ކްލަބް މޯލްޑިވްސްއިން އިންތިޒާމުކޮށްގެން ހުޅުމާލޭ ރެހެންދި ފުޓްސަލް ދަނޑުގައި ކުރިއަށްގެންދާ "އެއިޓީން ތާޓީ"އަންހެނުންގެ ފުޓްސަލް މުބާރާތުގައި މިއަދު ހަވީރު ބިސް ބުރު ސްޕޯޓްސް ކްލަބްގެ މައްޗަށް ވެމްކޯއިން ކުރިހޯދުމާ ގުޅިގެން، އެ ޓީމުގެ އިތުރުން ދިވެހި ސިފައިންގެ ކްލަބް (ޑީއެސްސީ)އަށް މުބާރާތުގެ ފައިނަލުން ޖާގަ ލިބިއްޖެއެވެ.
މިއަދު ކުޅެވުނު ފޯރިގަދަ މެޗު ވެމްކޯއިން ކާމިޔާބުކުރީ 9-8ގެ ހަނި ތަފާތަކުންނެވެ. މި ނަތީޖާއާ އެކު ތާވަލުގެ އެއްވަނައިގައި ވެމްކޯ އޮތީ މިހާތަނަށް ކުޅުނު ހަތަރު މެޗުން ލިބުނު ނުވަ ޕޮއިންޓާއެކުގައެވެ. ދެވަނައިގައި އޮތް އެންމެ ފަހުގެ ޗެމްޕިއަން ޑީއެސްސީއަށް ތިން މެޗުން ހަ ޕޮއިންޓް ލިބިފައިވާއިރު، ތިން މެޗުން ބަލިވެ ޕޮއިންޓެއް ނުލިބި ތާވަލުގެ ފުލުގައި އޮތީ ބިސް ބުރެވެ. އެހެންކަމުން، ބާކީ މެޗުތައް ކުޅުމުގެ ކުރިން ގަދަ ދެ ޓީމަށް ވަނީ ފައިނަލް ޔަގީންވެފައެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރުހުމާއެކު ކުރިއަށްދާ މި މުބާރާތުގައި މިއަހަރު ވާދަކުރަނީ ޖުމްލަ ތިން ޓީމެކެވެ. މުބާރާތް ރޭވިފައިވާ ގޮތުން ކޮންމެ ޓީމެއް ކޮންމެ ޓީމަކާ ދެފަހަރު ބައްދަލުކުރުމަށް ފަހު، އެންމެ ގިނަ ޕޮއިންޓް ހޯދާ ދެ ޓީމު ފައިނަލަށް ދާނެއެވެ. ލީގު ބުރުގައި ދެން އޮންނަ މެޗެއް ކުޅުމަށް ހަމަޖެހިފައިވަނީ އަންނަ ހޯމަ ދުވަހުގެ ހަވީރުގެ ވަގުތެއްގައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.