އުރުގުއޭގެ ކޯޗަކަށް ލެޖެންޑް ފޯލާން

މާސެލޯ ބިއެލްސާގެ ބަދަލުގައި، އުރުގުއޭގެ ސީނިއާ އަދި 20އަހަރުން ދަށުގެ ގައުމީ ފުޓުބޯޅަ ޓީމަށް އިރުޝާދުދިނުމުގެ ޒިންމާއާ އެ ގައުމުގެ ތާރީޚީ ކުޅުންތެރިޔާ ޑިއޭގޯ ފޯލާން ރަސްމީކޮށް ހަވާލުވެއްޖެއެވެ.

2026ވަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުން މޮޅެއް ނުލިބި އުރުގުއޭ މުބާރާތާ އަލްވަދާއު ކިޔަންޖެހުމާ ގުޅިގެން، އޭރު ހުރި ކޯޗު ބިއެލްސާ ވަނީ މަގާމުން ވަކިވެފައެވެ. އެއާއެކު، މެންޗެސްޓަރ ޔުނައިޓެޑާއި، އިންޓަރ މިލާން އަދި އެތުލެޓިކޯ މެޑްރިޑަށް ކުރިން ކުޅުނު އުމުރުން 47އަހަރުގެ ފޯލާން ވަނީ ފާއިތުވި ޖުލައި މަހުގެ ތެރޭގައި ވަގުތީގޮތުން ޓީމާ ހަވާލުވެފައެވެ. އުރުގުއޭގެ ފުޓުބޯޅަ އެސޯސިއޭޝަނުން މިހާރު އޭނާއަށް ދާއިމީ ކޯޗުކަން ދީފައިވާއިރު، ފޯލާންގެ މަސައްކަތް އެންމެ ފުރަތަމަ ފަށާނީ 20އަހަރުން ދަށުގެ ޓީމުންނެވެ.

އެ ގައުމުގެ ފުޓުބޯޅަ އިދާރާއިން ނެރުނު ބަޔާނެއްގައި ސިފަކޮށްފައިވާ ގޮތުން، މިއީ ފޯލާން އޭނާގެ އަމިއްލަ ގެއަށް އައުން ފަދަ ކަމެކެވެ. 2010ވަނަ އަހަރުގެ ވޯލްޑް ކަޕްގެ އެންމެ މޮޅު ކުޅުންތެރިޔާގެ މަގާމު ހޯދި ފޯލާންއަކީ މުޅި ގައުމު ފަޚުރުވެރިވާ ފަދަ ނަމޫނާ ޝަޚްސިއްޔަތެއް ކަމަށާއި، އޭނާގެ ފުން ތަޖުރިބާއާއި ފަންނީ މައުލޫމާތު އަދި ލީޑަރޝިޕް ގައުމީ ޓީމަށް މިހާރު ލިބިގެންދާނެ ކަމަށް އެ އެސޯސިއޭޝަނުން ފާހަގަކުރިއެވެ.

ކޮންޓްރެކްޓް ހަމަވުމުން އާޖެންޓީނާގެ ބިއެލްސާ ޓީމާ ދުރަށް ދިޔައީ، ހުނަރުވެރި ކުޅުންތެރިން ތިބި ނަމަވެސް އެކަށީގެންވާ ގޮތެއްގައި ޓީމު ރާވައިލެވިފައި ނުވާކަމަށް އިއުތިރާފުވުމަށްފަހުއެވެ. މީގެ އިތުރުން އޭނާއާއި ބައެއް ކުޅުންތެރިންނާ ދެމެދު މުބާރާތުގެ ތެރޭގައި މައްސަލަތަކެއް އުޅުނުކަމަށް ވެސް ރިޕޯޓުތައް ބުނެއެވެ. ބިއެލްސާ ދިއުމުން، އުރުގުއޭގެ ފުޓުބޯޅަ އަލުން ކޮޅަށް ޖެހުމުގެ ބޮޑު ޒިންމާއެއް މިހާރު އޮތީ ފޯލާންގެ ކޮނޑުގައެވެ.

ގައުމީ ޓީމަށް 112މެޗު ކުޅެދީ، 2011ގެ ކޮޕާ އެމެރިކާ ކާމިޔާބުކޮށްދިން ފޯލާން ކުޅުމާ ދުރަށް ދިޔައީ 2019ގައެވެ. އޭގެ ފަހުން އޭނާ ވަނީ ޕެނަރޯލް އަދި އަތެނަސް ފަދަ ކްލަބްތަކަށް ކޯޗުކޮށްދީފައެވެ. ކުރިއަށް އޮތް ސެޕްޓެމްބަރުން ފެށިގެން ނޮވެމްބަރުގެ ނިޔަލަށް ކުޅޭ ބައިނަލްއަގުވާމީ އެކުވެރިކަމުގެ މެޗުތައް ވެގެންދާނީ ފޯލާންގެ ފުރަތަމަ އިމްތިހާނަށެވެ.