2023ވަނަ އަހަރުގެ ކުރިން ރާއްޖޭގައި ކްރިކެޓް ކުޅޭ އައު 50 ކުޅުންތެރިން އުފެއްދުމުގެ މަތިވެރި އަމާޒުގައި ކްރިކެޓް ބޯޑް އޮފް މޯލްޑިވްސް (ސީބީއެމް)އިން ހދ. ކުޅުދުއްފުށީގައި ދާދިފަހުން ފެށި ޔޫތު ޑިވެލޮޕްމަންޓް ޕްރޮގްރާމް "ސީޑްސް"އަށް އެ ރަށުގެ ސްކޫލްތަކުންނާއި ދަރިވަރުންގެ ފަރާތުން އާދަޔާޚިލާފު ބޮޑު ތަރުހީބެއް ލިބިއްޖެއެވެ.
މި ހަރަކާތާ ގުޅޭގޮތުން މައުލޫމާތު ހިއްސާކުރައްވަމުން ޕްރޮގްރާމްގެ ކޯޑިނޭޓަރު އިސްމާއީލް ނަޒްވާން ބަދީއު ވިދާޅުވީ، ކުޅުދުއްފުށީގެ ސްކޫލްތަކުގެ ފިޒިކަލް އެޑިއުކޭޝަން (ޕީއީ)ގަޑިތަކުގެ ތެރެއިން ދަރިވަރުންނަށް ކްރިކެޓް ކުޅިވަރު ތައާރަފުކޮށްދެވިފައިވާ ކަމަށެވެ. އެގޮތުން ކުދިންގެ ފަރާތުން މި ކުޅިވަރަށް ވަރަށް ބޮޑު ޝައުގުވެރިކަމެއް ފެނިގެންދިޔަ ނަމަވެސް، ޕީއީ ގަޑިއަށް ލިބޭ ދެ ގަޑިއިރުގެ ވަގުތު ކުޑަވުމަކީ ކުދިން ބޭނުންވި ވަރަށް ކުޅުމުގެ ފުރުސަތު ދިނުމަށް ދިމާވި އެންމެ ބޮޑު ގޮންޖެހުންކަމުގައި އޭނާ ފާހަގަކުރެއްވިއެވެ.
ސްކޫލްތަކުގެ ފުރިހަމަ އެއްބާރުލުމާ އެކު ކުރިއަށްދާ މި ޕްރޮގްރާމް ދެމެހެއްޓެނިވި ގޮތެއްގައި ހިންގުމަށްޓަކައި ކޮންމެ ސްކޫލަކުންވެސް ވަކި ހާއްސަ ސުޕަވައިޒަރެއް މިހާރު ވަނީ ކަނޑައަޅާފައެވެ. ސީބީއެމްގެ ފަރާތުން މި ފަރާތްތަކަށް ހާއްސަ އިނާޔަތެއް ދީގެން އިރުޝާދު ފޯރުކޮށްދެމުންދާއިރު، ތަމްރީނުތަކަށް ބޭނުންވާނެ އެންމެހާ އާލާތްތައް ކުޅުދުއްފުއްޓަށް ފޮނުވުމުގެ މަސައްކަތް ވެސް މިހާރު ދަނީ ކުރަމުންނެވެ. މީގެ އިތުރުން، މިއީ ވަކި ޖިންސަކަށް ތަފާތުކުރުމެއްނެތި ހިންގާ ހަރަކާތަކަށްވުމާ އެކު، އަންހެން ކުދިންގެ ބައިވެރިވުން ވެސް މި ޕްރޮގްރާމުގައި ފާހަގަކޮށްލެވޭ މިންވަރަކަށް ފެނިގެންދިޔަކަމަށާއި، މި ޕްރޮގްރާމުގެ ތެރެއިން މޮޅެތި ކުޅުންތެރިންތަކެއް އުފެދިގެންދާނެކަމަށް އުއްމީދުކުރައްވާކަމަށް ނަޒްވާން ވިދާޅުވިއެވެ.
ރާއްޖޭގެ ހުރިހާ ކަންކޮޅުތަކަކަށް ކްރިކެޓް ފުޅާކުރުމުގެ ބޮޑު މަޝްރޫއުގެ ދަށުން ލ. އަތޮޅާއި ޏ. ފުވައްމުލަކުގައިވެސް "ސީޑްސް"ޕްރޮގްރާމް އަންނަނީ ކާމިޔާބުކަމާއެކު ހިންގަމުންނެވެ. ސީބީއެމްގެ މިހާރުގެ އަމާޒަކީ މިއަހަރު ނިމުމުގެ ކުރިން ގދ. ތިނަދޫގައި ވެސް މި ޕްރޮގްރާމް ފެށުމެވެ. އެކަމަށް ޓަކައި ކަމާބެހޭ މުއައްސަސާތަކާއެކު ކުރަންޖެހޭ އެންމެހާ މަޝްވަރާތައް މިހާރު ކުރިއަށްދާކަމަށް އެ ބޯޑުން ވަނީ މައުލޫމާތުދީފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.