ޤައުމީ ކްރިކެޓް ޓީމުގެ މެނޭޖަރަކަށް އާރިފް

ފާއިތުވި ތިރީހަކަށް އަހަރު ކްރިކެޓުގެ މައިދާނުގައި ފާހަގަކޮށްލެވޭ ކާމިޔާބީތަކެއް ހޯދާފައިވާ ހުސައިން އާރިފް ރިޒާ، ދިވެހިރާއްޖޭގެ ޤައުމީ ކްރިކެޓް ޓީމުގެ މެނޭޖަރުގެ މަޤާމަށް ކްރިކެޓް ބޯޑް އޮފް މޯލްޑިވްސް (ސީބީއެމް)އިން އައްޔަންކޮށްފިއެވެ.

މަޤާމުގެ ލިޔުން އާރިފްއާ ހަވާލުކުރުމަށް ބޭއްވި ރަސްމިއްޔާތުގައި ސީބީއެމްގެ ނައިބު ރައީސް އަޙްމަދު އިސްޙާޤާއި އެ ބޯޑުގެ އިސްވެރިއެއް ކަމަށްވާ މުޙައްމަދު ފައިޞަލް ވަނީ ބައިވެރިވެވަޑައިގެންފައެވެ. މި އައްޔަންކުރުމާ ގުޅިގެން ސީބީއެމްއިން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ކުޅިވަރުގެ ދާއިރާގައި ގިނަ ދުވަސްތަކެއް ވަންދެން ހަރަކާތްތެރިވެފައިވާ ފަރާތެއްގެ އެހީތެރިކަން ލިބުމަކީ ޤައުމީ ޓީމަށް ލިބިގެންދާނެ ވަރަށް ބޮޑު ކުރިއެރުމެކެވެ. އަދި އާރިފްގެ ތަޖުރިބާގެ އަލީގައި ޓީމަށް އިތުރު ކާމިޔާބީތައް ލިބޭނެކަމަށް އުއްމީދުކުރާކަމަށް ވެސް އެ ބޯޑުން ބުނެފައިވެއެވެ.

މަޖީދިއްޔާ ސްކޫލުގެ ޓީމުން ވިދާލުމަށް ފަހު، ދިގު މުއްދަތެއްގައި ކްލަބް ލެވެލްގައި އާރިފް ވަނީ މޮޅު ކުޅުމެއް ދައްކާފައެވެ. މީގެ އިތުރުން ދިވެހި ވެޓެރަންސް ޓީމުގެ މުހިންމު ތަނބެއްގެ ގޮތުގައި އޭނާ އަދިވެސް އަންނަނީ ހަރަކާތްތެރިވަމުންނެވެ.

އާރިފްގެ ހުނަރުވެރިކަން އެންމެ ފަހުން ފެނިގެންގޮސްފައިވަނީ ތައިލޭންޑުގައި އޮތް "ހުއާ ހިން ސިކްސެސް"މުބާރާތުގައެވެ. ދިވެހި ވެޓެރަންސް ޓީމަށް ކުޅެމުން، އޭނާ ވަނީ މުޅި މުބާރާތުގެ އެންމެ މޮޅު ބެޓްސްމަންގެ މަޤާމު ކާމިޔާބުކޮށް، އޭނާގެ ފެންވަރު ސާބިތުކޮށްދީފައެވެ.