ޗެލްސީ ދޫކޮށް ޗަލޮބާ ކޯމޯއާ ގުޅިއްޖެ

އިނގިރޭސިވިލާތަށް އުފަން އުމުރުން 27އަހަރުގެ ޑިފެންޑަރު ޓްރެވާ ޗަލޮބާ، 30މިލިއަން ޕައުންޑުގެ ޓްރާންސްފާ ފީއެއްގެ ދަށުން ފަސް އަހަރު ދުވަހުގެ އެއްބަސްވުމެއްގައި އިޓަލީގެ ކޯމޯއަށް ބަދަލުވެއްޖެއެވެ. 

ފާއިތުވި ޖޫން މަހުން ފެށިގެން ޗަލޮބާ ހޯދުމަށް ކޯމޯއިން ކުރަމުންދިޔަ މަސައްކަތް ކާމިޔާބުވެފައިވާއިރު، މި ވިޔަފާރީގެ ދަށުން ޗެލްސީއަށް ފުރަތަމަ 25.7މިލިއަން ޕައުންޑު ލިބޭނެއެވެ. އަދި ބާކީ 5.1މިލިއަން ޕައުންޑު ހަމަޖެހިފައިވަނީ އެޑްއޮންސްގެ ގޮތުގައި ފަހުން ދައްކާ ގޮތަށެވެ. ކޯމޯއަކީ ކުރިއަށް އޮތް ފުޓުބޯޅަ ސީޒަނުގެ ޔޫއެފާ ޗެމްޕިއަންސް ލީގުގެ ކޮލިފައިންގް ޖާގައެއް މިހާރު ވެސް ކަށަވަރުކޮށްފައިވާ ކްލަބެކެވެ.

ކޯމޯއަށް މިހާރު އިރުޝާދުދެމުން އަންނަނީ ޗެލްސީ އަދި އާސެނަލްގެ ކުރީގެ މަޝްހޫރު ކުޅުންތެރިޔާ ސެސް ފެބްރިގާސްއެވެ. ފެބްރިގާސް ބުނި ގޮތުގައި، ޗަލޮބާއަކީ އެންމެ މަތީ ފަންތީގައި ކުޅުމުގެ ފުރިހަމަ ތަޖުރިބާ ލިބިފައިވާ، އަދި ކުރިއަށް އޮތް ތަނުގައި ޓީމަށް ވަރަށް މުހިންމު ދައުރެއް އަދާކުރާނެ ކުޅުންތެރިއެކެވެ. ފާހަގަކޮށްލެވޭ ގޮތުގައި، ފެބްރިގާސް ޗެލްސީއަށް ކުޅުނު ދުވަސްވަރު ޗަލޮބާ ވަނީ އޭނާއާ އެކު އެއް ޓީމަކަށް ކުޅެފައެވެ.

އުމުރުން އެންމެ ހަތް އަހަރުގައި ޗެލްސީގެ އެކަޑަމީއާ ގުޅުނު ޗަލޮބާވަނީ ވޭތުވެދިޔަ ވިހި އަހަރު އެ ކްލަބުގައި ހޭދަކޮށްފައެވެ. އޭނާވަނީ ޗެލްސީގެ ސީނިއާ ޓީމަށް 151މެޗު ކުޅެދީ، ފަސް މުބާރާތުގެ ތަށި އެ ކްލަބާއެކު އުފުލާލާފައެވެ. މީގެ އިތުރުން، ނިމިދިޔަ ވޯލްޑް ކަޕްގައި ވާދަކުރި އިންގްލެންޑުގެ ގައުމީ ސްކޮޑުން ފަހު ވަގުތު ޖާގަ ހޯދައި، އޭނާވަނީ ގައުމީ ޓީމަށް ވެސް ދެ މެޗު ކުޅެދީފައެވެ.