ވޯލްޑްކަޕްގައި ބެލްޖިއަމް ފެއިލްވުމުގެ ޒިންމާ މެޑިކަލް ޓީމުގެ ބޮލަށް!

އެމެރިކާ، ކެނެޑާ އަދި މެކްސިކޯގައި ކުޅުނު 2026ވަނަ އަހަރުގެ ފީފާ ވޯލްޑް ކަޕްގައި ބެލްޖިއަމް ގައުމީ ޓީމަށް ކުރިމަތިވި ނާކާމިޔާބީގެ މައިގަނޑު ސަބަބަކީ އެ ޓީމުގެ ސިއްހީ ކަންކަމާ ހަވާލުވެތިބި އޮފިޝަލުންގެ ފަރުވާކުޑަކަން ކަމަށް، އެ ޓީމަށް ކުރިން އިރުޝާދުދިން ރޫޑީ ގާސިއާ ބުނެފިއެވެ.

މުބާރާތް ނިމުމާ އެކު މަގާމުން ވަކިވި ގާސިއާ، ބްރަސަލްސްގެ މީޑިއާއަކަށް ދިން އިންޓަވިއުއެއްގައި ހާމަކުރިގޮތުގައި، ކުއާޓަރ ފައިނަލާ ހަމައަށް ޓީމު ދަތުރުކުރި ނަމަވެސް، ކުޅުންތެރިންނަށް ލިބުނު އަނިޔާތަކަށް ފަރުވާދިނުމުގައި ޑޮކްޓަރުން ހެދި ގޯސްތަކުގެ ސަބަބުން މުޅި ކެމްޕެއިނަށް ބޮޑެތި ނުރައްކާތަކާ ކުރިމަތިލާން ޖެހުނެވެ. މިއީ މުބާރާތަށްފަހު އޭނާ މީޑިއާއާ ވާހަކަދެއްކި ފުރަތަމަ ފަހަރެވެ.

އެގޮތުން އެންމެ ބޮޑު މައްސަލައެއްގެ ގޮތުގައި އޭނާ ފާހަގަކުރީ، މުހިންމު ފޯވާޑް ޖެރެމީ ޑޯކޫގެ ފުއްޕާމެޔަށް ފެން އެޅި، އިމަޖެންސީގައި ފަރުވާދޭން ޖެހުނު ހާދިސާއެވެ. ގާސިއާ ބުނީ އޭގެ ހަފްތާއެއް ކުރިން ޑޯކޫ ސްކޭން ކުރުމަށް އޭނާ އެދުނު ނަމަވެސް، އެންޓިބަޔޮޓިކް ދީފައި ހުރިކަމަށް ބުނެ ޓީމުގެ ޑޮކްޓަރު އެކަމަށް އިންކާރުކުރި ކަމަށެވެ. ނަމަވެސް އޭގެ ހަ ދުވަސް ފަހުން ޑޯކޫގެ ހާލަތު ގޯސްވެ ހޮސްޕިޓަލުގައި އެޑްމިޓްކުރަން މަޖުބޫރުވީކަން ގާސިއާ ކިޔައިދިނެވެ.

ޑޯކޫގެ އިތުރުން ޓީމުގެ ކެޕްޓަން ޔޫރީ ޓީލަމެންސް އާއި ޗާލްސް ޑި ކެޓެލެއާ އަދި ޒެނޯ ޑެބާސްއަށް ދިމާވި އަނިޔާގެ މައްސަލަތަކުގައި ވެސް މެޑިކަލް ޓީމުގެ އިހުމާލު އޮތްކަމަށް އޭނާ ތުހުމަތުކުރިއެވެ. މި ބޮޑެތި ތުހުމަތުތަކާ ގުޅިގެން ބެލްޖިއަމްގެ ފުޓްބޯޅަ އިދާރާއިން މިހާތަނަށް އެއްވެސް ރައްދެއް ދީފައެއް ނުވެއެވެ.

މި ފަހަރުގެ ވޯލްޑް ކަޕްގައި ބެލްޖިއަމްގެ ފެށުން ދިޔައީ ވަރަށް އާދައިގެ ގޮތަކަށެވެ. އިރާގާއި މިސްރާ ވާދަކޮށް އެއްވަރުވި ނަމަވެސް، ނިއުޒީލެންޑް އަތުން 5-1އިން މޮޅުވެ، ފައިދާ ގޯލުގެ ތަފާތުން އެ ޓީމުން ގްރޫޕްގެ ކުރި ހޯދިއެވެ. އޭގެ ފަހުން ގަދަ 16ގައި ސެނެގޯލްގެ މައްޗަށް ކުރިހޯދީ ފަހަތުން އަރައި ލަނޑު ޖަހައިގެންނެވެ. މުބާރާތުގައި އެ ޓީމުގެ ފަރާތުން އެންމެ މޮޅު ކުޅުމެއް ފެނިގެންދިޔައީ އެމެރިކާއާ ދެކޮޅަށް ކުޅުނު މެޗުގައެވެ.

މައްސަލަތަކެއް ހުރި ނަމަވެސް، ގާސިއާ ގަބޫލުކުރާ ގޮތުގައި އޭނާގެ ދައުރުގައި ކުރެވުނު މަސައްކަތްތަކާމެދު ފުރިހަމައަށް ހިތްހަމަޖެހެއެވެ. ލުކާކޫ، ކޯޓުއާ އަދި ޑި ބްރޭނާ ފަދަ ތަޖުރިބާކާރު ކުޅުންތެރިންނާއެކު ދުނިޔޭގެ ފުޓްބޯޅައިގެ ޗާޓުގެ ކުރީ ސަފަށް ބެލްޖިއަމް އަލުން ގެނެސްދެވުނުކަމުގެ ފަޚުރު އޭނާ އިހުސާސްކުރެއެވެ. ގާސިއާ ބުނީ ކޯޗުކަމުން އޭނާ ވަކިވީ އެއްވެސް ރުޅިވެރިކަމެއް ނެތި ކަމަށެވެ. އައު ކޮންޓްރެކްޓެއް ލިބުނުނަމަ، 18މަސްދުވަހު އެކުގައި އުޅުނު ކުޅުންތެރިންނާ މެދު އޮތް ގާތްކަމެއްގެ ސަބަބުންނާއި އަމިއްލަ ފަސޭހައަށް ޓަކައި މަޑުކުރެވުނީސް ކަމަށް ވެސް އޭނާ އިއުތިރާފުވިއެވެ.

ގާސިއާގެ ބަދަލުގައި ބެލްޖިއަމްގެ ގައުމީ ޓީމުގެ ހެޑް ކޯޗުގެ މަގާމަށް މިހާރު ވަނީ ނެދަލެންޑްސްގެ ކުރީގެ މަޝްހޫރު ކުޅުންތެރިޔާ މާކް ވެން ބޮމެލް ހަމަޖައްސާފައެވެ.