ސާފް ޗެމްޕިއަންޝިޕް: ރާއްޖެ ހިމެނޭ ގްރޫޕްގައި އިންޑިއާއާއި ޕާކިސްތާން!

ނޮވެމްބަރު މަހުގެ 4އިން 17އަށް ބަންގްލަދޭޝްގެ ވެރިރަށް ޑާކާގައި ބޭއްވުމަށް ހަމަޖެހިފައިވާ 2026ވަނަ އަހަރުގެ ސާފް ޗެމްޕިއަންޝިޕްގެ ގުރުއަތުލުން ބޫޓާނުގެ ތިމްޕޫގައި މިއަދު ކުރިއަށްދިޔައިރު، މުބާރާތުގެ އެންމެ ފަހުގެ ޗެމްޕިއަން އިންޑިއާ އަދި ޕާކިސްތާނާ އެކު ދިވެހިރާއްޖެ ގްރޫޕް ބީ ގައި ހިމެނިއްޖެއެވެ.

މުބާރާތް ހޯސްޓްކުރާ ބަންގްލަދޭޝް ހިމެނިފައިވަނީ ގްރޫޕް އޭގައެވެ. މި ގްރޫޕުގައި ދެން ހިމެނެނީ ސްރީލަންކާއާއި ބޫޓާނެވެ. ދުނިޔޭގެ ފުޓްބޯޅައާ ބެހޭ މައި އިދާރާ (ފީފާ)ގެ ސަސްޕެންޝަނެއްގައި އޮތުމުގެ ސަބަބުން ނޭޕާލް މިއަދުގެ ގުރުއަތުލުމުގައި ބައިވެރިކޮށްފައެއް ނުވެއެވެ. ނަމަވެސް ސާފް އިން ހާމަކޮށްފައިވާ ގޮތުގައި، މުބާރާތް ފެށުމުގެ ކުރިން ނޭޕާލްގެ ސަސްޕެންޝަން އުވާލައިފިނަމަ އެ ގައުމަށް މުބާރާތުގައި ވާދަކުރުމުގެ ފުރުޞަތު ދެވޭނެއެވެ. މިފަދަ ހާލަތެއް މެދުވެރިވެއްޖެ ނަމަ، ނޭޕާލް އޮޓަމެޓިކުން ހިމެނިގެންދާނީ ބަންގްލަދޭޝް އޮތް ގްރޫޕް އޭ އަށެވެ. އެހެންވެއްޖެ ނަމަ އެ ގްރޫޕުގައި ހަތަރު ޓީމު ވާދަކުރާނެއެވެ. މިވަގުތު އޮތް ގޮތުން ދެ ގްރޫޕުގައި ވެސް ހިމެނެނީ ތިން ގައުމެވެ.

ދެކުނު އޭޝިއާ ސަރަޙައްދުގައި ބޭއްވޭ ފުޓްބޯޅައިގެ އެންމެ ޝަރަފުވެރި މުބާރާތް ކަމަށްވާ ސާފް ޗެމްޕިއަންޝިޕް އެންމެ ފުރަތަމަ ތަޢާރަފުކުރެވުނީ 1993ވަނަ އަހަރު ޕާކިސްތާނުގައި "ސާކް ގޯލްޑް ކަޕް"ގެ ނަމުގައެވެ. ފާއިތުވި ތިރީސް އަހަރުގެ ތެރޭގައި މި މުބާރާތުގައި އެންމެ ބޮޑު ކާމިޔާބީއެއް ހޯދާފައިވަނީ އިންޑިއާއިންނެވެ. އެގައުމުން ވަނީ ނުވަ ފަހަރެއްގެ މަތިން މުބާރާތުގެ ތަށި އުފުލާލާފައެވެ. އިންޑިއާއާ ޖެހިގެން ދެން އެންމެ ކާމިޔާބީ ދިވެހިރާއްޖެއެވެ. ރާއްޖޭގެ އިތުރުން ދެން މި މުބާރާތް ކާމިޔާބުކޮށްފައިވަނީ ބަންގްލަދޭޝްއާއި ސްރީލަންކާއިންނެވެ. މިއިން ކޮންމެ ގައުމަކުން ވަނީ އެއް ފަހަރު ތަށި ހޯދާފައެވެ.

ތާރީޚަށް ބަލާއިރު ދިވެހިރާއްޖެއިން ވަނީ މި މުބާރާތުގެ ޗެމްޕިއަންކަން ދެ ފަހަރެއްގެ މަތިން ހޯދާފައެވެ. އެންމެ ފުރަތަމަ ރާއްޖެއިން މި ޝަރަފު ހޯދީ 2008ވަނަ އަހަރު ސްރީލަންކާގެ ކޮލަމްބޯގައި ކުޅުނު ފޯރިގަދަ ފައިނަލް މެޗުގައި 1-0ގެ ނަތީޖާއަކުން އިންޑިއާ ބަލިކުރުމަށްފަހުގައެވެ. އޭގެ ދިހަ އަހަރު ފަހުން 2018ވަނަ އަހަރު ބަންގްލަދޭޝްގެ ޑާކާގައި ބޭއްވި މުބާރާތުގެ ފައިނަލްގައިވެސް ރާއްޖެއިން ވަނީ 2-1އިން އިންޑިއާގެ މައްޗަށް ކުރިހޯދައި ދެވަނަ ފަހަރަށް ސަރަޙައްދުގެ ރަސްކަން ހޯދާފައެވެ. މި ކާމިޔާބީތަކުގެ އިތުރުން 1997، 2003އަދި 2009ވަނަ އަހަރުގެ މުބާރާތުގެ ފައިނަލަށް ދަތުރުކޮށް ރާއްޖެއިން ވަނީ ރަނަރއަޕްކަންވެސް ހޯދާފައެވެ.