ވަސީލަތްތައް ފުރިހަމަ ނަމަ ބޮޑެތި ކުރިއެރުންތަކެއް ލިބޭނެ: ކޯޗު

 އެކަށީގެންވާ އިންފްރާސްޓްރަކްޗަރ އާއި ފަރިތަކުރާނެ ރަނގަޅު ޕިޗެއް ލިބިއްޖެނަމަ، ދިވެހި ޓީމަކީ ބައިނަލްއަޤްވާމީ މައިދާނުގައި ފާހަގަކޮށްލެވޭ ފަދަ ކާމިޔާބު ޓީމަކަށް ހެދިދާނެކަމަށް ރާއްޖޭގެ ޤައުމީ ކްރިކެޓް ޓީމާ ދާދި ފަހުން ހަވާލުވި އަފްޣާނިސްތާނުގެ ތަޖުރިބާކާރު ކޯޗު އަސަދުﷲ ޚާން ބުނެފިއެވެ.

އައިސީސީ މެންސް ޓީ 20ރޭންކިންގެ 84ވަނައިގައި މިވަގުތު ރާއްޖެ އޮތް ނަމަވެސް، ކޯޗު ދެކޭގޮތުގައި ޓީމުގައި ތިބީ އުއްމީދީ އަދި ހުނަރުވެރި ކުޅުންތެރިންތަކެކެވެ. މެލޭޝިއާގައި ބޭއްވުމަށް ހަމަޖެހިފައިވާ މުބާރާތަކަށް މިހާރު ފަރިތަކުރުންތައް ކުރިއަށްގެންދާއިރު، ކުޅުންތެރިންގެ ފަރާތުން ފެންނަ ބުރަ މަސައްކަތަށް އޭނާ ވަނީ ތައުރީފުކޮށްފައެވެ. އަސަދުﷲ ފާހަގަކުރި ގޮތުގައި މި ކުޅުންތެރިންގެ ކިބައިގައި ހުރި ފެންވަރު ރަނގަޅު ހުނަރުތަކަށް ބޭނުންވަނީ އިތުރު ފުރިހަމަކަމެއް ގެނައުމަށްޓަކައި އެކަންކަން 'ޕޮލިޝް' ކުރުމެވެ.

ދިވެހި ޓީމަށް އިރުޝާދު ދިނުމުގެ ފުރުސަތު ލިބުމަކީ ބޮޑު އުފަލެއްކަމަށް ސިފަކުރަމުން، ކޯޗު ބުނީ ރޭންކިންގައި ރާއްޖެ ފަހަތުގައި އޮތުމަކީ ކުރިއަށް ނުދެވެންވީ ސަބަބެއް ނޫންކަމަށެވެ. ކްރިކެޓް ކުރިއެރުވުމަށް އޮތް އެންމެ ބޮޑު ގޮންޖެހުމަކީ ވަސީލަތްތަކުގެ ދަތިކަންކަން ފާހަގަކޮށް، ރަނގަޅު ފެންވަރުގެ ޕިޗެއްގެ މުހިންމުކަން އޭނާ ވަނީ ތަކުރާރުކޮށްފައެވެ. ވަސީލަތްތައް ޤާއިމުކުރެވިއްޖެ ނަމަ، ނަތީޖާ ނެރެވި، ޓީމުގެ ނަން ވިދާލާނެކަމުގެ ފުރިހަމަ ޔަގީންކަން އޭނާގެ އެބައޮތެވެ. އަދި ކުރިއަށް އޮތް މުބާރާތުން ރަނގަޅު ކާމިޔާބީތަކެއް ފެންނާނެކަމަށް އުއްމީދުކުރާކަމަށް ވެސް އޭނާ ބުންޏެވެ.

މިމަހުގެ ކުރީކޮޅު ޤައުމީ ޓީމާ ހަވާލުވި އަސަދުﷲ އަކީ ކްރިކެޓްގެ ދުނިޔޭގައި ފާހަގަކޮށްލެވޭ ގިނަ ކާމިޔާބީތަކެއް ހޯދާފައިވާ ފަރާތެކެވެ. އޭނާ ވަނީ އަފްޣާނިސްތާނުގެ ޤައުމީ ޓީމަށް ކުޅުމުގެ އިތުރުން އެ ޓީމަށް ކޯޗުކޮށްދީ ބޮޑެތި ކުރިއެރުންތަކެއް ހޯދައިދީފައެވެ. މީގެ އިތުރުން ކެނަޑާ ޓީމުގެ ހެޑް ކޯޗުކަމާއި ހައި ޕާފޯމަންސް ޑިރެކްޓަރުކަން، އަދި 2021އިން 2023އަށް ގަތަރު ޓީމުގެ ހެޑް ކޯޗުކަމުގެ އިތުރުން އުޒްބެކިސްތާންގެ ކްރިކެޓް ފެޑެރޭޝަންގެ ޑިރެކްޓަރުކަން ވެސް އޭނާ ވަނީ ކޮށްފައެވެ. އައިސީސީގެ މަތީ ލެވެލްތަކުގެ ކޯޗިން ސެޓްފިކެޓްތައް އޭނާ ވަނީ ހާސިލްކޮށްފައެވެ.