ފީފާގެ ކޮމާޝަލް އަދި އިވެންޓް އޮޕަރޭޝަންތަކުން އަމިއްލަ އިންވެސްޓަރުންނަށް ހިއްސާ ވިއްކުމަށް އެކުލަވާލި "ފީފާ ފޯވާޑް އެންޓަޕްރައިޒް" (އެފްއެފްއީ)ޕްލޭނާ ގުޅިގެން ކުރިމަތިވި ބޮޑެތި ފާޑުކިޔުންތަކާ ހެދި، އެ އިދާރާގެ ރައީސް ޖިއާނީ އިންފަންޓީނޯ މިއަދުގެ ވަގުތެއްގައި ފީފާގެ އިސްވެރިންނާ އެކު ކުއްލި ބައްދަލުވުމެއް ބޭއްވުމަށް ނިންމަވައިފިއެވެ.
2030ވަނަ އަހަރުގެ ވޯލްޑް ކަޕް ބާއްވާ އެއް ގައުމު ކަމަށްވާ މޮރޮކޯގެ ރަބާތުގައި ބާއްވާ މި ބައްދަލުވުމުގައި، އިސްވެރިންގެ އިތުބާރު އޭނާ އަށް ނެތްކަން ހާމަވެއްޖެ ނަމަ މަގާމުން އިސްތިއުފާ ދެއްވުން ގާތް ކަމަށް ރިޕޯޓްތައް ބުނެއެވެ.
އިންފަންޓީނޯގެ މި ހުށަހެޅުން މިދިޔަ ހަފުތާގައި ކެންސަލް ކުރެއްވި ނަމަވެސް، އޭނާގެ މަގާމާ މެދު ވަނީ ސުވާލު އުފެދިފައެވެ. މި މައްސަލަ އިތުރަށް ހޫނުވީ ހޯމަ ދުވަހު ފީފާގެ ސެކްރެޓަރީ ޖެނެރަލް މެޓިއަސް ގްރާފްސްޓްރޯމްއާއި ޗީފް އޮޕަރޭޓިން އޮފިސަރު ކެވިން ލަމޫރް މި ޕްލޭނާ ދެކޮޅަށް ފާޅުގައި ވާހަކަދެއްކެވުމުންނެވެ. ގްރާފްސްޓްރޯމް މުވައްޒަފުންނަށް ފޮނުއްވި އީމެއިލެއްގައި ވިދާޅުވީ މި ޕްލޭނުގެ އެއްވެސް މައުލޫމާތެއް އޭނާ އަށް ކުރިން އެނގިވަޑައިގެންފައި ނުވާ ކަމަށެވެ. އަދި ލަމޫރް ވަނީ އިންފަންޓީނޯ މުވައްޒަފުންނަށް އޮޅުވާލައްވާފައިވާ ކަމަށާއި، މިއީ އެންމެ ބޭފުޅަކު އިސްވެ ހުންނަވައިގެން ތައްޔާރުކުރި ޕްލޭނެއް ކަމަށް ތުހުމަތު ކުރައްވައިފައެވެ.
މީގެ އިތުރުން، ފީފާގެ ޑިވެލޮޕްމަންޓް ޑިޕާޓްމަންޓުގެ އިސްވެރިޔާ އަދި އާސެނަލްގެ ކުރީގެ ކޯޗު އާސެން ވެންގާ ވެސް ވަނީ މި ޕްލޭނާ މެދު ހިތްހަމަނުޖެހުން ފާޅުކުރައްވައިފައެވެ. ވެންގާ ވިދާޅުވީ އޭނާއަށް ވެސް މިކަން އެނގުނީ ނޫސްތަކުން ކަމަށާއި، ފީފާގެ އިތުބާރު ދެމެހެއްޓުމަށް ޓަކައި މި ޕްލޭން ބާތިލުކުރުން މުހިންމު ކަމަށެވެ.
މި މައްސަލައިގައި ޔޫރަޕުގެ ފުޓްބޯޅަ އިދާރާ (ޔުއެފާ)އިން ވަނީ އިންފަންޓީނޯ އަށް އިތުބާރު ނެތް ކަމަށް ބުނެ އޭނާ މަގާމުން އިސްތިއުފާ ދެއްވުމަށް ގޮވާލައިފައެވެ. ބައެއް ގައުމުތަކުގެ ތާއީދު އޮތް ނަމަވެސް، ފުޓްބޯޅަ ދުނިޔޭގެ ބޮޑު ނުރުހުމެއް އޭނާ އަށް ވަނީ އަމާޒުވެފައެވެ. ޔުއެފާގެ ކުރީގެ ޖެނެރަލް ސެކްރެޓަރީގެ މަގާމުގައި ހުންނެވި އިންފަންޓީނޯ 2016ވަނަ އަހަރު ފީފާގެ ރައީސްކަމަށް ވަޑައިގަތީ ސެޕް ބްލެޓާގެ ކޮރަޕްޝަން މައްސަލަތަކާ ގުޅިގެންނެވެ. އޭރު އެ މަގާމަށް އެންމެ ބޮޑަށް ވާދަކުރެއްވީ ޔުއެފާގެ ކުރީގެ ރައީސް މިޝޭލް ޕްލެޓިނީއާއި އުރުދުންގެ ޕްރިންސް ހުސެއިނެވެ.
އިންފަންޓީނޯއަށް އެންމެ ފަހުން ބޮޑެތި ފާޑުކިޔުންތަކެއް އަމާޒުވީ އެމެރިކާގެ ރައީސް ޑޮނާލްޑް ޓްރަމްޕާ އެކު ބޭއްވި ސިއްރު ގުޅުންތަކެއްގެ ސަބަބުންނެވެ. ރިޕޯޓްތައް ބުނާ ގޮތުގައި ފީފާގެ މުބާރާތްތަކުގެ ހިއްސާ ވިއްކުމުގެ ޕްލޭނުގައި ޓްރަމްޕުގެ އާއިލާގެ ބައެއް ބޭފުޅުންގެ ބައިވެރިވުން އޮތެވެ. މީގެ އިތުރުން ޓްރަމްޕަށް ފީފާގެ ސުލްހައިގެ އެވޯޑް ދިނުމާއި، ޓްރަމްޕުގެ އިމާރާތެއްގައި ފީފާގެ އޮފީހެއް ހުޅުވަން ނިންމި ނިންމުމާ ގުޅިގެން ވެސް ގިނަ ބައެއްގެ ފާޑުކިޔުން އޭނާއަށް ވަނީ އަމާޒުވެފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.