ފީފާ ވޯލްޑް ކަޕް ފުޓްބޯޅަ މުބާރާތުގެ ގްރޫޕް އޭގައި ޗެކިއާ އަތުން 3-0އިން މެކްސިކޯ މޮޅުވި މެޗުގައި، އެ ގައުމުގެ ކުޅުންތެރިން ދެއްކި މޮޅު ކުޅުމަށް ކޯޗު ހާވިއޭ އެގުއެރޭ ވަރަށް ބޮޑަށް ތައުރީފްކޮށްފިއެވެ.
މެޗަށް ފަހު ނޫސްވެރިންނާ ވާހަކަދައްކަމުން އޭނާ ވަނީ މިއީ ހުރިހާ ފަރާތްތަކަކަށް ވެސް ލިބުނު ވަރަށް ބޮޑު ހިތްހަމަޖެހުމެއްކަން ފާހަގަކޮށްފައެވެ.
މެކްސިކޯގެ ކޯޗު އެގުއެރޭ ބުނި ގޮތުގައި މެޗުގެ ފުރަތަމަ ކޮޅުގައި އެޓީމުގެ ކުޅުން އެންމެ ރަނގަޅެއް ނޫނެވެ. ނަމަވެސް، ސަޕޯޓަރުންގެ ހިތްހަމަނުޖެހުންތައް ފާޅުކުރަން ފެށުމާ އެކު، ކުޅުންތެރިން ހިތްވަރުކޮށް ކުޅުން ރަނގަޅުކުރި ގޮތަށް ތައުރީފް ހައްގު ކަމަށް އޭނާ ބުންޏެވެ. އަދި މިއީ މި މުބާރާތުގައި އެޓީމުން ކުޅުނު ފުރަތަމަ ދެ މެޗަށް ވުރެ މާ ރަނގަޅަށް ކުޅުނު މެޗެއްގެ ގޮތުގައި އޭނާ ސިފަކުރިއެވެ.
މި މެޗުގައި މެކްސިކޯގެ މުހިންމު ދެ ކުޅުންތެރިން ކަމަށްވާ ލުއިސް އެންޖެލް މަލަގޯންއާއި މާސެލް ރުއިޒްއަށް އަނިޔާވުމުން ޓީމަށް އޭގެ އަސަރު ކުރި ކަމަށް އެގުއެރޭ ފާހަގަކުރިއެވެ. މީގެ އިތުރުން، ދެވަނަ ހާފުގައި ތަޖުރިބާކާރު ގޯލްކީޕަރު ގިޔެރުމޯ އޮޗޯއާ ކުޅެން އެރުވުމާ ގުޅޭގޮތުން އޭނާ ބުނީ، އެއީ ކުއްލިއަކަށް ނިންމި ނިންމުމެއް ކަމަށާއި، އޮޗޯއާއަށް މިފަހަރުގެ ވޯލްޑް ކަޕްގައި ކުޅުމުގެ ފުރުސަތު ދޭން ބޭނުންވީ ކަމަށެވެ.
މެޗުން ބަލިވުމަށްފަހު ޗެކް ގެ ކޯޗު މިރޮސްލާވް ކޫބެކް ބުނީ، އޭނާގެ ކުޅުންތެރިންގެ ފަރާތުން ފެނުނު ކުޅުމުގެ ސަބަބުން މެކްސިކޯއަށް މެޗު ފަސޭހަވެގެންދިޔަ ކަމަށެވެ. ހާއްސަކޮށް ދެވަނަ ހާފުގައި ޗެކްގެ ކުޅުންތެރިންނަށް ހެދުނު ބޮޑެތި ގޯސްތަކުގެ ފައިދާ މެކްސިކޯއިން ފުރިހަމައަށް ހިފިކަން ކޫބެކް ފާހަގަކުރިއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.