އެމެރިކާއާއި ކެނެޑާ އަދި މެކްސިކޯ ގުޅިގެން ބޭއްވި 2026ވަނަ އަހަރުގެ ފީފާ ވޯލްޑް ކަޕަކީ ކުށުގެ ވެށި އަމާންވުމާއި މާލީގޮތުން ބޮޑު ފައިދާއެއް ހޯދުމުގެ ސަބަބުން މިހާތަނަށް ބޭއްވި އެންމެ ފުރިހަމަ މުބާރާތްކަމަށް އެމެރިކާގެ ރައީސް ޑޮނަލްޑް ޓްރަމްޕް ސިފަކުރައްވައިފިއެވެ.
ވައިޓް ހައުސްގެ އޯވަލް އޮފީހުގައި ލުބްނާނުގެ ރައީސާ ބައްދަލުކުރެއްވުމަށް ފަހު ނޫސްވެރިންނަށް މައުލޫމާތު ދެއްވަމުން ދެއްކެވި ވާހަކައިގައި ޓްރަމްޕް ވަނީ މި ބޮޑު މުބާރާތުގެ ދުވަސްވަރު އެއްވެސް މުޒާހަރާއެއް ނުވަތަ ކުށުގެ އަމަލެއް ހިނގާފައި ނުވާކަން ފާހަގަކުރައްވައި އެމެރިކާގެ ރައްޔިތުން ދެއްކި އެކުވެރިކަމާއި އެއްބައިވަންތަކަމަށް ވަރަށް ބޮޑަށް ތައުރީފުކުރައްވާފައެވެ. އަދި މުބާރާތުގެ ކޮންމެ މެޗެއް ވެސް ކުރިއަށްދިޔައީ އެމެރިކާގެ އެންމެ މަޝްހޫރު ކުޅިވަރު އިވެންޓް ކަމަށްވާ "ސުޕަރ ބޯލް"އާ އެއް ފެންވަރެއްގެ ފޯރީގައި ކަމަށް އެމަނިކުފާނު ވިދާޅުވިއެވެ. މީގެ އިތުރުން، މިއީ ތާރީޚުގައި ވެސް އެންމެ ބޮޑު މާލީ މަންފާއެއް ލިބުނު އަދި އެންމެ ފުރިހަމައަށް ނިންމާލެވުނު ވޯލްޑް ކަޕްކަމަށް އެމަނިކުފާނު ކަށަވަރުކޮށްދެއްވިއެވެ.
ދުނިޔޭގެ އެކި ކަންކޮޅުތަކުން އެމެރިކާއާ މެދު ދެކޭ ގޮތް މި މުބާރާތުގެ ސަބަބުން ބަދަލުވެގެން ހިނގައްޖެކަން ރައީސް ޓްރަމްޕް ފާހަގަކުރެއްވިއެވެ. މިގޮތުން ނޯވޭ އަދި ސްކޮޓްލެންޑުގެ ސަޕޯޓަރުންގެ ފަރާތުން އެމެރިކާއަށް އޮތް ލޯބި ހާމަވެގެންދިޔަ ކަމަށާއި، މުބާރާތް ނިމުމުން އެމީހުން އެނބުރި ޤައުމަށް ދާން ބޭނުން ނުވިކަމަށް ވެސް ވިދާޅުވިއެވެ. މުބާރާތުގެ ފަހު ވަގުތާ ހަމައަށް ވެސް މި ކާމިޔާބީގެ ވާހަކަ ހާމަނުކުރައްވައި މަޑުކުރެއްވީ އެންމެ ފަހު ވަގުތު ވެސް ކަމެއް ގޯސްވެދާނެކަމުގެ ބިރަށް ޓަކައިކަމަށް ޓްރަމްޕް ވިދާޅުވިއެވެ.
މުސްތަޤުބަލުގައި އަލުން މި ފަދަ ބޮޑު މުބާރާތެއް އެމެރިކާގައި ބޭއްވުމުގެ ޝައުޤުވެރިކަން ފާޅުކުރައްވަމުން ޓްރަމްޕް ވިދާޅުވީ، ވޯލްޑް ކަޕް އަނބުރާ ގެނައުމަށް ކެތްމަދުވެފައިވާ ކަމަށެވެ. އެހެން ނަމަވެސް، ވިދިގެން އަންނަ މުބާރާތް ހޯސްޓްކުރުމުގެ ފުރުސަތު އެމެރިކާއަށް ލިބިދާނެކަމަށް ޤަބޫލުފުޅު ނުކުރައްވާ ކަމަށް ވެސް އެމެރިކާގެ ރައީސް ވަނީ ވިދާޅުވެފައެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.