އިންފަންޓީނޯއާ ވާދަކުރާނެ ކެންޑިޑޭޓަކު ނެރުމަށް ގޮވާލައިފި

ދުނިޔޭގެ ފުޓްބޯޅައިގެ މައި އިދާރާ، ފީފާގެ ހިންގުމުގެ އޮނިގަނޑަށް އިންގިލާބީ ބަދަލުތަކެއް ގެނެސް، އަންނަ އަހަރު އޮންނަ އިންތިޚާބުގައި މިހާރުގެ ރައީސް ޖިއާނީ އިންފަންޓީނޯއާ ވާދަކުރާނެ ކެންޑިޑޭޓަކު ކަނޑައެޅުމުގެ މަގުސަދުގައި، ނެދަލެންޑްސް ފުޓްބޯޅަ އެސޯސިއޭޝަނުން އަމްސްޓަރޑަމްގައި ބައިނަލްއަގުވާމީ ސަމިޓެއް ބޭއްވުމަށް ގޮވާލައިފިއެވެ.

ފީފާ އުފެއްދުމުގައި 1904ވަނަ އަހަރު އިސްދައުރެއް އަދާކުރި ނެދަލެންޑްސްގެ ފުޓްބޯޅަ އިދާރާއިން ނެރުނު ރަސްމީ ބަޔާނެއްގައި ހާމަކޮށްފައިވާ ގޮތުން، އިންފަންޓީނޯގެ ލީޑަރޝިޕަށް މިހާރު އެއްވެސް އިތުބާރެއް ނެތެވެ. އެ އިދާރާއިން ދެކޭގޮތުގައި 2027ވަނަ އަހަރާ ހަމައަށްދާއިރު ފީފާއަށް މުޅިން އައު ލީޑަރޝިޕެއް ބޭނުންވެއެވެ. ނަމަވެސް އެއީ ހަމައެކަނި ރައީސް ބަދަލުކުރުމުގެ ބަދަލުގައި، މުޅި މުއައްސަސާގެ ހިންގުމުގެ ނިޒާމު އަލުން ތަރުތީބުކުރެވިގެން އަންނަ ބަދަލަކަށް ވާންޖެހޭނެކަމަށް އެ ބަޔާނުގައި ބާރުއަޅާފައިވެއެވެ. 

އަންނަ އަހަރުގެ މާޗު މަހަށް ތާވަލުކުރެވިފައިވާ ފީފާގެ ރިޔާސީ އިންތިޚާބުގައި އިންފަންޓީނޯ ދެވަނަ ދައުރަކަށް ކުރިމަތިލައްވާއިރު، އޭނާއަށް އޮތް ތާއީދު ވަނީ ވަރަށް ބޮޑަށް ކުޑަވެފައެވެ. މީގެ މައިގަނޑު ސަބަބަކީ، ވޯލްޑް ކަޕް ފަދަ ޝަރަފުވެރި މުބާރާތްތަކުގެ ހިއްސާ އަމިއްލަ ވިޔަފާރިވެރިންނަށް ވިއްކާލުމަށް އޭނާ ގެންގުޅުއްވާ ވިސްނުންފުޅެވެ. މިކަމާ ގުޅިގެން ފުޓްބޯޅައިގެ ބޮޑެތި ބާރުތަކުން އަންނަނީ އޭނާއާ ދެކޮޅަށް ފިޔަވަޅުތަކެއް އެޅުމަށް ސިއްރިޔާތުގައި މަޝްވަރާކުރަމުންނެވެ.

އަމްސްޓަރޑަމްގައި ބޭއްވުމަށް ހުށަހަޅާފައިވާ "ފީފާގެ މުސްތަގުބަލާ ބެހޭ ބައިނަލްއަގުވާމީ ސަމިޓް"ގެ އެންމެ ބޮޑު އަމާޒަކީ އައު ރައީސަކު ހޮވުމުގެ ކުރިން ފީފާ ހިންގާނެ މޮޑެލްއެއް އެކުލަވާލުމެވެ. ނެދަލެންޑްސް އިން ފާހަގަކުރާ ގޮތުގައި، މިހާރު ފީފާގެ ނިންމުންތައް ނިންމުމުގެ ހުރިހާ ބާރެއް އޮންނަނީ ރައީސްގެ މުށުތެރޭގައެވެ. އަދި އިދާރީ ހިންގުމާއި ރައީސްގެ މަސްއޫލިއްޔަތުތަކާ ދެމެދު އެއްވެސް ހުރަހެއް ނެތުމަކީ ނިޒާމީ ގޮތުން އޮތް ބޮޑު މައްސަލައެއްކަމަށް އެ ގައުމުން ދެކެއެވެ.

ފީފާ އިސްލާހުކުރުމަށްޓަކައި މައިގަނޑު ތިން ކަމަކަށް ނެދަލެންޑްސްއިން ވަނީ ހުށަހަޅާފައެވެ. އޭގެ ތެރޭގައި، މުއައްސަސާގެ ޖަވާބުދާރީވުން އިތުރުކުރުމާއި، އިންސާނީ ހައްގުތަކާއި ތިމާވެއްޓާ ރައްޓެހި ތަރައްގީއަށް އިސްކަންދިނުމުގެ އިތުރުން، ގައުމުތަކުގެ މެދުގައި ގުޅުން ބަދަހިކުރުން ހިމެނެއެވެ. ހަމައެއާއެކު، ފީފާއަށް ލިބޭ ސާފު ފައިދާގެ 90އިންސައްތަ ފައިސާ، ސީދާ ފުޓްބޯޅަ ކުރިއެރުވުމުގެ މަޝްރޫއުތަކަށް އިންވެސްޓްކުރުމަށް ވެސް ވަނީ ޑިމާންޑުކޮށްފައެވެ.

އިންފަންޓީނޯ ދާދި ފަހުން ވިދާޅުވެފައިވަނީ އޭނާގެ އަމާޒަކީ މުއްސަނދި ގައުމުތަކާއި ފަގީރު ގައުމުތަކުގެ ފުޓްބޯޅައިގެ ފަރަގު ނައްތާލުން ކަމަށެވެ. އެހެންނަމަވެސް ނެދަލެންޑްސްގެ ފުޓްބޯޅަ އެސޯސިއޭޝަނުން ބުނެފައިވަނީ، އިސްލާހީ ބަދަލުތަކަކީ ހަމައެކަނި ޔޫރަޕުން ބޭނުންވެގެން އެހެން ބައްރުތަކަށް މަޖުބޫރުކުރާ ކަންތައްތަކަކަށް ވެގެން ނުވާނެކަމަށާއި، މިއީ ފީފާގެ 211މެމްބަރު ގައުމު ގުޅިގެން ނިންމަންޖެހޭ ނިންމުންތަކެއް ކަމަށެވެ. މީގެ އިތުރުން، ނެދަލެންޑްސް ނިސްބަތްވާ ޔޫރަޕުގެ މައި ފުޓްބޯޅަ އިދާރާ (ޔުއެފާ)އިން މިހާރު ވެސް ދަނީ ސްވިޒަލެންޑުގައި އިންފަންޓީނޯއާ ދެކޮޅަށް ކުރިއަށްދާ ޖިނާއީ ތަހުގީގަކަށް ބޭނުންވާ މައުލޫމާތު ހޯދުމަށް އެމެރިކާގެ ކޯޓުތައް މެދުވެރިކޮށް މަސައްކަތްކުރަމުންނެވެ.