ޓީމު ވަރުގަދަކުރަން އައު ކުޅުންތެރިން މުހިންމު: ކެރިކް

އިނގިރޭސި ޕްރިމިއަރ ލީގުގެ ތައްޓަށް ވާދަކުރެވޭ ފެންވަރަށް މެންޗެސްޓަރ ޔުނައިޓެޑްގެ ސްކޮޑު ތައްޔާރުކުރުމަށް ޓަކައި، ޓްރާންސްފަރ ބާޒާރުން އިތުރު ކުޅުންތެރިންތަކެއް ގެނައުން މުހިންމުކަމަށް އެ ކްލަބުގެ ދާއިމީ ކޯޗު މައިކަލް ކެރިކް ބުނެފިއެވެ.

މިހާތަނަށް ކްލަބުން ކޮށްފައިވާ ވިޔަފާރިތަކާމެދު ހިތްހަމަޖެހޭކަން ފާހަގަކުރަމުން، ކެރިކް ބުނީ ޔުނައިޓެޑްގައި މިހާރު ވެސް މަތީ ފެންވަރުގެ ގިނަ ކުޅުންތެރިންތަކެއް އެބަތިބި ކަމަށެވެ. އެހެން ނަމަވެސް، ލީގުގެ އެންމެ ކުރީގައި ވާދަކުރާ ނަމަ ޓީމުގެ ފެންވަރު އިތުރަށް މަތިކުރަންޖެހޭކަމަށާއި، އައު ކުޅުންތެރިން ހޯދުމުގެ މަސައްކަތް ކްލަބުގެ މެނޭޖްމަންޓުން މިހާރު ވެސް ކުރަމުން އަންނަކަމަށް އޭނާ ހާމަކުރިއެވެ.

މި ފަހަރުގެ ސީޒަނަށް ޔުނައިޓެޑުން ގެނެސްފައިވަނީ 85މިލިއަން ޕައުންޑުގެ އަގަކަށް އަންޑްރޭ ސަންޓޯސް، ޔޫރީ ޓިއެލެމަންސް އަދި ކާރލް ޑާލޯއެވެ. ލީގުގެ ގަދަ ބާރުތައް ކަމަށްވާ އާސެނަލް، ޗެލްސީ އަދި މެންޗެސްޓަރ ސިޓީގެ އިތުރުން، އަލަށް ޕްރޮމޯޓްވި އިޕްސްވިޗް ޓައުން އަދި ކޮވެންޓްރީ ސިޓީއާ އަޅާބަލާއިރު ވެސް މިއީ ނިސްބަތުން ވަރަށް ކުޑަ ހޭދައެކެވެ. މީގެ އިތުރުން، ޔުނައިޓެޑްގެ ތާރީޚުގައި ވެސް އެންމެ ބޮޑު އަގެއް ދީފައި ގަތް ކުޅުންތެރިއަކީ 2016ވަނަ އަހަރު 89.5މިލިއަން ޕައުންޑަށް ގެނައި ޕޯލް ޕޮގްބާއެވެ.

އެހެން ކްލަބްތަކާ ޚިލާފަށް ޔުނައިޓެޑުން ކުޅުންތެރިން ގަތުމަށް ބޮޑެތި ހޭދަތައް ނުކުރާ ސަބަބު ސީދާ ބުނަން ނޭނގުނު ކަމުގައިވިޔަސް، ކުޅުންތެރިން ގެނައުމުގެ ކަންކަން ހަރުދަނާކުރުމަށް މަސައްކަތްކުރަމުންދާކަމަށް ކެރިކް ބުންޏެވެ. ރުބެން އަމޮރިމްގެ ބަދަލުގައި މިދިޔަ ސީޒަނުގައި ވަގުތީ ކޯޗެއްގެ ގޮތުގައި ޓީމާ ހަވާލުވެ، ލީގުގެ ތިންވަނަ މަގާމު ޔުނައިޓެޑަށް ހޯދައިދިނުމުން، ކެރިކް ވަނީ އެ ކްލަބުގެ ދާއިމީ ކޯޗުގެ މަގާމަށް އައްޔަންކޮށްފައެވެ.

މަދު ކުޅުންތެރިންތަކަކާ އެކު ވެސް ޔުނައިޓެޑްގެ ކުޅުންތެރިންނާއި ކޯޗު ތިބީ މި ސީޒަނުގައި އާސެނަލްގެ އަތުން ލީގު ޗެމްޕިއަންކަން އަތުލެވޭނެކަމުގެ ފުރިހަމަ ޔަގީންކަމުގައެވެ. ކެރިކް ވަނީ ލީގު ކާމިޔާބުކުރާނެކަމަށް ސީދާ ބުނަން ނޭނގުނު ނަމަވެސް، ލީގު ހޯދުމަށް ފަހު ވަގުތާ ޖެހެންދެން ވެސް ޔުނައިޓެޑުން ވާދަކުރާނެކަމުގެ ޔަގީންކަން ސަޕޯޓަރުންނަށް ދީފައެވެ.