ނުވަ އަހަރަށް ފަހު ކްރޮއޭޝިއާ ކޯޗު، ޑަލިޗް މަގާމުން ދުރަށް!

ފީފާ ވޯލްޑް ކަޕް 2026ގެ ދެވަނަ ބުރުން ކްރޮއޭޝިއާ ކެޓިތާ ކުޑަ ދުވަސްކޮޅެއްގެ ތެރޭގައި، އެ ގައުމުގެ ފުޓްބޯޅަ ތާރީޚުގައި އެންމެ ގިނަ ކާމިޔާބީތައް ހޯދައިދިން ކޯޗު ޒްލަޓްކޯ ޑަލިޗް، ނުވަ އަހަރަށްފަހު އެ މަގާމުން އިސްތިއުފާދީފިއެވެ.

އުމުރުން 59އަހަރުގެ ޑަލިޗް މަގާމުން ދުރަށް މިދިޔައީ، މުބާރާތުގެ ގަދަ ސޯޅައިގައި ޕޯޗުގަލް އަތުން 2-1ގެ ނަތީޖާއަކުން ބަލިވެ ކްރޮއޭޝިއާ މުބާރާތާ އަލްވަދާއު ކިޔަން ޖެހުނުތާ ހަފުތާއެއް ވެސް ނުވަނީހެވެ. އޭނާ ވަނީ 2017ވަނަ އަހަރު ޓީމާ ހަވާލުވި ފަހުން، މިހާތަނަށް 111މެޗުގައި ކްރޮއޭޝިއާއަށް އިރުޝާދުދީ އޭގެ ތެރެއިން 62މެޗު ކާމިޔާބުކޮށްދީފައެވެ.

އޭނާގެ ބެލުމުގެ ދަށުން ކްރޮއޭޝިއާއިން ވަނީ ދުނިޔޭގެ ފެންވަރުގައި ތާރީޚީ ނަތީޖާތަކެއް ނެރެފައެވެ. އެގޮތުން 2018ވަނަ އަހަރުގެ ވޯލްޑް ކަޕުގެ ފައިނަލް ކުޅުމާއި، 2022ވަނަ އަހަރު ގަތަރުގައި ބޭއްވި ވޯލްޑް ކަޕުން ތިންވަނަ މަގާމު ހޯދުމުގެ އިތުރުން، 2022-23ގެ ޔުއެފާ ނޭޝަންސް ލީގުގެ ރަނަރއަޕްކަން އެ ޓީމުން ވަނީ ހާސިލުކޮށްފައެވެ.

މަގާމުން ވަކިވުމަށް ފަހު ވާހަކަދައްކަމުން ޑަލިޗް ބުނީ، ފާއިތުވި ނުވަ އަހަރުގެ ތެރޭގައި ޓީމުން ހޯދި ފަދަ ބޮޑެތި ކާމިޔާބީތަކެއް ލިބިދާނެ ކަމަށް އޭނާ ހުވަފެނުގައި ވެސް އުންމީދު ނުކުރާ ކަމަށެވެ. އަދި އިންގްލެންޑާއި ބްރެޒިލް ފަދަ ވަރުގަދަ ގައުމުތައް ބަލިކޮށް ހޯދި މެޑެލްތަކާއި އުފާވެރި ހަނދާންތަކާ މެދު އިންތިހާއަށް ފަޚުރުވެރިވާކަން އޭނާ ފާހަގަކުރިއެވެ.

ކްރޮއޭޝިއާގެ ފުޓްބޯޅަ ފެޑެރޭޝަނުން ވަނީ ޑަލިޗްގެ އިޚުލާސްތެރި މަސައްކަތްތަކަށާއި، ޓީމަށް ގެނެސްދިން ރަން މެޑެލްތަކުގެ އިތުރުން ކުޅުންތެރިންގެ މެދުގައި އާލާކޮށްދިން އެއްބައިވަންތަކަމަށް ނުހަނު ބޮޑަށް ޝުކުރު އަދާކޮށްފައެވެ. 

މި ފަހަރުގެ ވޯލްޑް ކަޕުގައި ކްރޮއޭޝިއާ ދެވަނަ ބުރަށް ދަތުރުކުރީ ގްރޫޕް އެލްގެ ދެވަނަ ޓީމުގެ ހައިސިއްޔަތުންނެވެ. އެ މަރުހަލާގައި ޕެނަމާ އަދި ގާނާގެ މައްޗަށް އެ ޓީމުން ކުރިހޯދިއިރު، އިންގްލެންޑް އަތުން ވަނީ 4-2އިން ބަލިވެފައެވެ.

މުބާރާތުން ކެޓި މެޗަށް ފަހު، ވީއޭއާރް މެދުވެރިކޮށް ޕޯޗުގަލްއަށް ދިން ޕެނަލްޓީއަކާއި ޔޮސްކޯ ގްވާޑިއޯލް ކާމިޔާބުކުރި ލަނޑެއް އޮފްސައިޑް ކަމަށް ނިންމުމުން ޑަލިޗް ވަނީ ރެފުރީންނަށް ފާޑުކިޔާފައެވެ. އެހެންނަމަވެސް ބަލިވީ ހަމައެކަނި އެ ސަބަބާ ހުރެ ކަމަށް އޭނާ ގަބޫލެއް ނުކުރެއެވެ. 

ގައުމީ ޓީމާ ހަވާލުވުމުގެ ކުރިން ޑަލިޗް އަކީ އޭޝިއާ ބައްރުގައި ވެސް ކާމިޔާބު މަސައްކަތްތަކެއް ކޮށްފައިވާ ކޯޗެކެވެ. އެގޮތުން ސައުދީގެ އަލް-ހިލާލް އަދި ޔޫއޭއީގެ އަލް-އައިން ފަދަ މަޝްހޫރު ކުލަބުތަކަށް އޭނާ ވަނީ އިރުޝާދުދީފައެވެ.