ފީފާގެ ރައީސް ޖިއާނީ އިންފަންޓީނޯ އިސްވެ ހުންނަވައިގެން ކުރިއަށްގެންދަން އުޅުނު 20ބިލިއަން ޑޮލަރުގެ އިންވެސްޓްމަންޓް ޕްލޭނަށް ދުނިޔޭގެ ފުޓްބޯޅައިގެ ތެރެއިން އައި ބޮޑު ފާޑުކިޔުންތައް ކުރިން އަންދާޒާކުރެވުނު ނަމަ، އެމެރިކާގެ މަޝްހޫރު ވެންޗަރ ކެޕިޓަލިސްޓް ޖޯޝް ކުޝްނަރގެ ކުންފުނި ކަމަށްވާ "ތުރައިވް"އިން އެކަމުގައި އެއްވެސް މިންވަރަކަށް ބައިވެރިނުވީސްކަން އޭނާ ހާމަކުރައްވައިފިއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ދަނބިދަރިފުޅު ޖެރެޑް ކުޝްނަރގެ ކޮއްކޮ، ޖޯޝް ނެރުއްވި ބަޔާނެއްގައި ވިދާޅުވީ، ފީފާގެ އައު އިންވެސްޓްމަންޓް ވިއުގަ "ފީފާ ފޯވާޑް އެންޓަޕްރައިޒް (އެފްއެފްއީ)"ގެ އަސާސްތައް ރަނގަޅު ނަމަވެސް، ފުޓްބޯޅައިގެ ތެރޭގައި އޮތް ސިޔާސީ ނުފޫޒުތަކާއި ކޯޅުންތަކުގެ ފުންމިން އެ ކުންފުންޏަށް ވަޒަންކުރެވިފައި ނެތް ކަމަށެވެ. މުބާރާތްތަކުގެ ހިއްސާ ވިއްކާލުމަށް އިންފަންޓީނޯ ގެންގުޅުއްވި މި ވިސްނުންފުޅު، ޔޫރަޕުގެ ފުޓްބޯޅަ އިދާރާ (ޔުއެފާ)އަދި އެހެނިހެން ފަރާތްތަކުގެ ހަރުކަށި ދެކޮޅުހެދުންތަކާ ހުރެ މިދިޔަ ޖުލައި މަހުގެ ފަހުކޮޅު ވަނީ ހުއްޓާލަން މަޖުބޫރުވެފައެވެ. ތުރައިވް އަކީ އަބަދުވެސް ގުޅިގެން މަސައްކަތްކުރާ ކުންފުންޏެއްކަން ފާހަގަކުރައްވައި ކުޝްނަރ ވިދާޅުވީ، މިކަން މިހާ ބޮޑު މައްސަލަގަނޑަކަށް ބަދަލުވާނެކަން އެނގުނު ނަމަ އެ ކުންފުނިން ދުރުގައި ތިބީސް ކަމަށެވެ.
މި މައްސަލައިގެ ހޫނުކަން ބޮޑުވެ، ސްވިޒަލެންޑުގައި އިންފަންޓީނޯއާ ދެކޮޅަށް ޖިނާއީ ތަހުގީގެއް ހިންގުމަށް ޔުއެފާއިން މިހާރު ދަނީ މަސައްކަތްކުރަމުންނެވެ. މިގޮތުން ފީފާއާއި ތުރައިވް ކުންފުނީގެ އިތުރުން އެހެނިހެން އިންވެސްޓަރުންނާ ދެމެދު ހިނގާފައިވާ މުއާމަލާތްތަކުގެ ލިޔެކިޔުންތައް ހޯދުމަށް ފްލޮރިޑާގެ ފެޑަރަލް ކޯޓެއްގައި ޔުއެފާއިން ވަނީ އެދިފައެވެ. ފީފާގެ 211މެމްބަރު ގައުމަށް އިންފަންޓީނޯ ފޮނުއްވި ސިޓީއެއްގައި ވާގޮތުން، މި ޕްލޭނުގެ އެންމެ ބޮޑު އިންވެސްޓަރަކީ ތުރައިވް ކެޕިޓަލްއެވެ.
މިކަމާ ގުޅިގެން އިންފަންޓީނޯ ފަހުން މާފަށް އެދިވަޑައިގެންފައިވީ ނަމަވެސް، ކުޝްނަރ އާއި އިންފަންޓީނޯވެސް ގަބޫލުކުރައްވާ ގޮތުގައި އެފްއެފްއީގެ އަސްލު މަގުސަދަކީ ފަގީރު ގައުމުތަކަށް ފުޓްބޯޅައިގެ މާލީ މަންފާ ހަމަހަމަކަމާއެކު ފޯރުކޮށްދިނުމެވެ. ކުޝްނަރ ފާހަގަކުރެއްވި ގޮތުގައި، މިހާތަނަށް ފުޓްބޯޅައިގެ އާމްދަނީ ބެހިގެންދަނީ ވަރަށް މަދު ގައުމުތަކެއްގެ މެދުގައެވެ. ނަމަވެސް މި ޕްލޭނުގެ ސަބަބުން ތަރައްގީވަމުން އަންނަ ގައުމުތަކަށް ބޮޑެތި އިންވެސްޓްމަންޓްތައް ލިބި، ގްރާސްރޫޓުން ފެށިގެން މުޅި ދުނިޔޭގައި ފުޓްބޯޅަ ކުރިއެރުވުމަށް މަގުފަހިވެގެން ދިޔައީސް ކަމަށް އޭނާ ވިދާޅުވިއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.