ބަލިވުމުން ޓީމަށް މަރުހަބާ ވިދާޅުވި ޗާންސެލަރަށް އާންމުންގެ ނުރުހުން

ވޯލްޑް ކަޕްގައި ޕެރަގުއޭ އަތުން ލަދުވެތި ގޮތަކަށް ބަލިވެ ޖަރުމަނު ކެޓުމުން، އެ ގައުމުގެ ޗާންސެލަރ ފްރީޑްރިކް މާރޒް ފޮނުއްވި މަރުހަބާގެ މެސެޖަކާ ގުޅިގެން ޖަރުމަނު ރައްޔިތުން ވަރަށް ބޮޑަށް ރުޅިއައިސްފިއެވެ.

ހޯމަ ދުވަހުގެ ރޭ ޕެނަލްޓީ ޖަހައިގެން 4-3 އިން ބަލިވެ ޖަރުމަނު ކެޓިއިރު، އެ ޓީމުގެ ފަރާތުން ފެނުނު ދެރަ ކުޅުމާ އެކު ވެސް، މާރޒް ވިދާޅުވީ ކުޅުންތެރިންނާ މެދު "ފަޚުރުވެރިވާ" ކަމަށެވެ.

"މުބާރާތުން ކެޓުމުން ދެރަވި ނަމަވެސް: ކޮންފަދަ މޮޅު ކުޅުމެއް، !" އޭނާ އެކްސްގައި ލިޔުއްވާފައިވެ އެވެ.

"މި ވޯލްޑް ކަޕްގައި ތިޔަ ދެއްކި ހިތްވަރާއި ޓީމު ރޫހުން ތިޔަ ވަނީ އަހަރެމެންގެ ގައުމު އުފާކޮށްދީފައި. އަހަރެމެން ތިޔަ ކުޅުންތެރިންނާ މެދު ފަޚުރުވެރިވަން."

މި މެސެޖާ ގުޅިގެން ޖަރުމަނުގެ މީޑިއާތަކުން ވަނީ ވަރަށް ބޮޑަށް ފާޑުކިޔައިފަ އެވެ. މެދު-ކަނާތު ފިޔަހުގެ ނޫހެއް ކަމަށްވާ 'ޑީ ވެލްޓް' އިން އެ ގައުމުގެ ހާލަތު ސިފަކޮށްދެމުން ލިޔެފައިވާ ސުރުޚީއަކީ: "ޖަރުމަނަކީ މިހާރު ކުރީގެ ޖަރުމަނެއް ނޫން."

ޖަރުމަނުގެ މަޝްހޫރު ނޫހެއް ކަމަށްވާ 'ބިލްޑް' އިން ބުނި ގޮތުގައި ޗާންސެލަރަށް ގައުމުގެ ރައްޔިތުންގެ އިހުސާސްތައް އެއްގޮތަކަށް ވެސް ދެނެގަނެވިފައެއް ނުވެ އެވެ. އަދި ޖަރުމަނުގެ ވޯލްޑް ކަޕްގެ ކުޅުން އެ ނޫހުން ސިފަކުރީ ބޮޑު "ބަލާވެރިކަމެއް" ގެ ގޮތުގައެވެ.

"ޗާންސެލަރެވެ، އަޅުގަނޑު ފަޚުރުވެރިއެއް ނުވަން،" ބިލްޑްގެ އެޑިޓަރ-އިން-ޗީފް މާރިއަން ހޯން ލިޔުއްވާފައިވެ އެވެ. އޭނާ ވަނީ މާރޒްއާއި ޖަރުމަނުގެ ކޯޗު ޔޫލިއަން ނާގަލްސްމަން ވެސް މަގާމުން އިސްތިއުފާ ދިނުމަށް ގޮވާލާފައެވެ.

"އަހަރެން ހުރީ ރުޅިއައިސްފައި. އަހަރެން މާޔޫސްވެއްޖެ. އަހަރެން އިންތިހާއަށް ރުޅިއައިސްފި! އަހަރެމެންގެ ކުދިންނަށް ޖަރުމަނު އެނގެނީ ހަމައެކަނި ބަލިވާ ގައުމެއްގެ ގޮތުގައި!" އޭނާ އިތުރަށް ލިޔެފައިވެ އެވެ.

 "ޖަރުމަނުގެ ފުޓްބޯޅަ މިހާރު މިއޮތީ ހަމައެކަނި މާޒީގެ ރީތި ނަމެއްގެ މައްޗަށް ބިނާވެފައި."

މި ފަހަރުގެ ވޯލްޑް ކަޕުން އެ ގައުމު ބަލިވުމާއި، އެއީ އުފާކުރަންޖެހޭ ކަމެއްގެ ގޮތުގައި ޗާންސެލަރ ދެކެވަޑައިގަތުމަކީ ރައްޔިތުންނަށް ވަރަށް ބޮޑު ހިތްދަތިކަމެއް ލިބުނު ކަމެކެވެ. އެއީ ގައުމުގެ ހީނަރުކަމުން ފުޓްބޯޅަ ވެސް ސަލާމަތްނުވާކަން އޭގެއިން ހާމަވެގެންދާތީ އެވެ.

ނަމަވެސް، މި ލަދުވެތިކަން މިހިސާބުން ނިމުނީއެއް ނޫނެވެ. ރަޝިޔާއިން ވެސް މިހާރު ދަނީ މާރޒްގެ މި ވާހަކަތަކަށް މަލާމާތް ކުރަމުންނެވެ.

"މާރޒްއަކީ އަބަދުވެސް ނާކާމިޔާބީއަށް ހިތްވަރު ދިނުމުގައި ވަރަށް މޮޅު މީހެއް،" ވްލަޑިމިއަރ ޕޫޓިންގެ އިގްތިސާދީ މުޝީރު ކިރިލް ޑްމިޓްރިއޭވް، ޗާންސެލަރުގެ އަސްލު މެސެޖު ހިއްސާކުރައްވަމުން އެކްސްގައި ލިޔުއްވާފައިވެ އެވެ.