ހިފަހައްޓައިފައިވާ ފައިސާ ފީފާއިން އުރުދުންއަށް ދޫކޮށްފި

ޖޯޑަން ފުޓްބޯޅަ އެސޯސިއޭޝަނުގެ ރައީސް ޕްރިންސް އަލީ ބިން ހުސައިން، ފީފާގެ ރައީސް ޖިއާނީ އިންފަންޓީނޯއަށް ކުރެއްވި ބްލެކްމެއިލްގެ ތުހުމަތުތަކާ ގުޅިގެން، އަރަބް ކަޕުގައި އުރުދުންގެ ޓީމަށް ލިބެންޖެހި، ނުލިބި ގިނަ ދުވަސްތަކެއްވެފައިވާ ފައިސާގެ އިނާމު ދުނިޔޭގެ ފުޓްބޯޅައިގެ މައި އިދާރާއިން ކުއްލި ގޮތަކަށް ދޫކޮށްފިއެވެ.

ޕްރިންސް އަލީ ވިދާޅުވި ގޮތުގައި، މިދިޔަ އަހަރުގެ ޑިސެމްބަރު މަހު ގަތަރުގައި އޮތް އަރަބް ކަޕުގެ ފައިނަލަށް ދަތުރުކުރުމުން އުރުދުންގެ ކުޅުންތެރިންނާއި އޮފިޝަލުންނަށް ހައްގުވާ މި ފައިސާ ލިބުނީ، ފީފާއަށް އަމާޒުކޮށް އޭނާ ވަރުގަދަ ފާޑުކިޔުންތަކެއް ވިދާޅުވިތާ ދެ ދުވަސް ފަހުންނެވެ. އޭނާ ވަނީ، އިންފަންޓީނޯ ވޯލްޑް ކަޕްގެ ހިއްސާއެއް ވިއްކާލުމަށް ގެންގުޅުއްވި ޚިޔާލަށް ތާއީދު ހޯދުމުގެ ބޭނުމުގައި، އުރުދުންގެ ފުޓްބޯޅައަށް މާލީ އެހީތެރިކަން ފޯރުކޮށްދިނުމަށް ފީފާއިން ހުށަހެޅިކަމަށް ތުހުމަތުކުރައްވާފައެވެ.

މީސްމީޑިއާގެ މަންސަ"އެކްސް"ގައި ކުރެއްވި ޕޯސްޓެއްގައި ޕްރިންސް އަލީ ވަނީ، އަށް މަސްދުވަހުގެ ލަސްވުމަކަށްފަހު ކުއްލިއަކަށް ފައިސާ ފޮނުވައިދިނީތީ ފީފާއަށް ޝުކުރު އަދާކުރައްވާފައެވެ. އަދި ވޯލްޑް ކަޕްގެ ތެރެއިން ފީފާގެ އިސްވެރިން، އިންފަންޓީނޯއަށް ތާއީދުކުރުމަކީ މާލީ އެހީ ހޯދުމަށް އޮތް މަގުކަމަށް ދޭހަވާ ފަދަ މޭރުމަކުން ވާހަކަދައްކަވާފައިވާކަން އޭނާ ފާހަގަކުރެއްވިއެވެ. ނަމަވެސް، ފައިސާ ލިބުނު ކަމުގައި ވިޔަސް ފީފާގެ ވެރިންނާމެދު އޮތް ވިސްނުން ބަދަލުނުވާނެ ކަމަށާއި، ކުރިއަށް އޮތް އިންތިޚާބުގައި އިންފަންޓީނޯއަށް ވޯޓު ނުދެއްވާނެކަން އޭނާ ވަނީ ކަށަވަރުކޮށްދެއްވާފައެވެ.

ޕްރިންސް އަލީގެ މި ސީރިއަސް ތުހުމަތުތަކާ ގުޅިގެން ފީފާއިން މިހާތަނަށް ރަސްމީކޮށް އެއްވެސް ބަހެއް ބުނެފައެއް ނުވެއެވެ. ވޯލްޑް ކަޕްގެ ހިއްސާ ވިއްކުމަށް ކުރި މަސައްކަތް ނާކާމިޔާބުވުމުން ފީފާއިން މެމްބަރު ޤައުމުތަކުގެ ކިބައިން މާފަށް އެދިފައިވީ ނަމަވެސް، މޮރޮކޯގައި ދާދިފަހުން ބޭއްވި ކުއްލި ބައްދަލުވުމެއްގައި ފީފާގެ ލީޑަރޝިޕުން ވަނީ އިންފަންޓީނޯއަށް އޮތް އިތުބާރު އައުކޮށްފައެވެ.