މެޗުގެ ދެވަނަ ހާފުގައި އެންތަނީ އެލަންގާ ކާމިޔާބުކުރި ހިތްގައިމު ގޯލާ އެކު، ފަހަތުން އަރައި ޖަޕާނާ އެއްވަރުކޮށް ސްވިޑަންއިން މުބާރާތުގެ ގަދަ 32ގެ ޖާގައެއް ކަށަވަރުކޮށްފިއެވެ.
ގްރަހަމް ޕޮޓާގެ އިރުޝާދުގެ ދަށުން ކުޅޭ ސްވިޑަން އޮތީ ހަތަރު ޕޮއިންޓާ އެކު ގްރޫޕް އެފްގެ ތިންވަނައިގައެވެ. މިއީ އެޓީމު އަނެއް ބުރަށް ދިއުމަށް ފުދޭ މިންވަރެކެވެ.
ޖަޕާން ގްރޫޕްގެ ދެވަނަ ހޯދީ ނެދަލަންޑްސްގެ ފަހަތުންނެވެ. ނެދަލަންޑްސްއިން ވަނީ ފަސޭހަކަމާއެކު ޓިއުނީޝިއާ ބަލިކޮށްފައެވެ. ގަދަ 32ގައި ޖަޕާން ބައްދަލުކުރަން ޖެހޭނީ ފަސް ފަހަރުގެ ވޯލްޑް ކަޕް ޗެމްޕިއަން ބްރެޒިލްއާއެވެ.
ސެލްޓިކްގެ ޑައިޒެން މައެޑާ މެޗުގެ 56ވަނަ މިނެޓުގައި ޖަޕާނަށް ލީޑު ހޯދައިދިނީ ރީތި ކުޅުމަކަށް ފަހުއެވެ. މި ގޯލު ޖެހުމުގައި އަޔާސޭ އުއެޑާ އަދި ރިޓްސޫ ދޯއާން ވަނީ ވަން-ޓޫ އެއް ކުޅެފައެވެ.
މެޗުގެ ފުރަތަމަ ހާފު ފެނުނީ ފާޑަކަށް ފިނިކޮށެވެ. ދެ ޓީމުން ވެސް ލަނޑެއް ނުޖެހި އެއްވަރުވެގެން ނިންމާލަން ބޭނުންވެފައި ތިބި ކަހަލައެވެ.
ނަމަވެސް، ދެވަނަ ހާފު ފެށިގެން ކުޅުން ބަދަލުވެގެންދިޔައެވެ. ޖަޕާނުން ގޯލު ޖެހިތާ ހަ މިނެޓު ތެރޭގައި އެލަންގާ ވަނީ ސްވިޑަންއަށް ނަތީޖާ އެއްވަރުކޮށްދީފައެވެ.
މި ފަހަރުގެ ވޯލްޑް ކަޕްގައި ފުރަތަމަ ފަހަރަށް ފެށި އެގާރައިގައި ހިމެނިގެން ކުޅުނު ނިއުކާސަލް ޔުނައިޓެޑްގެ ވިންގާ، ވާތްފަރާތުން އެތެރެއަށް ވަދެ ފޮނުވާލި ބާރު ހަމަލާ އަމާޒުވީ ޖަޕާނުގެ ކީޕަރު ޒިއޯން ސުޒުކީއަށް ދިފާއުނުކުރެވޭ ގޮތަށް ގޯލުގެ ކަނަށެވެ. ކީޕަރަށް އެ ބޯޅަ ފެނުނީ މާ ލަހުންނެވެ.
ދެވަނަ ހާފުގެ ހައިޑްރޭޝަން ބްރޭކަށްފަހު މެޗުގެ ދުވެލި ކުޑަކޮށް މަޑުޖެހުނު ނަމަވެސް، އިތުރު ވަގުތުގެ ތެރޭގައި އެލަންގާ އާއި އަލެކްސަންޑަ އިސާކް ފޮނުވާލި ދެ ހަމަލާއެއް ކީޕަރު ސުޒުކީ ވަނީ ހުޝިޔާރުކަމާއެކު ދިފާއުކޮށްފައެވެ.
ހޫސްޓަން ސްޓޭޑިއަމްގައި ހޯމަ ދުވަހުގެ ރޭ 18:00 BST ގައި ޖަޕާން ނުކުންނާނީ ގްރޫޕް ސީގެ އެއްވަނަ ހޯދި ބްރެޒިލްއާ ދެކޮޅަށެވެ.
ސްވިޑަން ގަދަ 32ގައި ވާދަކުރަންޖެހޭ ޓީމެއް އަދި ކަށަވަރެއް ނުވެއެވެ. ނަމަވެސް މިހާރު އޮތް ގޮތުން އަންގާރަ ދުވަހު އެޓީމު ނުކުންނަން ޖެހޭނީ ފްރާންސާ ދެކޮޅަށެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.