ޖޫނިއަރ ވޯލްޑްކަޕަށް އިންފަންޓީނޯ ވަޑައިގަންނަވާނެ

ދުނިޔޭގެ ފުޓްބޯޅައިގެ މައި އިދާރާގެ ހިއްސާ ވިއްކާލުމަށް އުޅުއްވުމުން އަމާޒުވި ފާޑުކިޔުންތަކަށް ފަހު، ޕޮލެންޑްގެ ކަޓޮވިޗޭގައި މިއަދު ފަށާ 20އަހަރުން ދަށުގެ އަންހެނުންގެ ވޯލްޑް ކަޕްގެ ފުރަތަމަ މެޗު ޝަރަފުވެރިކޮށްދެއްވުމަށް ފީފާގެ ރައީސް ޖިއާނީ އިންފަންޓީނޯ ވަޑައިގަންނަވާނެއެވެ. 

ފީފާއިން އިންތިޒާމުކޮށްގެން ބާއްވާ ބައިނަލްއަގުވާމީ މުބާރާތްތަކުގެ ވިޔަފާރީގެ ރައިޓްސް 20ބިލިއަން ޑޮލަރަށް އަމިއްލަ ކުންފުނިތަކަކަށް ދިނުމަށް އިންފަންޓީނޯ ކުރެއްވި މަސައްކަތްޕުޅު ވަނީ ނާކާމިޔާބުވެފައެވެ. ޔޫރަޕްގެ ފުޓްބޯޅައިގެ މައި އިދާރާ (ޔުއެފާ)އާއި ފުޓްބޯޅައިގެ ނުފޫޒުގަދަ ފަރާތްތަކުގެ ބޮޑެތި ފިއްތުންތަކާ ހުރެ ނިމިދިޔަ ޖުލައި މަހު އެ މަޝްރޫއު ހުއްޓަވާލެއްވި ފަހުން، މިއީ ފީފާއިން ބާއްވާ ފުރަތަމަ ބޮޑު މުބާރާތެވެ.

ގިނަ ގޮންޖެހުންތަކަކާ ކުރިމަތިލައްވަން ޖެހިވަޑައިގެންފައިވީ ނަމަވެސް، މުބާރާތް ހުޅުވާ މެޗުގައި އިންފަންޓީނޯ އިންނަވާނެކަން ޕޮލެންޑްގެ ފުޓްބޯޅަ އިދާރާގެ ތަރުޖަމާނު ވަނީ ޔަގީންކޮށްދެއްވާފައެވެ. މިއަދު ކުޅުމަށް ހަމަޖެހިފައިވާ ފުރަތަމަ ދެ މެޗު ބަލާލުމަށް 15،000އެއްހާ ސަޕޯޓަރުން ދަނޑަށް ވަންނާނެކަމަށް އިންތިޒާމުކުރާ ފަރާތްތަކުން ލަފާކުރެއެވެ.

އަންހެނުންގެ ފުޓްބޯޅަ ކުރިއަރުވައި ޕްރޮމޯޓްކުރުމަށް މި މުބާރާތަކީ މުހިންމު ދައުރެއް އަދާކުރާ ޕްލެޓްފޯމެކެވެ. މީގައި ވާދަކުރާ ގިނަ ކުޅުންތެރިންގެ އެންމެ ބޮޑު އަމާޒަކަށް ވާނީ، މޮޅު ކުޅުމެއް ދައްކައިގެން އަންނަ އަހަރު ބްރެޒިލްގައި އޮންނަ ސީނިއާ ވޯލްޑް ކަޕްގެ ޖާގައެއް ކަށަވަރުކުރުމެވެ. މުބާރާތް ހުޅުވުމުގެ ގޮތުން ކަޓޮވިޗޭގައި މިއަދު ކުޅޭ މެޗުތަކުގައި ބައްދަލުކުރާނީ ޕޮލެންޑާއި އާޖެންޓީނާގެ އިތުރުން މެކްސިކޯ އަދި ބެނިންއެވެ.