ޖަރުމަނު ބަލިކޮށް ޕެރަގުއޭ ދުނިޔެ ސިއްސުވާލައިފި

ހަތަރު ފަހަރުގެ ޗެމްޕިއަން ޖަރުމަނު 2026ގެ ވޯލްޑް ކަޕުން ކަޓައިފިއެވެ.

 އެއީ އިތުރު ވަގުތު ހަމަވިއިރު 1-1 އިން އެއްވަރުވެފައި އޮތުމުން، ފޯރިގަދަ ޕެނަލްޓީ ޝޫޓްއައުޓެއްގައި ޕެރަގުއޭ އަތުން ބަލިވުމުންނެވެ.

އާސެނަލްގެ ފޯވާޑް ކައި ހާވާޓްޒްއާއި ނިއުކާސަލްގެ ނިކް ވޮލްޓެމޭޑް ފޮނުވާލި ޕެނަލްޓީތައް ޕެރަގުއޭގެ ގޯލްކީޕަރު އޮރްލަންޑޯ ގިލް ވަނީ ދިފާއުކޮށްފައެވެ.

ނަމަވެސް، އެންޓޯނިއޯ ސަނާބްރިއާ ފޮނުވާލި ހަމަލާ ބޭރަށް ދިއުމާއި، ފަބިއަން ބަލްބުއޭނާ ފޮނުވާލި ޕެނަލްޓީ 40 އަހަރުގެ މެނުއަލް ނޯޔާ ދިފާއުކުރުމުން، މެޗުން މޮޅުވާން ޕެރަގުއޭއަށް ލިބުނު ދެ ފުރުސަތެއް ބޭކާރުވިއެވެ.

އެހެންނަމަވެސް، ސަޑަން ޑެތްގައި ޖަރުމަނުގެ ޖޮނަތަން ޓާ ފޮނުވާލި ޕެނަލްޓީ ގޯލާ އަމާޒުނުވެ މަތިން ދިޔައިރު، ޕެރަގުއޭގެ ޑިފެންޑަރު ހޯސޭ ކަނާލޭ ކާމިޔާބުކުރި ޕެނަލްޓީއާއެކު 4-3 ގެ ނަތީޖާއަކުން ޕެރަގުއޭ މޮޅުވެ، މުބާރާތުގެ ކުރިއަށް ދަތުރުކުރިއެވެ.

މީގެކުރިން ޕްރިމިއާ ލީގުގެ ބްރައިޓަންއާއި އިޕްސްވިޗަށް ކުޅުނު ހޫލިއޯ އެންސީސޯ ވަނީ މެޗުގެ 42 ވަނަ މިނެޓުގައި ބޮލުން ގޯލެއް ޖަހައި، ހައިރާންކުރުވަނިވި ގޮތަކަށް ޕެރަގުއޭއަށް ކުރިހޯދައިދީފައެވެ.

ނަމަވެސް ދެވަނަ ހާފުގައި ޖަރުމަނުން ކުޅުން ރަނގަޅުކޮށް، ލިވަޕޫލްގެ މިޑްފީލްޑަރު ފްލޮރިއަން ވާޓްޒް ނަގައިދިން ހުރަހަކުން ހާވާޓްޒް ބޮލުން ފޮނުވާލި ބޯޅައަކުން މެޗުގެ ނަތީޖާ އެއްވަރުކުރިއެވެ.

ޕެރަގުއޭއިން މޮޅަށް ދިފާއުކޮށް މެޗު އިތުރު ވަގުތަށް ގެންދިޔައިރު، ޓާ ބޮލުން ޖެހި ގޯލާއެކު ޖަރުމަނުން މެޗު ކާމިޔާބުކުރެވުނު ކަމަށް ހީކުރިއެވެ. ނަމަވެސް ވަލްޑެމާ އެންޓަން، ކީޕަރު ގިލްއަށް ފައުލްކުރި ކަމަށް ނިންމައި ރެފްރީ އެ ގޯލު ބަލައިނުގަތެވެ.

ޕެނަލްޓީ ޝޫޓްއައުޓްގައި ފުރަތަމަ ޕެނަލްޓީ ޖެހީ ޖަރުމަނުންނެވެ. ނަމަވެސް ހާވާޓްޒް ޖެހި ފުރަތަމަ ޕެނަލްޓީ ނާކާމިޔާބުވެ، އޭގެ ފަހުން ވޮލްޓެމޭޑް ޖެހި ޕެނަލްޓީ ވެސް ނާކާމިޔާބުވުމުން ޖަރުމަނަށް ކުރިހޯދޭ ގޮތެއް ނުވިއެވެ. ޕެރަގުއޭއަށް މެޗު ކާމިޔާބުކުރަން ލިބުނު ދެ ފުރުސަތެއް ބޭކާރުވިޔަސް، ތިންވަނަ ފުރުސަތުގައި ކަނާލޭ ވަރަށް ހަމަޖެހިލައިގެން ހުރެ ޕެނަލްޓީ ކާމިޔާބުކޮށް، ބޮޑު އުފާފާޅުކުރުމެއް ފެށިއެވެ.

ގަދަ 16ގެ މެޗުގައި ފިލަޑެލްފިއާގައި ހޮނިހިރު ދުވަހު ޕެރަގުއޭ ބައްދަލުކުރާނީ ދެ ފަހަރުގެ ޗެމްޕިއަން ފްރާންސް ނުވަތަ 1958 ގެ ރަނަރަޕް ސުވީޑަންއާއެވެ.

ވޯލްޑް ކަޕްގެ ޕެނަލްޓީ ޝޫޓްއައުޓަކުން ޖަރުމަނު ފުރަތަމަ ފަހަރަށް ބަލިވުން

ޖަރުމަނުން ވަނީ 1954، 1974، 1990 އަދި 2014 ވަނަ އަހަރު ވޯލްޑް ކަޕް ކާމިޔާބުކޮށްފައެވެ. ނަމަވެސް އެންމެ ފަހުގެ ކާމިޔާބީއަށް ފަހު ޖެހިޖެހިގެން ތިން މުބާރާތުގައި އެޓީމަށް ވަނީ ނާކާމިޔާބީއާ ކުރިމަތިލާން ޖެހިފައެވެ.

2018ވަނަ އަހަރު މެކްސިކޯ އާއި ސައުތު ކޮރެއާ އަތުން ބަލިވެ ގްރޫޕްގެ ފުލަށް ދިޔައިރު، 2022 ވަނަ އަހަރު ޖަޕާން އަތުން ބަލިވެ ގްރޫޕްގެ ތިންވަނަ ލިބުމުން ގްރޫޕް ސްޓޭޖުން ވަނީ ކަޓާފައެވެ.

މި އަހަރުގެ މުބާރާތުން ކެޓުމަކީ ވޯލްޑް ކަޕްގައި ޖަރުމަނަށް ލިބުނު އަނެއް ލަދުވެތި ނަތީޖާއެވެ. އެއީ މުބާރާތް ފެށުނުއިރު ފީފާ ރޭންކިންގެ 41 ވަނައިގައި އޮތް، އަދި ޖަރުމަނަށްވުރެ 31 ދަރަޖަ ފަހަތުގައި އޮތް ޕެރަގުއޭ އަތުން ބަލިވުމުންނެވެ.

ފުރަތަމަ މެޗުގައި އެމެރިކާ އަތުން 4-1 އިން ޕެރަގުއޭ ބަލިވި ނަމަވެސް، އޭގެ ފަހުން ހެޑް ކޯޗު ގުސްޓާވޯ އަލްފާރޯ ވަނީ އެޓީމުގެ ދިފާއު ވަރުގަދަކޮށް، ގޯލެއް ޖަހަން އުނދަގޫ ޓީމަކަށް ހަދައި، ގްރޫޕް ޑީ ގެ ތިންވަނަ ހޯދައިދީފައެވެ.

ކަނާލޭ އާއި ގުސްޓާވޯ ގޯމޭޒްގެ ސެންޓްރަލް ޑިފެންސް ޕާޓްނަޝިޕުން މޮޅު ކުޅުމެއް ދެއްކިއިރު، ވަރަށް ފަހަތަށް ޖެހިގެން މުޅި ޓީމު ދިފާއުކުރަމުންދިޔަ ޕެރަގުއޭގެ ސަބަބުން ޖަރުމަނަށް ވަނީ ގިނަ ހުރަސްތަކެއް ކުރިމަތިވެފައެވެ.

ބަލަން އެހާ ހިތްގައިމު ކުޅުމެއް ނޫން ނަމަވެސް، މެޗު ޕެނަލްޓީއާ ހަމައަށް ގެންދިއުމުގައި މި އުކުޅު ކާމިޔާބުވިއެވެ. އަދި 6 ފޫޓު 6 އިންޗީގެ ކީޕަރު ގިލް ވެގެންދިޔައީ ޕެރަގުއޭގެ ބަތަލަށެވެ.

މިއީ ވޯލްޑް ކަޕްގެ ތާރީޚުގައި ޖަރުމަނުން ޖެހި ފަސް ޕެނަލްޓީ ޝޫޓްއައުޓްގެ ތެރެއިން އެޓީމު ބަލިވި ފުރަތަމަ ފަހަރެވެ.

ބޮޑު މުބާރާތެއްގައި މީގެކުރިން ޖަރުމަނު ޕެނަލްޓީން ބަލިވެފައިވަނީ ހަމައެކަނި 1976ވަނަ އަހަރުގެ ޔޫރަޕިއަން ޗެމްޕިއަންޝިޕް ފައިނަލްގައެވެ. އެފަހަރު ޗެކޮސްލޮވޭކިއާ މޮޅުވީ، މިހާރު އޭނާގެ ނަމުން މަޝްހޫރުވެފައިވާ ސްޓައިލަށް، އެންޓޮނިން ޕެނެންކާ ގޯލުގެ މެދަށް ފޮނުވާލި ޗިޕް ޕެނަލްޓީއަކުންނެވެ.