އިންފަންޓީނޯ ވަކިކުރުމަށް ގޮވާލާ ޕެޓިޝަނަކަށް ބޮޑު ތާއީދެއް!

ދުނިޔޭގެ ފުޓުބޯޅައިގެ މައި އިދާރާގެ ހިންގުން ހަރުދަނާކޮށް ދެފުށް ފެންނަ ނިޒާމެއް ޤާއިމުކުރުމަށް ބާރުއަޅައި އަދި ފީފާގެ ރައީސް ޖިއާނީ އިންފަންޓީނޯގެ އިސްތިއުފާއަށް ގޮވާލައި ޗޭންޖް.އޯގް ގައި ފަށާފައިވާ ބައިނަލްއަޤުވާމީ ޕެޓިޝަނަށް، ދުނިޔޭގެ ބޮޑެތި ފުޓުބޯޅަ ސަޕޯޓަރުންގެ ޖަމާޢަތްތަކުން ފުރިހަމައަށް ތާއީދުކޮށްފިއެވެ.

މި ހަރަކާތުގައި އެންމެ އިސްކޮށް އުޅެނީ ފުޓްބޯލް ސަޕޯޓަރސް ޔޫރަޕް (އެފްއެސްއީ)ކިޔާ ޖަމާޢަތަކުންނެވެ. އޭގެ އިތުރުން ފުޓްބޯލް ސަޕޯޓަރސް އެފްރިކާ އާއި އުތުރު އެމެރިކާގެ އިންޑިޕެންޑެންޓް ސަޕޯޓަރސް ކައުންސިލްގެ އިތުރުން، އެކިއެކި ޤައުމުތަކަށް ނިސްބަތްވާ އާންމު ސަޕޯޓަރުންގެ ގިނަ ނެޓްވޯކްތަކަކުން ވަނީ މި ލިޔުމުގައި ސޮއިކޮށް، އެމީހުންގެ އަޑު އުފުލާފައެވެ. 

ސަޕޯޓަރުންގެ ނުރުހުން އިންފަންޓީނޯއަށް އެންމެ ބޮޑަށް އަމާޒުވެފައި ވަނީ، ފީފާ ވޯލްޑް ކަޕްގެ ޙިއްޞާތަކެއް އަމިއްލަ ވިޔަފާރިވެރިންނަށް ވިއްކާލުމަށް ފާއިތުވި މަހު އޭނާ ހުށަހެޅުއްވި މައްސަލައާ ގުޅިގެންނެވެ. އެފްއެސްއީން ސިފަކުރާ ގޮތުގައި ފުޓުބޯޅައަކީ މުޅި މުޖުތަމަޢުގެ މަންފާއާ ގުޅިފައިވާ ކުޅިވަރަކަށް ވާއިރު، މަދު އިންވެސްޓަރުންތަކެއްގެ މާލީ ފައިދާއަށްޓަކައި މުޅި ކުޅިވަރުގެ އަގު ވައްޓާލުމަކީ ބަލައިގަނެވޭނެ ކަމެއް ނޫނެވެ.

ޕެޓިޝަންގައި ބަޔާންކޮށްފައިވާ ގޮތުން، ދުނިޔޭގެ އެންމެ ބޮޑު ފުޓުބޯޅަ މުބާރާތް ޕްރައިވެޓް ފަރާތްތަކަށް ވިއްކާލަން އުޅުމަކީ ފުޓުބޯޅައަށް ވެވޭ ވަރަށް ބޮޑު ޚިޔާނާތެކެވެ. ފީފާގެ އެންމެ އިސްވެރިޔާގެ މަޤާމުގެ ނުފޫޒު ނަހަމަ ގޮތުގައި ބޭނުންކުރުން ހުއްޓުވައި، އެ އިދާރާއާމެދު ގެއްލިފައިވާ އިތުބާރު އަލުން ހޯދުމަށް މިއީ މަސައްކަތް ފަށަންވީ ވަގުތުކަމަށްވެސް އެ ލިޔުމުގައި ބުނެފައިވެއެވެ. 

މި ފިޔަވަޅު އަޅާފައިމިވަނީ، އިންފަންޓީނޯގެ މައްޗަށް އިތުބާރު ނެތްކަމުގެ ވޯޓެއް ނެގުމަށް ބައެއް ބައްރުތަކުގެ ފުޓުބޯޅަ ފެޑެރޭޝަންތަކުން މަސައްކަތް ކުރަމުންދާ ދަނޑިވަޅެއްގައެވެ. ސަޕޯޓަރުންގެ ޖަމާޢަތްތަކުން ގޮވާލަމުންދަނީ ހަމައެކަނި ރައީސް ބަދަލުކުރުމުގެ ބަދަލުގައި، ފީފާގެ ނިންމުންތައް ނިންމާ މަރުޙަލާތައް ހާމަކަން ބޮޑު ގޮތެއްގައި ކުރިއަށްގެންދިއުމަށާއި، އިސް ފަރާތްތަކަށް އޮންނަ ބާރުތައް ވަކި ޙުދޫދެއްގެ ތެރޭގައި ހިފެހެއްޓޭނެ ހަރުދަނާ އުޞޫލުތަކެއް ތަޢާރަފުކުރުމަށެވެ. 

ފީފާގެ މިހާރުގެ އޮނިގަނޑު އޮތްގޮތުން ޖަވާބުދާރީވުމުގެ ފުރުޞަތު ހަނިވެފައިވާކަން ފާހަގަކޮށް، އަންނަން އޮތް ޖީލުތަކަށް މި ކުޅިވަރު ސަލާމަތްކޮށްދިނުމަށް ޓަކައި ކަމާބެހޭ ހުރިހާ ފަރާތްތަކެއް ގުޅިގެން ހިންގުމުގެ އައު ނިޒާމެއް ޤާއިމުކުރުމަކީ ކޮންމެހެން ކުރަންޖެހޭ ކަމެއްކަމަށް ވެސް ޕެޓިޝަންގައި ފާހަގަކޮށްފައިވެއެވެ.