ހާލަންޑް ފަހު ވަގުތު ޖެހި ލަނޑުން ނޯވޭ 16އަށް

ވޯލްޑް ކަޕްގެ ގަދަ 32ގައި ފުޓްބޯޅައިގައި ވަރުގަދަ އައިވަރީކޯސްޓް ބަލިކޮށް ނޯވޭ ގަދަ16އަށް ދަތުރުކޮށްފިއެވެ.

މިރޭގެ ތަރިއަކަށްވީ މޮޅުވި ލަނޑު ޖެހި އާލަން ހާލަންޑެވެ. ނަމަވެސް މެންޗެސްޓަރ ސިޓީގެ މި ފޯވާޑް މި މެޗުގެ 86 ވަނަ މިނެޓާ ހަމައަށް ފެނުނީ ވަރަށް ހިމޭންކޮށެވެ. 

މިއީ ނޯވޭގެ ގައުމީ ޓީމަށް ވާދަވެރި މެޗުތަކުގައި ޖެހިޖެހިގެން ހާލަންޑް ލަނޑު ޖެހި 13 ވަނަ މެޗެވެ. އަދި އޭނާގެ މި ލަނޑާ އެކު ނޯވޭ ވަނީ ތާރީޚުގައި ފުރަތަމަ ފަހަރަށް ވޯލްޑް ކަޕްގެ ނޮކްއައުޓް މެޗަކުން މޮޅުވެފައެވެ.

މެޗްގެ ފުރަތަމަ ގޯލް ޖެހީ ނޯވޭގެ ނޫސާއެވެ. އޭނާއަކީ އޭނާގެ އެޓޭކިން ޕާޓްނަރު ހާލަންޑް ފަދައިން މާ ބޮޑު މަގުބޫލުކަމެއް ލިބިފައިވާ ކުޅުންތެރިއެއް ނޫން ނަމަވެސް އާރްބީ ލައިޕްޒިގަށް ކުޅޭ 21 އަހަރުގެ މި ވިންގަރު ވަނީ ވާތްފަރާތުން އޭރިއާ ތެރެއަށް ވަދެ، ކަނާތުން ފޮނުވާލި ހިތްގައިމު ހަމަލާއަކުން ގޯލުގެ މަތީ ކަނަށް ބޯޅަ ފޮނުވާލައިގެން މޮޅު ކުޅުމެއް ދައްކާފައެވެ.

ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އަމާދު 74 ވަނަ މިނެޓުގައި ކާމިޔާބުކުރި ހިތްގައިމު ލަނޑާ އެކު އައިވަރީ ކޯސްޓުން އިތުރު ވަގުތަށް މެޗު ގެންދާނެ ކަމަށް ބެލެވުނެވެ. ހައިރާންވާ ފަދަ ގޮތަކަށް އޭނާ ފުރަތަމަ އެގާރައިގައި ހިމަނާފައި ނުވާއިރު، ކޯޗު އެމާސް ފާއި ޓީމު އެތުރީ ޑިފެންސިވް 4-1-4-1 ފޯމޭޝަނަކަށެވެ. މިއީ ފާއި އަށް ހެދުނު ގޯހެއްކަން ސާބިތުވީ، 39 ވަނަ މިނެޓުގައި ނޯވޭ އިން ލީޑު ނެގުމުގެ ކުރިން އައިވަރީ ކޯސްޓަށް ފުރުސަތުތަކެއް ތަނަވަސްކުރަން އުނދަގޫވުމުންނެވެ.

ގްރޫޕް ސްޓޭޖުގެ ތިން މެޗުގައި ވެސް ފުރަތަމަ ލަނޑު ޖެހި އައިވަރީ ކޯސްޓަށް މި މެޗުގައި ޖެހުނީ ފަހަތުން އަރާ މެޗު ސަލާމަތްކުރާށެވެ. އެހެންކަމުން ފާއި ވަނީ ދެވަނަ ހާފުގައި އަމާދު ކުޅެން އަރުވާފައެވެ. އަދި 23 އަހަރުގެ ކުޅުންތެރިޔާ ކަނާތްފަރާތުން އެތެރެއަށް ވަދެ، ދެ ކުޅުންތެރިން ކައިރިން ނައްޓާލުމަށް ފަހު މި މުބާރާތުގައި އޭނާގެ ދެވަނަ ލަނޑު ކާމިޔާބުކޮށް، ޓީމަށް އޭނާގެ މުހިންމުކަން ދައްކާލިއެވެ.

އޭގެ ކުޑަވަގުތުކޮޅެއް ކުރިން، މެންޗެސްޓަރ ޔުނައިޓެޑްގެ މި ކުޅުންތެރިޔާ ވަނީ ދިފާއީ ގޮތުން ވެސް މުހިންމު ދައުރެއް އަދާކޮށްފައެވެ. ނޯވޭގެ ސެންޓަރ ބެކް ޓޯބްޖޯން ހެގެމް ހަތަރު ޔާޑު ބޭރުން ފޮނުވާލި ހަމަލާ، އަމާދު ވަނީ ގޯލުގެ ރޮނގުމަތިން ދިފާއުކޮށްފައެވެ.

ނަމަވެސް، ތަރި ފޯވާޑުންގެ މޮޅު ކުޅުން ފެންނަމުންދާ މި ވޯލްޑް ކަޕްގައި، ހާލަންޑް ހުއްޓުވުމަކީ ކުރެވޭނެ ކަމެއް ނޫންކަން އޭނާ ސާބިތުކޮށްދިނެވެ.

މިއީ މި ދެ ގައުމުގެ ތާރީޚުގައިވެސް ކުޅުނު އެންމެ މުހިންމު މެޗެވެ. މިއީ އައިވަރީ ކޯސްޓްގެ ފުރަތަމަ ވޯލްޑް ކަޕް ނޮކްއައުޓް މެޗަށްވާއިރު، ނޯވޭ މި މަރުހަލާގައި ކުޅުނީ 28 އަހަރަށް ފަހު ފުރަތަމަ ފަހަރަށެވެ.

އައިވަރީ ކޯސްޓްގެ ޒުވާން ހުނަރުވެރިޔާ ޔާން ޑިއޮމާންޑޭއަށް މި މެޗުގައި މާ ބޮޑު ކަމެއް ނުކުރެވުނެވެ. މީގެ އެންމެ ރަނގަޅު މިސާލަކީ, ފުރަތަމަ ހާފުގައި 19 އަހަރުގެ ވިންގަރު ބޯޅައާ އެކު ކުރިއަށް އަރަން އުޅުމުން ޑޭވިޑް މޮލާ ވޮލްފް އޭނާ ހުއްޓުވި ގޮތެވެ.

ބަދަލު ކުޅުންތެރިއެއްގެ ގޮތުގައި ކުޅެން އެރި އަމާދުގެ ނުފޫޒު މެޗުގައި ވަރަށް ބޮޑަށް ފެނުނެވެ. އަދި މެޗުގެ ފަހު ސިކުންތުކޮޅުގައި 25 ޔާޑު ބޭރުން އޭނާ ފޮނުވާލި ހިލޭ ޖެހުން، ނޯވޭގެ ކީޕަރު އޯލާން ނީލަންޑް ވަނީ ދިފާއުކޮށްފައެވެ.

ނޯވޭގެ ކެޕްޓަން މާޓިން އޮޑެގާޑްގެ ފަރާތުން ފެނުނީ ހިމޭން ނަމަވެސް މުހިންމު ކުޅުމެކެވެ. ނޫސާ ޖެހި ލަނޑަށް ފުރުސަތު ތަނަވަސްކޮށްދިނީ އޭނާއެވެ. މިއާ އެކު އޭނާ ވެގެންގޮސްފައި ވަނީ ވޯލްޑް ކަޕްގައި ކުޅުނު ފުރަތަމަ ތިން މެޗުން ވެސް އެސިސްޓް ހެދި ތާރީޚީ ތިންވަނަ ކުޅުންތެރިޔާއަށެވެ.

ހާލަންޑްގެ ފަރާތުން ފެނުނީ ބޭނުންވި ވަގުތު ނަތީޖާ ނެރެދިން ތަނެވެ. މިއީ މި ފަހަރުގެ ވޯލްޑް ކަޕްގެ ތިން މެޗުން އޭނާ ކާމިޔާބުކޮށްދިން ފަސްވަނަ ލަނޑެވެ.

ނޯވޭ ގަދަ 16ގައި ބައްދަލުކުރާނީ ހޯމަ ދުވަހު ޖަޕާން އަތުން ފަހަތުން އަރާ މޮޅުވި ބްރެޒިލްއާއެވެ.