުން އަތޮޅުތެރޭގައި ކުޅޭ ފުރަތަމަ މެޗު އޮންނާނީ މި މަހުގެ 11ވަނަ ދުވަހުގެ ހަވީރު ގދ. ގައްދޫގައެވެ. މި މެޗުގައި ވާދަކުރާނީ ގައްދޫ ސްޕޯޓްސް ކުލަބާއި ނިއުރޭޑިއަންޓް ސްޕޯޓްސް ކުލަބެވެ. ނަމަވެސް، މުބާރާތް ރަސްމީކޮށް ހުޅުވައިދޭ މެޗުގައި މި މަހުގެ 10ވަނަ ދުވަހުގެ ރޭ ބައްދަލުކުރާނީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ރަނަރަޕް އޮޑި ސްޕޯޓްސް ކުލަބެވެ.

ފާއިތުވި ސީޒަނުގައި ހަމައެކަނި މާލެއަށް ނިސްބަތްވާ 8 ކުލަބަކާ އެކު ލީގު ކުރިއަށްގެންދިޔަ ނަމަވެސް، މިފަހަރުގެ މުބާރާތުގައި ޖުމްލަ 10ޓީމު ވާދަކުރާނެއެވެ. އޭގެ ތެރޭގައި ހިމެނެނީ މާޒިޔާ، އޮޑި ސްޕޯޓްސް، ނިއުރޭޑިއަންޓް، ބުރު ސްޕޯޓްސް، ވިކްޓްރީ ސްޕޯޓްސް ކުލަބު، ޓީސީ ސްޕޯޓްސް ކުލަބު އަދި ކްލަބް އީގަލްސްގެ އިތުރުން އަލަށް ޕްރޮމޯޓުވި 3 ޓީމެކެވެ. އެއީ ދެވަނަ ޑިވިޝަނުގެ ޗެމްޕިއަންކަން ހޯދައިގެން ކޮލިފައިވި ބިސް ބުރު ސްޕޯޓްސް ކުލަބާއި، އުތުރުގެ ޗެމްޕިއަން ދިއްދޫ އަދި ދެކުނުގެ ޗެމްޕިއަން ގައްދޫއެވެ. 

މުޅި ރާއްޖެ ހަތަރު ސަރަހައްދަކަށް ބަހާލައިގެން، އަތޮޅު މުބާރާތްތަކުން ފެށިގެން ޒޯން އަދި ރީޖަނަލް ކޮލިފިކޭޝަން ކުޅުމަށްފަހު މާލޭގައި ބާއްވާ ކޮލިފައިންގައި ވާދަކޮށްގެން މައި ލީގުން ޖާގަ ލިބޭނެ އުސޫލެއް އެފްއޭއެމުން ކަނޑައެޅީ މިދިޔަ އަހަރުއެވެ. މި އައު ނިޒާމުގެ ދަށުން ރާއްޖޭގެ އެކި ކަންކޮޅުތަކުގައި ފުޓުބޯޅައިގެ ފޯރި އަލުން ގަދަވެ، ގިނަ ކުޅުންތެރިންތަކަކަށް ފުރުސަތު ފަހިވެގެންދާނެކަމަށް އެ އިދާރާއިން އުންމީދުކުރެއެވެ.