ނަފުރަތާއި ދޮގު ފަތުރާތީ އިންފަންޓީނޯގެ ވަރުގަދަ ރައްދެއް!

އެމެރިކާ، ކެނެޑާ އަދި މެކްސިކޯގައި ނިމިގެންދިޔަ 2026ވަނަ އަހަރުގެ ވޯލްޑް ކަޕަކީ ސުލްހަވެރި އަދި ކާމިޔާބު މުބާރާތެއްކަން ފާހަގަކުރައްވައި، އެ މުބާރާތާ މެދު ނަފުރަތާއި ދޮގު ވާހަކަތައް ފަތުރާ ފަރާތްތަކަށް ފީފާގެ ރައީސް ޖިއާނީ އިންފަންޓީނޯ މިއަދު ވަރަށް ބޮޑަށް ފާޑުވިދާޅުވެއްޖެއެވެ. 

އުމުރުފުޅުން 56އަހަރުގެ ފީފާގެ ރައީސް މިއަދު އާންމުކުރެއްވި ބަޔާނެއްގައި ވިދާޅުވީ، ސްޕެއިންއިން ޗެމްޕިއަންކަން ހޯދި މި މުބާރާތަކީ ދުނިޔޭގެ އެކި ކަންކޮޅުތަކުން އެތައް މިލިއަން ބަޔަކަށް އުފާވެރިކަމާއި އެކުވެރިކަން ގެނެސްދިން ތާރީޚީ ހަރަކާތެއް ކަމަށެވެ. ނަމަވެސް، ފާޑުކިޔާ މީހުން ތިބީ ނަފުރަތުގެ ތެރޭގައި ޣަރަޤުވެފައި ކަމަށާއި، އެހެންކަމުން މުބާރާތުގެ ފުރިހަމަކަމާއި ރީތިކަން އެފަރާތްތަކަށް ނުފެންނަ ކަމަށް އޭނާ ވިދާޅުވިއެވެ. ކީބޯޑުތަކުގެ ފަހަތުގައި ފިލާތިބެގެން ބައެއް ފަރާތްތަކުން ދޮގު އިލްޒާމުތައް އަޅުވަމުންދާއިރު، ފީފާއިން އިސް ސަފުގައި ނުކުމެ މަސައްކަތްކުރީ އެއްވެސް ހަމަނުޖެހުމެއް ނެތް، ސަތޭކަ އިންސައްތަ އަމާން ކުޅިވަރު އީދެއް ގެނެސްދިނުމަށްކަން އޭނާ ފާހަގަކުރެއްވިއެވެ.

މުބާރާތް ކުރިއަށްދިޔައިރު ގިނަ ފާޑުކިޔުންތަކެއް އަމާޒުވި މައްސަލަތަކުގެ ތެރޭގައި އެމެރިކާގެ ވިސާ ނުލިބުމުގެ ދަތިތަކާއި، ބައެއް މެޗުތަކުގެ ރެފްރީންގެ ނިންމުންތައް ހިމެނެއެވެ. ޚާއްޞަކޮށް އާޖެންޓީނާ އާއި މިސްރު ކުޅުނު މެޗުގެ ނިންމުންތަކާއި، ފޮލަރިން ބަލޮގަންއަށް ދެއްކި ރަތް ކާޑާ ގުޅިގެން އައި ސަސްޕެންޝަން، އެމެރިކާގެ ރައީސް ޑޮނަލްޑް ޓްރަމްޕްގެ އެދިވަޑައިގަތުމަކަށް ފީފާއިން ލުއިކޮށްދިނުން ފަދަ ކަންކަމުގައި ބޮޑެތި ބަހުސްތަކެއް އުފެދުނެވެ. މިކަންކަމަށް ނުސީދާކޮށް ރައްދުދެއްވަމުން އިންފަންޓީނޯ ވިދާޅުވީ، ކާޑު ދެއްކުމުގައި ހެދޭ ގޯސްތަކާއި ވަކި ހާލަތްތަކުގައި އަދަބު ލުއިކޮށްދިނުމަކީ ދުނިޔޭގެ އެންމެ މަޝްހޫރު ލީގުތަކުގައި ވެސް ހިނގާ، ބަލައިގަނެފައިވާ އާންމު ކަންކަން ކަމަށެވެ. އަދި އެފަދަ އުސޫލުތައް ގެންގުޅޭ ޤައުމުތަކުން ފީފާއަށް ފާޑުކިޔުމަކީ ހައިރާންވާންޖެހޭ ކަމެއް ކަމަށް އޭނާ ވިދާޅުވިއެވެ.

މީގެ އިތުރުން، މި މުބާރާތުން ފެނިގެންދިޔައީ ފުޓްބޯޅައިގެ ސަބަބުން ބައިބައިވުންތައް ނައްތާލައި ޤައުމުތައް ގުޅުވައިދިން މަންޒަރުކަމަށް އިންފަންޓީނޯ ވިދާޅުވިއެވެ. ސިޔާސީ ގޮތުން ބޮޑެތި ދެބަސްވުންތައް އޮންނަ އީރާނާއި އެމެރިކާ ފަދަ ޤައުމުތައް ވެސް ފުޓްބޯޅައިގެ ތެރެއިން ގުޅިގެންދިޔަކަމާއި، އެއްވެސް ހަމަނުޖެހުމަކާ ނުލައި އީރާނު ޓީމަށް އެމެރިކާއަށް އެތެރެވެވުނުކަން އޭނާ ފާހަގަކުރެއްވިއެވެ. އަދި ހެއިޓީގެ ދާޚިލީ ހަނގުރާމައާއި ކޮންގޯގެ އެބޯލާގެ ބިރުވެރިކަމުގެ ތެރެއިން ވެސް އެ ޤައުމުތަކަށް ވިސާ ހަމަޖެހި، މުބާރާތުގައި ބައިވެރިވެވުނުކަން އޭނާ ހަނދާންކޮށްދެއްވިއެވެ. އެހެންނަމަވެސް، ސޯމާލިއާގެ ރެފްރީ އޮމާރް އަރްޓާން އަތުގައި ސައްހަ ވިސާއެއް އޮވެމެ، އެމެރިކާއަށް އެތެރެވިޔަ ނުދިން މައްސަލައެއް ވެސް މުބާރާތުގެ ތެރޭގައި ފެންމަތިވެފައިވެއެވެ.

އިންފަންޓީނޯގެ ބަޔާން ނިންމަވާލައްވަމުން ގޮވާލެއްވީ، މިއީ ސިޔާސީ ކަމެއްގެ ގޮތުގައި ނުދެކި، ފުޓްބޯޅައަކީ ސުލްހައިގެ ރަމްޒެއްގެ ގޮތުގައި ބަލައިގަތުމަށެވެ. އަދި ފާޑުކިޔާ ފަރާތްތަކުން ގަލަންތަކާއި ކީބޯޑުތަކާ ދުރަށްޖެހި، މުބާރާތުގައި ވާދަކުރި ޓީމުތަކުގެ ބުރަ މަސައްކަތަށް އިހުތިރާމު ކުރުމަށް އޭނާ ވަނީ އިލްތިމާސްކުރައްވާފައެވެ.