ޕްރެޝަރު ބޮޑީ އިންގްލެންޑަށް: ހާލަންޑް

ވޯލްޑް ކަޕްގެ ކުއާޓާ ފައިނަލުގައި އިނގިރޭސިވިލާތާ ދެކޮޅަށް ނޯވޭ ކުޅޭ މެޗުގެ ކުރިން، މުބާރާތުގެ ފޭވަރިޓުންގެ ގޮތުގައި އޮތް އިންގްލެންޑަށް ނަފްސާނީ ގޮތުންނާއި މީޑިއާގެ ފަރާތުން ބޮޑު ޕްރެޝަރަކާ ކުރިމަތިލާން ޖެހޭނެކަމަށް ނޯވޭގެ ތަރި އާލިން ހާލަންޑް ބުނެފިއެވެ.

މީލާދީން 1998ވަނަ އަހަރަށް ފަހު ފުރަތަމަ ފަހަރަށް ވޯލްޑް ކަޕްގައި ވާދަކުރަމުން އަންނަ ނޯވޭގެ ފަރާތުން މީޑިއާއާ ވާހަކަދައްކަމުން ހާލަންޑް ފާހަގަކުރި ގޮތުގައި، އިންގްލެންޑަކީ ތަށި ހޯދާނެ ކަމަށް އެންމެ ބޮޑަށް ބެލެވޭ އެއް ޓީމެވެ. އެހެންކަމުން މޮޅުވުމުގެ މަޖުބޫރީ އޮތީ އެ ޓީމަށް ކަމަށާއި، ނޫސްވެރިންގެ ފަރާތުން ވެސް އިނގިރޭސި ކުޅުންތެރިންނަށް އެ ޕްރެޝަރު އަމާޒުކުރުމަށް އޭނާ ވަނީ އެދިފައެވެ.

ގަދަ ސޯޅައިގެ މަރުހަލާގައި ދުނިޔޭގެ ފުޓްބޯޅައިގެ ގަދަބާރު ބްރެޒިލް ކަޓުވާލުމަށް ފަހު ނޯވޭ ކުއާޓާއަށް ދަތުރުކުރިއިރު، އުމުރުން 24އަހަރުގެ ހާލަންޑްގެ ދައުރު ވަރަށް ބޮޑެވެ. އޭނާ ވަނީ މި މުބާރާތުގައި މިހާތަނަށް ހަތް ލަނޑު ކާމިޔާބުކޮށްފައެވެ. އަދި ޤައުމީ ޓީމަށް ކުޅެދިން ފަހުގެ 14މެޗުގައި ވެސް މެދުކެނޑުމެއް ނެތި އޭނާ އަންނަނީ ލަނޑު ޖަހަމުންނެވެ.

އިނގިރޭސިވިލާތަށް އުފަންވި ނަމަވެސް ނޯވޭއަށް ކުޅެމުން އަންނަ ހާލަންޑް، މީގެ ކުރިން ބުނެފައިވާ ގޮތުގައި ދުނިޔޭގެ ތަށި ނޯވޭއަށް އުފުލާލުމުގެ ފުރުސަތު އޮތީ އެންމެ ސުމެއް ޕޮއިންޓް ފަހެއް އިންސައްތައިގައެވެ. ނަމަވެސް މޮޅު ކުޅުމަކާ އެކު އެޓީމު މިހާރު އޮތީ ތާރީޚީ ކާމިޔާބީއަކާ ވަރަށް ގާތުގައެވެ.