ކަރިންއަށް އެސޯސިއޭޝަންގެ ބޮޑު ތައުރީފެއް!

މާލޭގެ ޓެނިސް ކޯޓުގައި ނިމިގެންދިޔަ އައިޓީއެފް ޖޭ 30މުބާރާތުގައި ރާއްޖޭގެ އުއްމީދީ ކުޅުންތެރިޔާ އައިޝަތު ކަރިން ސައިޒާން ދައްކައިދިން މޮޅު ކުޅުމުގެ ސަބަބުން، ޓެނިސް އެސޯސިއޭޝަން އޮފް މޯލްޑިވްސްގެ ނައިބު ރައީސް އިގްނާޒް މަންސޫރު އޭނާއަށް ވަރަށް ބޮޑަށް ތައުރީފު ކުރައްވައިފިއެވެ.

މި މުބާރާތް ނިންމުމުގެ ރަސްމިއްޔާތަށް ފަހު މީޑިއާއަށް މައުލޫމާތު ދެއްވަމުން އިގްނާޒް ފާހަގަކުރެއްވި ގޮތުގައި، ރާއްޖޭގެ އެންމެ މަތީ ފަންތީގެ ގިނަ ކުޅުންތެރިންތަކަކަށް އަނިޔާގެ މައްސަލަތަކާ ކުރިމަތިލާންޖެހުމުގެ ސަބަބުން މިފަހަރުގެ މުބާރާތުގައި ދިވެހި ޓީމުގެ ނަތީޖާތައް ވަނީ މިދިޔަ އަހަރާ އަޅާބަލާއިރު ކޮންމެވެސް ވަރަކަށް ދަށްވެފައެވެ. ނަމަވެސް، މި ހާލަތުގައި ވެސް ކަރިން ހޯދި ނަތީޖާއަކީ މުޅި ރާއްޖެ ފަޚުރުވެރިވާފަދަ ބޮޑު ކާމިޔާބީއެއްކަމަށް އޭނާ ވިދާޅުވިއެވެ. އެގޮތުން، ޖެހިޖެހިގެން ދެ ހަފްތާވަންދެން ކުޅުނު ގްރޫޕް ސްޓޭޖުގެ ހުރިހާ މެޗަކުން މޮޅުވެ، މުބާރާތުގެ ކުއާޓާ ފައިނަލަށާއި ޑަބަލްސް އިވެންޓުގެ ސެމީ ފައިނަލަށް ކަރިން ދަތުރުކޮށްފައިވާކަން ނައިބު ރައީސް ވަނީ ޚާއްސަގޮތެއްގައި ފާހަގަކުރައްވާފައެވެ.

މިއީ ބައިނަލްއަޤްވާމީ ފެންވަރުގެ މިފަދަ ބޮޑު ޓެނިސް މުބާރާތެއް ދިވެހިރާއްޖޭގައި ބޭއްވި ދެވަނަ ފަހަރެވެ. އިގްނާޒް ހާމަކުރެއްވި ގޮތުގައި، މިދިޔަ މަހުގެ ސޯޅައިން ފެށިގެން ނަވާވީހުގެ ނިޔަލަށް ކުރިއަށްދިޔަ މި ހަރަކާތް ނިންމާލާފައިވަނީ ވަރަށް ފުރިހަމަ ކާމިޔާބީއަކާއެކުގައެވެ. ދެ ބަޔަކަށް ބަހާލައިގެން މާލޭގައި ކުރިއަށް ގެންދިޔަ އައިޓީއެފް ޖޭ ތިރީސް މުބާރާތުގައި ބައިވެރިވުމަށް ދުނިޔޭގެ 34 ޤައުމަކުން 300އަށް ވުރެ ގިނަ ކުޅުންތެރިން ޝައުޤުވެރިކަން ފާޅުކޮށްފައިވާކަމީ މުބާރާތަށް ލިބިފައިވާ ބޮޑު ތަރުހީބެއްކަން އޭނާ ފާހަގަކުރެއްވިއެވެ.

ދުނިޔޭގެ ޓެނިހުގައި ނަންހިނގާ ބޮޑެތި ބާރުތައް ކަމުގައިވާ އެމެރިކާ، ރަޝިއާ އަދި ޗައިނާގެ އިތުރުން ކެނެޑާ، އިންޑިއާ، ތައިލެންޑް އަދި އަވައްޓެރި ސްރީލަންކާ ފަދަ ޤައުމުތަކުގެ މޮޅެތި އެތުލީޓުން ވަނީ ރާއްޖޭގައި ބޭއްވި މި ޝަރަފުވެރި މުބާރާތުގައި ވާދަކޮށްފައެވެ.