"ބެލިންހަމް އަދި ރެފްރީ ވަރަށް މޮޅަށް ކުޅެފި"

2026 ގެ ފީފާ ވޯލްޑް ކަޕް ކުއާޓާ ފައިނަލްގައި އިތުރު ވަގުތު ކުޅެގެން 2-1އިން އިންގްލެންޑް އަތުން ނޯވޭ ހިތްދަތި ގޮތަކަށް ބަލިވި މެޗާ ގުޅިގެން އާ ބަހުސްތަކެއް އުފެދިފައިވާއިރު، އާލިން ހާލަންޑްގެ ބައްޕަ އަލްފީ ހާލަންޑް ވަނީ ސޯޝަލް މީޑިއާގައި ރެފްރީންނަށް މަލާމާތުގެ ރާގަކަށް ފާޑުކިޔާފައެވެ.

މެޗު ނިމުނުތާ މާގިނައިރެއް ނުވެ، މެންޗެސްޓަރ ސިޓީ އަދި ލީޑްސް ޔުނައިޓެޑްގެ ކުރީގެ މިޑްފީލްޑަރު އެކްސްގައި ބުނީ ބެލިންހަމް އަދި ރެފްރީ ވަރަށް މޮޅަށް ކުޅެފި ކަމަށެވެ.

މި ކުރު މެސެޖު ވަރަށް އަވަހަށް ވައިރަލްވެފައިވާއިރު، ގިނަ ބަޔަކު ގަބޫލުކުރާ ގޮތުގައި މިއީ ތޯމަސް ޓުޗެލްގެ ޓީމު ސެމީ ފައިނަލަށް ގެންގޮސްދިނުމަށް ދެ ގޯލު ވެސް ކާމިޔާބުކޮށްދިން އިންގްލެންޑްގެ މިޑްފީލްޑަރު ޖޫޑް ބެލިންހަމްއަށް ތައުރީފުކުރުމުގެ ބަދަލުގައި، ރެފްރީންގެ ނިންމުންތަކަށް ފާޑުކިޔައި ކުރި ޕޯސްޓެކެވެ.

އަލްފީ ހާލަންޑްގެ މި ރިއެކްޝަނަކީ ނޯވޭގެ ކުޅުންތެރިންނާއި ސަޕޯޓަރުން ރުޅިގަދަވި ދެ މުހިންމު ހާދިސާއަކާ ގުޅިގެން އައި ރިއެކްޝަނެއް ކަމަށް ބެލެވެއެވެ.

ފުރަތަމަ ހާދިސާއަކީ ނޯވޭއިން ލީޑު ނެގި ކަމަށް ހީކުރި ވަގުތު، ގޯލު ޖެހުމުގެ ކުރިން އާލިން ހާލަންޑް ފައުލްއެއް ކުރި ކަމަށް ރެފްރީ ނިންމައި ގޯލު ގަބޫލުނުކުރަން ނިންމި ނިންމުމެވެ. މި ނިންމުމާ މެދު ހިޔާލުތަފާތުވުންތައް އުފެދުނުއިރު، ނޯވޭގެ ގިނަ ސަޕޯޓަރުން ބުނަމުންދިޔައީ އެއީ ވަރަށް ކުޑަ ކޮންޓެކްޓެއް ކަމަށެވެ.

ދެވަނަ ހާދިސާއަކީ މިއަށް ވުރެ ވެސް ބޮޑަށް ބަހުސް އުފެދުނު ކަމެކެވެ.

ބެލިންހަމް އިންގްލެންޑަށް ނަތީޖާ އެއްވަރުކޮށްދިން ގޯލު ޖެހުމުގެ ކުރިން އިންގްލެންޑުން އެޓޭކް އުފެއްދި ވަގުތު، ޓީވީ ރީޕްލޭތަކުން ފެންނަ ގޮތުގައި ބޯޅަ ވަނީ މަތީގައި ހަރުކޮށްފައި ހުރި ކޭބަލް ކެމެރާއެއްގައި ކޮންމެވެސް ވަރަކަށް ކޭތިފައެވެ.

ފީފާގެ ގަވާއިދުތައް ބުނާގޮތުން، މަތީގައި އެލުވާފައި ހުންނަ ކެމެރާއެއް ފަދަ ބޭރުގެ އެއްޗެއްގައި ބޯޅަ ޖެހިއްޖެ ނަމަ، ވަގުތުން ކުޅުން ހުއްޓާލައި، ޑްރޮޕް ބޯލްއަކުން ކުޅުން އަލުން ފަށަންޖެހެއެވެ.

ނަމަވެސް، ކުޅުން ކުރިއަށް ގެންދިއުމުގެ ސަބަބުން އިންގްލެންޑަށް ކުރިއަށް އަރައި ގޯލު ޖެހުމުގެ ފުރުސަތު ލިބުނެވެ.

ފީފާގެ ރަސްމީ ސޯޝަލް މީޑިއާ އެކައުންޓުން ފަހުން ހާމަކުރި ގޮތުގައި، އެ ހާދިސާ ބަލާފައިވާ ކަމަށާއި، ބޯޅައާއި ކޭބަލް ކެމެރާއާ ދެމެދު އެއްވެސް ކޮންޓެކްޓެއް ވެފައިވާކަން ފާހަގަކުރެވިފައި ނުވާ ކަމަށެވެ.

މި ހިޔާލުތަފާތުވުންތަކާ އެކު ވެސް، ބެލިންހަމް ވަނީ އިންގްލެންޑަށް މެޗުން މޮޅުކޮށްދިނުމުގައި އަނެއްކާ ވެސް މުހިންމު ދައުރެއް އަދާކޮށްފައެވެ.

ރެއާލް މެޑްރިޑްގެ މިޑްފީލްޑަރު ދެ ގޯލު ޖަހައި، ފަހަތުން އަރައި އިތުރު ވަގުތުގައި 2-1 އިން އިންގްލެންޑް މޮޅުކޮށްދީ، ނޯވޭގެ ހަނދާންތަކުން ފޮހެލަން ދަތި ވޯލްޑް ކަޕް ދަތުރު ނިމުމަކަށް ގެނައެވެ.

އިންގްލެންޑުން މިހާރު ވަނީ ސެމީ ފައިނަލުން ޖާގަ ހޯދާފައެވެ. ސެމީގައި އެޓީމު ބައްދަލުކުރާނީ އާޖެންޓީނާ ނުވަތަ ސްވިޒަލޭންޑާއެވެ.

މެޗަށްފަހު ދެކެވޭ ވާހަކަތަކުގައި ރެފްރީގެ ނިންމުންތަކުގެ ވާހަކަ ގަދަވި ނަމަވެސް، އިންގްލެންޑްގެ މޮޅުވުމުގައި ތޯމަސް ޓުޗެލްގެ ޓެކްޓިކަލް ބަދަލުތަކުގެ ދައުރު ބޮޑެވެ. އޭނާ ގެނައި ބަދަލުތަކުން ޓީމަށް އާ ދިރުމެއް ލިބުނުއިރު، ހާއްސަކޮށް ޖެޑް ސްޕެންސްގެ ފަރާތުން މޮޅު ކުޅުމެއް ފެނުނެވެ. ޗެލްސީގެ ފުލްބެކް ބެންޗުން ކުޅެން އަރައި، އޭނާގެ ހަލުވި ދުވެއްޔާއި މޮޅު ހުނަރާއެކު މެޗުގެ ފަހުކޮޅު ކުޅުން ކޮންޓްރޯލް ކުރުމަށް އިންގްލެންޑަށް އެހީތެރިވެދިނެވެ. ދަނޑުގެ ދެކޮޅަށް އޭނާ ކުރި ބުރަ މަސައްކަތަކީ އިންގްލެންޑުން ނަތީޖާ އަނބުރާލައި ސެމީގެ ޖާގައެއް ކަށަވަރުކުރުމުގައި މުހިންމު ދައުރެއް އަދާކުރި ކަމެކެވެ.