އުކުޅަހު ސްޕޯޓްސް ކޮމްޕްލެކްސްގެ ބިންގާ އަޅައިފި

ރާއްޖޭގެ އެކި ކަންކޮޅުތަކުގައި ކުޅިވަރުގެ ވަސީލަތްތައް ކުރިއެރުވުމަށް ސަރުކާރުން ގެންގުޅޭ ސިޔާސަތުގެ ދަށުން، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ހަވާލުކޮށްގެން އއ. އުކުޅަހުގައި ބިނާކުރާ ސްޕޯޓްސް ކޮމްޕްލެކްސްގެ އަމަލީ މަސައްކަތް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ފަށައިފިއެވެ.

މި މަޝްރޫޢުގެ ބިންގާ އެޅުމަށް ޓަކައި އުކުޅަހުގައި ބޭއްވި ޚާއްޞަ ރަސްމިއްޔާތެއްގައި، އަމަލީ މަސައްކަތް ފައްޓަވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއާއި، އެމްއޭސީއެލްގެ މެނޭޖިންގ ޑިރެކްޓަރ އަދި ސީއީއޯ އިބްރާހީމް ޝަރީފް މުޙައްމަދުގެ އިތުރުން އުކުޅަހު ކައުންސިލްގެ ރައީސް ޢަލީ ވަޙީދެވެ. ރައީސުލްޖުމްހޫރިއްޔާގެ އިތުރުން، އެ މަނިކުފާނުގެ ނައިބު އަލްއުސްތާޛު ޙުސައިން މުޙައްމަދު ލަޠީފާއި، މަޖިލީހުގެ ރައީސް ޢަބްދުއްރަޙީމް ޢަބްދުﷲ އަދި ކެބިނެޓުގެ ގިނަ ވަޒީރުންތަކެއް މި ހަފްލާގައި ބައިވެރިވެވަޑައިގަތެވެ.

އެމްއޭސީއެލްގެ ފަރާތުން މި ކޮމްޕްލެކްސް އިމާރާތްކުރުމާ ހަވާލުވެފައި ވަނީ، ފާއިތުވި އަހަރުގެ އޮގަސްޓު މަހު ރައީސް އެ ރަށަށް ކުރެއްވި ޒިޔާރަތުގެ ތެރެއިންނެވެ. މި މަރުކަޒު ފަރުމާކޮށްފައި ވަނީ އެކި ބާވަތުގެ ކުޅިވަރުތައް އެއް ފުރާޅެއްގެ ދަށުން ކުޅެވޭނެ އިންތިޒާމުތަކާއެކުގައެވެ. އޭގެ ތެރޭގައި ފެންވަރު ރަނގަޅު އިންޑޯ ޖިމަކާއި، އަންހެނުންނަށް ޚާއްޞަ ކަސްރަތު މަރުކަޒަކާއި، މަލްޓި-ސްޕޯޓްސް ހޯލެއްގެ އިތުރުން މީޓިންގ ރޫމްތަކާއި ބޯޑު ގޭމް ކުޅޭނެ ޖާގަ ހިމެނެއެވެ.

ސަރުކާރުގެ މައިގަނޑު އެއް އަމާޒަކީ ދުޅަހެޔޮ މުޖުތަމަޢެއް ބިނާކުރުމަށް ޓަކައި މުޅި ރާއްޖެއަށް އަމާޒުކޮށްގެން ބައިނަލްއަޤްވާމީ ފެންވަރުގެ އިންޑޯ ކޮމްޕްލެކްސްތައް ތަރައްޤީކުރުމެވެ. މިފަދަ ވަސީލަތްތަކުގެ ސަބަބުން ރަށްރަށުން ޤައުމީ ފެންވަރުގެ ހުނަރުވެރި އެތުލީޓުން އުފެދިގެން ދިއުމަށް މަގުފަހިވެގެންދެއެވެ.