ޗެމްޕިއަން ބާސެލޯނާއަށް އުނދަގޫ އިމްތިހާނަކަށް

ސްވިޓްޒަލަންޑުގެ ނިއޯންގައި މިއަދު ބޭއްވި ޔުއޭފާ ވިމެންސް ޗެމްޕިއަންސް ލީގުގެ ލީގު ފޭސް ގުރުއަތުލުމުގައި، މުބާރާތުގެ އެންމެ ފަހުގެ ޗެމްޕިއަން ބާސެލޯނާ ވާދަކުރަންޖެހޭ ޓީމުތަކުގެ ތެރޭގައި ޔޫރަޕުގެ ގަދަބާރުތައް ކަމަށްވާ އާސެނަލް އަދި ބަޔާން މިއުނިކް ހިމެނިއްޖެއެވެ. 

މިފަހަރުގެ މުބާރާތުގައި ޖުމްލަ 18ޓީމު ވާދަކުރާއިރު، ކޮންމެ ޓީމަކަށް ވެސް ލީގު ބުރުގައި 6ޓީމަކާ ދެކޮޅަށް ކުޅެން ޖެހޭނެއެވެ. އެގޮތުން ބާސެލޯނާގެ އަމިއްލަ ދަނޑުގައި ކުޅޭ މެޗުތަކުގައި ނުކުންނާނީ އާސެނަލް، ޕެރިސް އެފްސީ އަދި ސަރވެޓްއާ ދެކޮޅަށެވެ. އަދި ރަށުން ބޭރުގައި ބަޔާން މިއުނިކް، ރޯމާ އަދި އެޗްބީ ކޯގަރއާ ދެކޮޅަށް އެޓީމު ނުކުންނަން ޖެހޭނެއެވެ. 

މި ގުރުއަތުލުން ކުރިއަށް ގެންގޮސްފައި ވަނީ ބައިވެރިވި ޓީމުތައް ތިން ޕޮޓަކަށް ބަހާލައިގެންނެވެ. ކޮންމެ ޓީމަކުންވެސް ތިން މެޗު އަމިއްލަ ދަނޑުގައި އަދި އަނެއް ތިން މެޗު ރަށުން ބޭރުގައި ކުޅޭނެއެވެ. މިދިޔަ އަހަރުގެ ފައިނަލްގައި ބާސެލޯނާ އަތުން ބަލިވި އޮލިމްޕިކް ލިޔޯނަށްވެސް ވަނީ ފޯރިގަދަ މެޗުތަކެއް ލައްވާލާފައެވެ. އެގޮތުން ލިޔޯންގެ އަމިއްލަ ދަނޑުގައި ޗެލްސީ އާއި އިންޓަމިލާން އަދި ހާކެންއާ ދެކޮޅަށް ކުޅޭއިރު، ރަށުން ބޭރުގައި ނުކުންނާނީ އާސެނަލް، ޔުވެންޓަސް އަދި ސަރވެޓްއާ ދެކޮޅަށެވެ. ޕޮޓް އެކެއްގައި އޮތް ބަޔާން މިއުނިކް ވާދަކުރަންޖެހޭ ވަރުގަދަ ޓީމުތަކުގެ ތެރޭގައި ޕީއެސްޖީ، ރެއާލް މެޑްރިޑް އަދި މެންޗެސްޓަރ ސިޓީ ހިމެނެއެވެ. 

އިނގިރޭސިވިލާތުގެ ވިމެންސް ސުޕަރ ލީގުގެ ކްލަބްތަކަށް ބަލާއިރު، ޕޮޓް ތިނެއްގައި އޮތް އެންމެ ފަހުގެ ޗެމްޕިއަން މެންޗެސްޓަރ ސިޓީ ބައްދަލުކުރާނީ ޕީއެސްޖީ، ރެއާލް، އޮސްޓްރިއާ ވިއެން، ބަޔާން، ހާކެން އަދި އިންޓަމިލާނާއެވެ. އާސެނަލްގެ މެޗުތަކުގައި ލިޔޯން އަދި ބާސެލޯނާ ފަދަ ޓީމުތަކާ ދެކޮޅަށް ކުޅެން ޖެހޭއިރު، ޗެލްސީ ނުކުންނާނީ ޕީއެސްޖީ، ރޯމާ އަދި ލިޔޯން ފަދަ ކްލަބްތަކާ ދެކޮޅަށެވެ. 

މެޗުތައް ކުޅޭނެ ތާރީޚުތަކާއި ތަރުތީބު ކުރިއަށް އޮތް ހަފުތާބަންދުގައި ޔުއޭފާއިން އާންމުކުރާނެއެވެ. ލީގު ބުރުގެ ކުޅުން ފެށުމަށް ތާވަލުކޮށްފައިވަނީ އަންނަ ސެޕްޓެމްބަރު މަހުގެ 22އާއި 23ގައެވެ. އަދި ޑިސެމްބަރު 16ގެ ނިޔަލަށް ލީގު ފޭސް ކުރިއަށްދާނެއެވެ. ޕޯލެންޑުގެ ވެރިރަށް ވޯސޯގައި ކުޅުމަށް ހަމަޖެހިފައިވާ މި މުބާރާތުގެ ފައިނަލް މެޗު އޮންނާނީ އަންނަ އަހަރުގެ މެއި މަހުގެ ފަހުކޮޅުގައެވެ.