ކްރިކެޓް ބޯޑް އޮފް މޯލްޑިވްސް (ސީބީއެމް)އިން ރާއްޖޭގެ 16އަހަރުން ދަށުގެ ގައުމީ ކްރިކެޓް ޓީމަށް އިރުޝާދުދިނުމުގެ މުހިންމު ޒިންމާއާ، ތަޖުރިބާކާރު ކުޅުންތެރިޔާ ޝަފްރާޒް ޖަލީލް ހޯމަ ދުވަހު ރަސްމީކޮށް ހަވާލުކޮށްފިއެވެ.
އައު ކޯޗަށް މަގާމުގެ ލިޔުން ހަވާލުކުރުމަށް ސީބީއެމްގެ އޮފީހުގައި ބޭއްވި ހާއްސަ ރަސްމިއްޔާތެއްގައި އެ އިދާރާގެ ރައީސް މުހައްމަދު ފައިސަލްގެ އިތުރުން ނައިބު ރައީސް އަހުމަދު އިސްހާގު ބައިވެރިވެވަޑައިގަތެވެ. ގައުމީ ފެންވަރުގައްޔާއި ބައިނަލްއަގުވާމީ މުބާރާތްތަކުގައި ރާއްޖެ ތަމްސީލުކޮށްފައިވާ ޝަފްރާޒަކީ ކްރިކެޓްގެ މައިދާނުގައި ފާހަގަކޮށްލެވޭ ގިނަ ކާމިޔާބީތަކެއް ހޯދާފައިވާ ފަރާތެކެވެ.
ޝަފްރާޒްގެ ބެލުމުގެ ދަށުން ޒުވާން ޓީމު ފަރިތަކުރަން ފަށާއިރު، ކްރިކެޓް ބޯޑުގެ އެންމެ ބޮޑު އުއްމީދަކީ އޭނާގެ މުއްސަނދި ތަޖުރިބާގެ ބޭނުން ހިފައިގެން ރާއްޖޭގެ ޒުވާން ކުޅުންތެރިންނަށް ގިނަ ކުރިއެރުންތަކެއް ހޯދައިދިނުމެވެ. އަދި އާ ޖީލުގެ ކުދިން މި ކުޅިވަރަށް ޝައުގުވެރިކުރުވައި، ހުނަރުވެރި އާ ކުޅުންތެރިންތަކެއް އުފެއްދުމަކީ ވެސް އާ ކޯޗުގެ މައިގަނޑު އެއް އަމާޒެވެ. މީގެ އިތުރުން، އެކި އުމުރުފުރާތަކަށް ކޯޗުކޮށްދޭ ފަރާތްތަކަށް ބޭނުންވާ ފަންނީ ލަފަޔާއި އިރުޝާދު ދިނުމުގައި ވެސް ޝަފްރާޒް އިސް ދައުރެއް އަދާކުރާނެ ކަމަށް ސީބީއެމްއިން މައުލޫމާތުދެއެވެ.
މުޅި ރާއްޖެއަށް ކްރިކެޓް ފުޅާކުރުމުގެ ބޮޑު ތަސައްވުރެއް ސީބީއެމްއިން ގެންގުޅޭއިރު، އަތޮޅުތެރޭގައި ޔޫތު ޑިވެލޮޕްމަންޓް ޕްރޮގްރާމް (ވައިޑީޕީ)ތަކާއި ޖޫނިއާ މުބާރާތްތައް ދަނީ މެދުކެނޑުމެއްނެތި ހިންގަމުންނެވެ. މިފަދަ ހަރަކާތްތަކުގެ ތެރެއިން ފާހަގަކުރެވޭ ހުނަރުވެރި ކުދިން ހޯދައި، ގައުމީ ސްކޮޑުގެ ތަމްރީނުތަކުގައި ބައިވެރިކޮށްގެން އެ ކުދިންގެ ފެންވަރު މަތިކުރުމަށް އެ ބޯޑުން ހާއްސަ ސަމާލުކަމެއް ދެއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.