ފީފާ ވޯލްޑް ކަޕް ފުޓްބޯޅަ މުބާރާތުގެ 32ޓީމު ވާދަކުރާ ބުރުގައި ޖަޕާނާ ދެކޮޅަށް ކުޅުނު މެޗަކީ، މިހާތަނަށް ބްރެޒިލްގެ ފަރާތުން ފެނިގެންދިޔަ އެންމެ ފުރިހަމަ އަދި އެންމެ މޮޅު ކުޅުން ފެނުނު މެޗު ކަމަށް އެޓީމުގެ ކޯޗު ކާލޯ އެންޗެލޯޓީ ބުނެފިއެވެ.
މެޗަށް ފަހު ވާހަކަދައްކަމުން އޭނާ ވަނީ، މި މެޗުގައި ކުޅުންތެރިން ދެއްކި ހިތްވަރަށް ތައުރީފުކޮށްފައެވެ.
އެންޗެލޯޓީ ފާހަގަކުރި ގޮތުގައި މެޗުގެ ފުރަތަމަ ހާފުގައި ޖަޕާނުގެ ވަރުގަދަ ޑިފެންސްގެ ސަބަބުން ބްރެޒިލަށް ގިނަ ހުރަސްތަކަކާ ކުރިމަތިވެ، ހަމަލާތައް ހުއްޓުވުނެވެ. ނަމަވެސް، ދެވަނަ ހާފުގައި އެ މައްސަލަތަކަށް ހައްލު ހޯދައި، މެޗުގެ ތެރެއިން ކަންކަން ރަނގަޅުކުރުމަކީ ޓީމަށް ލިބުނު ބޮޑު ކުރިއެރުމެކެވެ. މީގެ އިތުރުން، މެޗުގެ 60ވަނަ މިނެޓާ ހަމައަށް ލަނޑެއް ނުޖެހުނު ނަމަ ނޭމާ ކުޅެން އެރުވުމަށް ނިންމާފައިވާނެ ކަމަށާއި، އިތުރު ވަގުތު ކުޅެން ޖެހުނު ނަމަވެސް އޭނާ ބޭނުންކުރާނެ ކަމަށް އެންޗެލޯޓީ ހާމަކުރިއެވެ.
ބްރެޒިލްގެ ކޯޗު އިތުރަށް ބުނީ، ޓީމުން ގިނަ ކަންތައްތަކެއް ރަނގަޅަށް ކުރަމުންދިޔަ ނަމަވެސް، މިހާ ހިސާބުން ހިތްހަމަޖައްސާލައިގެން ތިބެވެން ނެތް ކަމަށެވެ. ޓީމު އިތުރު ހަރުފަތަކަށް ގެންގޮސް ވަރުގަދަކުރަން ބޭނުންވާތީ، މިހާރު އެންމެ ބޮޑު ސަމާލުކަމެއް ދެނީ ކުރިއަށް އޮތް މެޗަށް ތައްޔާރުވުމަށް ކަމަށް އޭނާ ބުންޏެވެ.
މި މެޗަށްފަހު ޖަޕާނުގެ ކޯޗު ހަޖީމޭ މޮރިޔާސޫ ބުނީ، ދުނިޔޭގެ ފުޓްބޯޅައިގެ ބޮޑެތި ބާރުތަކާއި ޖަޕާނާ ދެމެދު އޮތް ފަރަގު ކުޑަވަމުންދާ ކަމަށެވެ. އޭގެ މާނައަކީ ބްރެޒިލް ފަދަ ޓީމުތަކުގެ ފެންވަރު ދަށްވުން ނޫން ކަމަށާއި، ބަދަލުގައި ޖަޕާނުން ދުނިޔޭގެ އެންމެ މަތީ ފެންވަރަށް ވާސިލުވަމުންދާ ކަމަށް އޭނާ ފާހަގަކުރިއެވެ. ނަމަވެސް، މެޗުގެ ނަތީޖާއިން އަސަރުކުރި ކަމަށާއި، ދެ ޓީމުގެ މެދުގައި އަދިވެސް ކޮންމެ ވެސް ވަރެއްގެ ފަރަގެއް އެބައޮތް ކަމަށް އޭނާ އެއްބަސްވިއެވެ.
މޮރިޔާސޫ ބުނި ގޮތުގައި ކުރީގެ މެޗުތަކާ ހިލާފަށް މި މެޗުގައި ޖަޕާނުން ގިނަ ވަގުތު ބޯޅަ ހިފަހައްޓައިގެން ކުޅުނެވެ. އެހެން ނަމަވެސް، މިފަދަ މަތީ ފެންވަރުގެ މެޗުތަކުން މޮޅުވާން ބޭނުން ނަމަ، ޓީމުގެ ޑިފެންސްކުރުމާއި ހަމަލާދިނުމުގެ ހުނަރުތައް މިއަށް ވުރެ ބޮޑަށް ހަރުދަނާކުރަން ޖެހޭނެ ކަމަށް އޭނާ ވިދާޅުވިއެވެ.
ކޮމެންޓުތައް (0)
އަދި ކޮމެންޓެއް ނުލިބޭ. ފުރަތަމަ ކޮމެންޓުކޮށްލާ.