ކުރިއަށް އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ)އާއި ބައިނަލްއަޤުވާމީ އެހެނިހެން މުބާރާތްތަކަށް ފުރިހަމައަށް ތައްޔާރުވުމުގެ މަޤުޞަދުގައި، ރިވައިވަލް ސްޕޯޓްސް ކުލަބުގެ ބެޑްމިންޓަން ކުޅުންތެރިން ދެ މަސްދުވަހުގެ ޚާއްޞަ ތަމްރީނު ކޭމްޕެއް ފުރިހަމަކުރުމަށް މެލޭޝިއާއަށް ފުރައިފިއެވެ.
އެ ކުލަބުން މަޢުލޫމާތުދޭ ގޮތުގައި މިއީ މިހާތަނަށް ރާއްޖެއިން ބޭރުގައި އެ ޓީމުން ހިންގާ އެންމެ ފުޅާ ދާއިރާއެއްގެ ތަމްރީނު ޕްރޮގްރާމެވެ. މެލޭޝިއާއަށް ދަތުރުކުރި ޓީމުގައި ޖުމްލަ ބާރަ އެތުލީޓުންނާއި ދެ ކޯޗުން ހިމެނޭއިރު، އޭގެ ތެރޭގައި އެ ކުލަބުގެ ތޭވީސް އަހަރުން ދަށުގެ ސްކޮޑާއި ހައި ޕާފޯމަންސް ޓީމުގެ ކުޅުންތެރިން ވެސް ވަނީ ހިމަނާފައެވެ.
"އައިއޯއައިޖީ 2027ޑިވެލޮޕްމަންޓް ޕްރޮޖެކްޓް"ގެ ނަމުގައި ކުރިއަށްގެންދާ މި ޕްރޮގްރާމުގެ މައިގަނޑު އަމާޒަކީ ދިވެހިރާއްޖެއަށް ބައިނަލްއަޤުވާމީ މެޑަލްތަކެއް ހޯދައިދިނުމެވެ. މި ކޭމްޕުގެ ތެރެއިން އޭޝިއަން ގޭމްސްގެ އިތުރުން ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)އިން ގަބޫލުކުރާ މުބާރާތްތަކަށް ކުޅުންތެރިން ފަރިތަކުރާނެއެވެ. ހަމައެހެންމެ، މެލޭޝިއާގައި ކުރިއަށްދާ ބައިނަލްއަޤުވާމީ ފެންވަރުގެ ދެ މުބާރާތެއްގައި ރިވައިވަލް ސްޕޯޓްސްގެ ފަރާތުން ވާދަކުރުމަށް ވެސް ވަނީ ހަމަޖެހިފައެވެ.
ރާއްޖެއިން ބޭރުން ލިބޭ މިފަދަ ފުރުޞަތުތަކަކީ ކުޅުންތެރިންގެ ހުނަރު ތަރައްޤީކޮށް، ބައިނަލްއަޤުވާމީ މައިދާނުގައި ވާދަކުރުމުގެ ގާބިލުކަން އިތުރުކުރުމަށް އެޅޭ ވަރަށް މުހިންމު ފިޔަވަޅެއްކަމަށް ރިވައިވަލް ސްޕޯޓްސްއިން ފާހަގަކުރެއެވެ. އަދި މިފަދަ ތަޖުރިބާތަކުގެ ސަބަބުން ކުޅުންތެރިންގެ އަމިއްލަ އިތުބާރު ބޮޑުވެ، މުޅި ދިވެހި ބެޑްމިންޓަނަށް އޭގެ ހެޔޮ ބަދަލުތަކެއް އަންނާނެކަމަށް އެ ފަރާތުން ދެކެއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.