މެޗުގެ ކުރިން ނޯވޭގެ މަޝްހޫރު "ވައިކިންގް ރޯ" މަޔާމީ ބީޗަށް!

2026ވަނަ އަހަރުގެ ފީފާ ވޯލްޑް ކަޕްގެ ކުއާޓަރ ފައިނަލްގައި އިންގްލެންޑާ ދެކޮޅަށް ނޯވޭ ކުޅޭ މުހިންމު މެޗަށް ތައްޔާރުވުމުގެ ގޮތުން، އެ ގައުމުގެ ސަޕޯޓަރުންގެ ޚާއްސަ ހަރަކާތް ކަމަށްވާ "ވައިކިންގް ރޯ"މަޔާމީ ބީޗުގައި ވަރަށް ކުލަގަދަކޮށް ދައްކާލައިފިއެވެ.

މުޅި ދުނިޔޭގެ ސަމާލުކަން ހުއްޓިފައިވާ މި ރަމްޒީ ފަލިޖެހުމުގެ ހަރަކާތަކީ މިއަހަރުގެ މުބާރާތުގައި އެންމެ ބޮޑަށް ވައިގައި ހިފާފައިވާ އެއް ކަންތަކެވެ. އެމެރިކާގެ އެކި ސްޓޭޓްތަކަށް ޓީމާއެކު ދަތުރުކުރަމުންދާ ނޯވޭގެ ރަތް ކުލައިގެ ސަޕޯޓަރުން އަންނަނީ މެދުކެނޑުމެއް ނެތި މި ހަރަކާތް ބާއްވަމުންނެވެ. އަދި ކޮންމެ މެޗަކުން ލިބޭ މޮޅާއެކު ޓީމުގެ ކުޅުންތެރިން ވެސް އުފާފާޅުކުރުމުގެ ގޮތުން ސަޕޯޓަރުންނާ ގުޅިގެން އަމަލީގޮތުން މިކަމުގައި ބައިވެރިވެއެވެ.

މި ވައިރަލް ޓްރެންޑް އެންމެ ފުރަތަމަ ފެށިގެން އައީ މީގެ މަހެއްހާ ދުވަސް ކުރިން ބޮސްޓަންގައި އިރާގާ ދެކޮޅަށް ނޯވޭ ކުޅުނު ފުރަތަމަ މެޗުގެ ކުރިންނެވެ. އޭގެ ފަހުން އާންމު ދަތުރުފަތުރުކުރާ ނިޒާމުތަކާއި، ކެފޭތަކާއި، ސްޓޭޑިއަމްތަކުގެ އެސްކަލޭޓަރުތަކުގެ އިތުރުން ނޯވޭގެ ގާނޫނު ހަދާ މަޖިލީހުގައި ވެސް މި ފަލިޖެހުމުގެ ސްޓައިލް ވަނީ އާންމުވެ ބޮޑު މަގުބޫލުކަމެއް ހޯދާފައެވެ.

ސަޕޯޓަރުންގެ މި ފޯރީގެ އިތުރުން، ނޯވޭގެ ތަރި އާލިންގް ހާލަންޑަށް ވެސް ސޯޝަލް މީޑިއާގައި ބޮޑު ސަމާލުކަމެއް ވަނީ ލިބިފައެވެ. އިނގިރޭސި ޕްރިމިއާ ލީގުގެ މެންޗެސްޓަރ ސިޓީއަށް ކުޅެމުންދާ ހުނަރުވެރި ފޯވާޑް ވަނީ ވިދިވިދިގެން 14މެޗުގައި ލަނޑު ޖަހާފައެވެ. މުބާރާތުގައި މިހާތަނަށް 7ލަނޑު ކާމިޔާބުކޮށްފައިވާއިރު، ރަން ބޫޓު ހޯދުމަށް އޭނާ އަންނަނީ ލިއޮނަލް މެސީއާއި ކީލިއަން އެމްބާޕޭއާ ވަރަށް ގާތުން ވާދަކުރަމުންނެވެ.

ހާލަންޑަށް ލިބެމުންދާ ތަރުހީބާ އެކު ދުނިޔޭގެ އެކި ކަންކޮޅުތަކުގައި އޭނާގެ ފޮޓޯ ޖަހާފައިވާ ޓީޝާޓުތަކުގެ ވިޔަފާރި ވަނީ އިންތިހާއަށް މައްޗަށް ގޮސްފައެވެ. މިގޮތުން ޕެރޫގެ ވެރިރަށް ލީމާގެ ވިޔަފާރިވެރިން ވެސް މިހާރު ދަނީ ހާލަންޑްގެ ތަފާތު ޑިޒައިންތަކުގެ ޓީޝާޓުތައް ބާޒާރަށް ނެރެ ވިއްކަމުންނެވެ.