އިތުރު ދައުރަކަށް ވާދަކުރައްވާނެކަން އިންފަންޓީނޯ ތަކުރާރުކުރައްވައިފި

އަމިއްލަ ކުންފުނިތަކަކަށް ފީފާގެ މުބާރާތްތަކުގެ ހިއްސާ ވިއްކާލަން އުޅުއްވުމުން އަމާޒުވި ފާޑުކިޔުންތަކާ އެކު މަގާމުން އިސްތިއުފާ ދެއްވުމަށް ގޮވާލާފައި ވަނިކޮށް، އަންނަ އަހަރުގެ މާޗު މަހު އޮންނަ ފީފާގެ ރިޔާސީ އިންތިޚާބުގައި އިތުރު ދައުރަކަށް ޖިއާނީ އިންފަންޓީނޯ ވާދަކުރައްވާނެކަން އެ އިދާރާއިން ކަށަވަރުކޮށްދީފިއެވެ.

ދުނިޔޭގެ ފުޓުބޯޅައިގެ މައި އިދާރާގެ ތަރުޖަމާނަކު އާދީއްތަ ދުވަހު ވިދާޅުވީ، ރައީސްކަމުގެ މަގާމުގައި ހުންނެވި އިންފަންޓީނޯގެ ނިންމެވުމަށް އެއްވެސް ބަދަލެއް ނާންނަ ކަމަށާއި ކުރިއަށް އޮތް އިންތިޚާބުގައި އޭނާ ވާދަކުރައްވާނެ ކަމަށެވެ. ވޯލްޑް ކަޕާއި ފީފާގެ އެހެނިހެން މުބާރާތްތަކުގެ 20އިންސައްތަ ހިއްސާ އިންވެސްޓަރުންނަށް ވިއްކާލުމަށް މިދިޔަ ޖުލައި މަހު އޭނާ ގެންގުޅުއްވި ވިސްނުންފުޅު ނާކާމިޔާބުވެ، އެ ނިންމެވުން އަނބުރާ ގެންދަވަން ޖެހިވަޑައިގަތުމާ ގުޅިގެން ޔޫއެފާ، އޭއެފްސީ އަދި ކޮންކާކަފް ފަދަ ބޮޑެތި ފެޑެރޭޝަންތަކުން ވަނީ އޭނާގެ އިސްތިއުފާއަށް ގޮވާލާފައެވެ. 

މިފަދަ ބޮޑެތި ގޮންޖެހުންތަކަކާ ކުރިމަތިލައްވަން ޖެހިވަޑައިގަތް ނަމަވެސް، އުމުރުފުޅުން 56އަހަރުގެ އިންފަންޓީނޯއަށް ދެކުނު އެމެރިކާގެ އިތުރުން އެފްރިކާ ބައްރުގެ ފުޓުބޯޅަ އިދާރާތަކުގެ ފުރިހަމަ ތާއީދު އަދިވެސް އޮތްކަން ފާހަގަކުރެވެއެވެ. ތަރުޖަމާނު ނެރުއްވި ބަޔާނުގައި އިތުރަށް ވިދާޅުވެފައިވަނީ، 2027ވަނަ އަހަރުގެ އިންތިޚާބުގައި އޭނާ ވާދަކުރައްވާނެކަން މިދިޔަ އޭޕްރީލް މަހު ހާމަކުރައްވާފައިވާ ކަމަށާއި އެ ނިންމެވުމަށްވެސް ބަދަލެއް ނާންނާނެ ކަމަށެވެ.

ޕޮލެންޑުގައި މިހާރު ކުރިއަށްދާ 20އަހަރުން ދަށުގެ ވޯލްޑް ކަޕް ބައްލަވާލެއްވުމަށް ވަޑައިގެން އުޅުއްވަނިކޮށް، ފާއިތުވި ހަ ހަފުތާއެއްހާ ދުވަހު އުފެދިފައިވާ ހަލަބޮލިކަމާ ގުޅޭގޮތުން ނޫސްވެރިން ކުރި ސުވާލުތަކަށް އިންފަންޓީނޯ ވަނީ ސީދާ ޖަވާބެއް ދެއްވަން އުޒުރުވެރިވެވަޑައިގެންފައެވެ. ނަމަވެސް، ދައްކަވަން ހުރި ވާހަކަފުޅުތައް ގިނަ ކަމަށާއި، އެ ވާހަކަތައް ހާމަކުރައްވާނީ އެކަމަށް އެންމެ މުނާސަބު ވަގުތުގައި އަދި އެންމެ އެކަށީގެންވާ މާހައުލެއްގައި ކަމަށް އޭނާ ވިދާޅުވިއެވެ. މީގެ އިތުރުން، އަންނަ އަހަރު އޮންނަ އިންތިޚާބުގައި އިންފަންޓީނޯއާ ދެކޮޅަށް ވާދަކުރާނެ ކެންޑިޑޭޓަކު މިހާތަނަށް ރަސްމީކޮށް މައިދާނަށް ނުކުމެފައެއް ނުވެއެވެ.