ވޯލްޑް ކަޕުން ކެޓިޔަސް މަގާމުގައި ދެމިހުންނަން ބޭނުން: ނާގަލްސްމަން

ފީފާ ވޯލްޑް ކަޕް 2026ގެ ދެވަނަ ބުރުގައި ޕެނަލްޓީ ޖަހައިގެން ޕެރަގުއޭ އަތުން ބަލިވެ ޖަރުމަން މުބާރާތުން ކެޓި ނަމަވެސް، އެ ގައުމުގެ ގައުމީ ޓީމުގެ ކޯޗުކަމުގެ މަގާމުގައި ދެމިހުންނަން ބޭނުންވާ ކަމަށް ހޫލިއަން ނާގަލްސްމަން ބުނެފިއެވެ.

މިއީ ވޯލްޑް ކަޕް ތާރީޚުގައި ޕެނަލްޓީ ޝޫޓްއައުޓަކުން ޖަރުމަން ބަލިވި ފުރަތަމަ ފަހަރެވެ. މި ނާކާމިޔާބީއާ އެކު އުމުރުން 38އަހަރުގެ ނާގަލްސްމަންގެ މުސްތަގުބަލާ މެދު ވަނީ ސުވާލުތަކެއް އުފެދިފައެވެ.

މަގާމުގައި ދެމިހުރުމާ ގުޅޭ ގޮތުން ވާހަކަދައްކަމުން ނާގަލްސްމަން ބުނީ، މިއީ މިހާރު އޭނާގެ އަތްމަތީގައި އޮތް ކަމެއް ނޫން ނަމަވެސް، ފުރުސަތު ލިބިއްޖެ ނަމަ މަސައްކަތް ކުރިއަށްގެންދަން ތައްޔާރަށް ހުރި ކަމަށެވެ. އަދި އޭނާއަކީ ކަންކަމުން ފިލައިގެން ދާނެ މީހެއް ނޫން ކަމަށް ވެސް ބުންޏެވެ.

"އަހަރެން ބޭނުމީ ކުރިއަށްދާން. އެހެން ގޮތަކަށް ކަންތައް ކުރަން ބޭނުންވާ ބަޔަކު ތިބި ނަމަ، އެކަން އަހަރެން ގާތު ބުނަންޖެހޭނެ. ޖަރުމަނުގެ ފުޓްބޯޅަ އެސޯސިއޭޝަނުން ބޭނުންވާ ނަމަ، ޔޫރަޕިއަން ޗެމްޕިއަންޝިޕާއި ނޭޝަންސް ލީގަށް ޓީމު ތައްޔާރުކުރުމުގެ މަސައްކަތް އަހަރެން ފަށާނަން" ނާގަލްސްމަން ބުންޏެވެ.

ނާގަލްސްމަން ޖަރުމަނުގެ ޓީމާ ހަވާލުވީ 2023ވަނަ އަހަރުއެވެ. އޭނާގެ އިރުޝާދުގެ ދަށުން ޖަރުމަނުން ޔޫރޯ 2024ގެ ކުއާޓާ ފައިނަލާ ހަމައަށް ދަތުރުކުރިއެވެ. ނަމަވެސް، 2018އަދި 2022ވަނަ އަހަރުގެ ވޯލްޑް ކަޕުގެ ގްރޫޕް ސްޓޭޖުން ކެޓުމަށް ފަހު، މި ފަހަރުގެ މުބާރާތުން ވެސް ޖަރުމަނަށް އަވަހަށް ވަކިވާން ޖެހުމަކީ ނާގަލްސްމަންއަށް ކުރިމަތިވި ބޮޑު ގޮންޖެހުމެކެވެ. އޭނާއަކީ ވޭތުވެދިޔަ 40އަހަރުގެ ތެރޭގައި ވޯލްޑް ކަޕެއްގެ ނޮކްއައުޓް ބުރުގައި ޓީމަކަށް އިރުޝާދުދިން އެންމެ ޒުވާން ކޯޗެވެ.

ޕެރަގުއޭއާ ދެކޮޅަށް ކުޅުނު މެޗުގެ ޕެނަލްޓީ ޝޫޓްއައުޓްގައި ޖަރުމަނުގެ ކައި ހާވާޓްޒް، ނިކް ވޮލްޓެމޭޑް އަދި ޖޮނަތަން ޓާ ޖެހި ޕެނަލްޓީތައް ކާމިޔާބެއް ނުކުރެވުނެވެ. މިއީ 2014ވަނަ އަހަރު ހަތަރުވަނަ ފަހަރަށް ވޯލްޑް ކަޕް ކާމިޔާބުކުރި ފަހުން، ބައިނަލްއަގުވާމީ ބޮޑު މުބާރާތެއްގެ ފައިނަލާ ހަމައަށް ދިއުމަށް ޖަރުމަނަށް ކުރިމަތިވި އިތުރު ނާކާމިޔާބީއެކެވެ. މުބާރާތް ފެށުމުގެ ކުރިން ނާގަލްސްމަން ބުނެފައި ވަނީ ޖަރުމަނަށް ފަސްވަނަ ފަހަރަށް ތަށި ހޯދައިދޭން ބޭނުންވާ ކަމަށެވެ.

މި މުބާރާތުގައި މިއަށްވުރެ ރަނގަޅު ނަތީޖާއެއް ހޯދުމުގެ ފުރުސަތު އޮތްކަން ފާހަގަކުރަމުން ނާގަލްސްމަން ބުނީ، ގަދަ 16ގެ ބުރުގައި ފްރާންސާ ދެކޮޅަށް ކުޅެ ޓީމުގެ ފެންވަރު ބަލާލަން ބޭނުންވި ކަމަށެވެ. ނަމަވެސް މިހާރު މުބާރާތުން ވަކިވާން ޖެހުމަކީ އެންމެ އެކަށީގެންވާ ނަތީޖާއެއް ނޫން ކަމަށް އޭނާ އެއްބަސްވިއެވެ.